ឧត្តមសេនីយ៍ត្រី អ៊ុំ សុភា បំពាក់ឋានន្តរសក្តិ ប្រកាសមុខងារ ជូនប័ណ្ណសរសើរ លិខិតសរសើរ ដល់អង្គភាព និងបុគ្គលដែលមានស្នាដៃល្អ

ភ្នំពេញ៖ ឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង នៅថ្ងៃទី៣ ខែមីនា ឆ្នាំ២០២៣ បានអញ្ជើញជាអធិបតីក្នុងពិធីបំពាក់ឋានន្តរសក្តិ ប្រកាសមុខងារ ប្រគល់ប័ណ្ណសរសើរ លិខិតសរសើរជូនដល់អង្គភាព និងបុគ្គលដែលមានស្នាដៃល្អ ក្នុងការបំពេញភារកិច្ចរយៈពេលមួយឆ្នាំកន្លងមក ។

លោក មេបញ្ជាការ បានធ្វើការកោតសរសើរ និងវាយតម្លៃខ្ពស់ចំពោះ នាយទាហាន នាយទាហានរង និងពលទាហាន ទាំងអស់ដែលបានបំពេញភារកិច្ចបានល្អក្នុងឆ្នាំ២០២២កន្លងមក ដោយការទទួលខុសត្រូវ និងយកចិត្តទុកដាក់ខ្ពស់បំផុត ។

លោកមេបញ្ជាការ បានក្រើនរំលឹកដល់នាយទាហាន នាយទាហានរង និងពលទាហានទាំងអស់ ត្រូវបន្តយកចិត្តទុកដាក់ក្នុងការអនុវត្តន៍ជាប្រចាំ ឲ្យប្រកាន់ភ្ជាប់នូវគោលការណ៍ នូវបទវិន័យរបស់កងយោធពលខេមរភូមិន្ទ ។ ទន្ទឹមគ្នានោះដែរ ក៏ត្រូវបន្តយកចិត្តទុកដាក់អនុវត្តអោយបានដាច់ខាតនូវរាល់បទបញ្ជា និងសារាចរណ៍ណែនាំ របស់ប្រមុខរដ្ឋាភិបាល ក្រសួងការពារជាតិ អគ្គបញ្ជាការ កងទ័ពជើងគោក និងយោធភូមិភាគពិសេស ដែលបានដាក់ចុះ ។

ចុងបញ្ចប់ លោកមេបញ្ជាការ បានផ្តាំផ្ញើដល់គ្រប់បណ្តាអង្គភាពទាំងអស់ត្រូវបន្តបំផុសការកសាង បង្កបង្កើនផល និងចិញ្ចឹមសត្វ ដើម្បីដោះស្រាយបន្ថែមលើគោលរបបហូបចុកប្រចាំថ្ងៃរបស់កងទ័ព និង ត្រូវខិតខំអនុវត្តផែនការទិសដៅឆ្នាំ២០២៣ អោយសម្រេចបានលទ្ធផលកាន់តែល្អឡើងថែមទៀត ៕