សម្តេចតេជោ៖ ការគ្រប់គ្រងបឹងទន្លេសាប ត្រូវគិតគូរលើការអភិរក្ស និងការរស់នៅអាស្រ័យផល របស់ពលរដ្ឋ
ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានបញ្ជាក់ថា ការងារគ្រប់គ្រងបឹងទន្លេសាប ត្រូវគិតទៅលើការងារ២សំខាន់ គឺការអភិរក្ស និងការគិតគូរដល់ការរស់នៅ និងអាស្រ័យផលរបស់ប្រជាពលរដ្ឋ។
សម្តេចបញ្ជាក់ថា ដើម្បីបង្កភាពងាយស្រួលដល់ការគ្រប់គ្រង បឹងទន្លេសាប រាជរដ្ឋាភិបាលបានបែងចែកដីបឹងទន្លេសាបជា ៣តំបន់ ក្នុងនោះដីតំបន់៣ ជាដីដែលមិនអាចអាស្រ័យផល និងមិនអាចធ្វើជាម្ចាស់កម្មសិទ្ធិបានឡើយ, តំបន់២ ជាដីដែលអាចអាស្រ័យផល ប៉ុនែ្តមិនអាចធ្វើជាម្ចាស់កម្មសិទ្ធិ និងតំបន់១ ជាដីដែលអាចអាស្រ័យផល និងអាចធ្វើជាម្ចាស់-កម្មសិទ្ធិបាន។
ជុំវិញបញ្ហាកំណត់តំបន់ផ្ទៃបឹងទន្លេសាបទនេះ សម្តេចតេជោ ហ៊ុន សែន ជាថ្មីម្តងទៀតបានជំរុញឲ្យក្រសួងស្ថាប័នពាក់ព័ន្ធ និងអាជ្ញាធរខេត្តជុំវិញបឹងទន្លេសាប ពន្លឿននូវការកាត់ឆ្វៀលដីបឹងទន្លេសាបចេញពីតំបន់២ និងតំបន់៣ ជូនប្រជាពលរដ្ឋឲ្យបានឆាប់ចប់សព្វគ្រប់។
ការថ្លែងរបស់សម្តេចតេជោ ហ៊ុន សែន ធ្វើឡើងក្នុងឱកាសអញ្ជើញបើកពិធីបុណ្យទន្លេលើកទី៧ នៅក្រុងស្ទឹងសែន ខេត្តកំពង់ធំ នាល្ងាចថ្ងៃទី០៩ ខែមីនា ឆ្នាំ២០២៣។
សម្តេចតេជោនាយករដ្ឋមន្ត្រីបានថ្លែងយ៉ាងដូច្នេះថា «ខ្ញុំសុំថ្លែងអំណរគុណ ដល់ឯកឧត្តមឧបនាយករដ្ឋមន្ត្រី ជា សុផារ៉ា ព្រមទាំងថ្នាក់ដឹកនាំនៃស្ថាប័នដែលមានការពាក់ព័ន្ធ អាជ្ញាធរខេត្តដែលបានខិតខំធ្វើការងារនេះដ៏ល្អ [ឆ្វៀលដីបឹងទន្លេសាប] ដែលមកដល់ពេលនេះ នៅសេសសល់មិនច្រើនប៉ុន្មានទេ ក៏ប៉ុន្តែខ្ញុំសុំឲ្យរំលឹកធ្វើឲ្យបានចប់សព្វគ្រប់»។
សម្តេចតេជោ ហ៊ុន សែន បញ្ជាក់ថា បើទោះតំបន់៣ មិនត្រូវបានផ្តល់កម្មសិទ្ធិក៏ពិតមែន ប៉ុន្តែប្រសិទ្ធបើបងប្អូនប្រជាពលរដ្ឋ ដែលរស់នៅតំបន់នោះយូរយារ រហូតដល់រាប់រយឆ្នាំហើយនោះ មិនត្រូវយកពួកគាត់ចេញនោះទេ ត្រូវតែកាត់ឆ្វៀលជូនពួកគាត់ ជាលក្ខណៈពិសេស។
ជាមួយគ្នានេះ សម្តេចតេជោ ហ៊ុន សែន ក៏បានថ្លែងណែនាំឱ្យក្រសួងស្ថាប័នពាក់ព័ន្ធ ត្រូវបន្តផ្តល់អាទិភាពដល់ការអភិវឌ្ឍន៍តំបន់តាមដងទន្លេ ជាពិសេសបណ្តាខេត្តជុំវិញបឹងទន្លេសាប លើការកសាងហេដ្ឋារចនាសម្ព័ន្ធចាំបាច់ ដែលបម្រើឱ្យវិស័យទេសចរណ៍ការតភ្ជាប់ និងការដឹកជញ្ជូនជាដើម៕
