ភ្នំពេញ៖ ឯកឧត្តម ញ៉ែម សំអឿន អភិបាលខេត្តរតនគិរីបានលើកឡើងថា នៅក្នុងខេត្តរតនគិរីមានក្រុមហ៊ុនវិនិយោគ ចំនួន ២៧ ដែលកំពុងប្រតិបត្តិការរបស់ខ្លួនស្របតាមកិច្ចសន្យាដោយផ្តោតសំខាន់លើការដាំ ដុះដំណាំកសិ-ឧស្សហកម្ម រួមមាន៖ កៅស៊ូ ដូងប្រេង ឈើហូបផ្លែ និងការចិញ្ចឹមសត្វជាដើម ដោយមានកម្មករ និយោជិតរាប់ពាន់នាក់បានចូលបម្រើការងារតាមជំនាញ និងវិជ្ជាជីវៈរបស់ខ្លួនហើយទទួលបានប្រាក់ឈ្នួលជាមធ្យមពី២០០ដុល្លារ ទៅ៥០០ដុល្លារ ក្នុង១ខែ។
ឯកឧត្ដមបានថ្លែងបែបនេះ ក្នុងឱកាសអញ្ជើញបិទសន្និបាតបូកសរុបការងារ ផលិតអាជីវកម្មឆ្នាំ២០២២ និងលើកទិសដៅផែនការអនុវត្ត ឆ្នាំ២០២៣របស់ក្រុមហ៊ុនក្រុងប៊ុក រតនគិរី អភិឌ្ឍន៍កៅស៊ូ ដែលបានប្រារព្ធធ្វើឡើងនៅ រោងចក្រកែច្នៃជ័រកៅស៊ូក្រុមហ៊ុនក្រុង ប៊ុករតនគិរីអភិវឌ្ឍន៍ស្ថិតក្នុងស្រុកតាវែងនាព្រឹកថ្ងៃទី0១ ខែមីនា ឆ្នាំ២០២៣។
ឯកឧត្តមបានបន្តថា តាមរយៈក្រុមហ៊ុន សហគ្រាស និង មូលដ្ឋានអាជីវកម្ម ផលិតកម្មទាំងអស់នេះ គឺពិតជាបានចូលរួមចំណែកផ្ដល់ឱកាសការងារដល់ប្រជាពលរដ្ឋ ដើម្បីទទួលបានប្រាក់កម្រៃសម្រាប់ដោះស្រាយជីវភាពប្រចាំថ្ងៃនៅក្នុងគ្រួសារនីមួយៗដែលធ្វើជីវភាពរបស់ ពួកគាត់មានស្ថានភាពល្អប្រសើរ ហើយបានកាត់បន្ថយការធ្វើចំណាកស្រុកទៅរកការងារធ្វើនៅតាមបណ្តាខេត្តក្នុង ព្រះរាជាណាចក្រកម្ពុជា ឬក៏ទៅធ្វើការនៅតាមបណ្ដាប្រទេសនានាឃ្លាតចាកឆ្ងាយពីក្រុមគ្រួសារ លើសពីនេះ គឺបានជួយរំលែកបន្ទុករបស់រាជរដ្ឋាភិបាល សំដៅរួម ចំណែកក្នុងការកាត់បន្ថយភាពក្រីក្ររបស់ប្រជាពលរដ្ឋនៅមូលដ្ឋានផងដែរ។
ឯកឧត្តម ញ៉ែម សំអឿន មានជំនឿយ៉ាងមុខមាំថា តាមរយៈការបង្កើតឱ្យមានមូលដ្ឋានអាជីវកម្មកៅស៊ូនៅក្នុងរបស់ក្រុមហ៊ុន គឺពិតជាបានផ្ដល់អត្ថប្រយោជន៍យ៉ាងសំខាន់ក្នុងការផ្តល់ចំណេះដឹង ជំនាញ និងបទពិសោធន៍ក៏ដូចជាលទ្ធភាពយ៉ាងច្រើនសម្រាប់ប្រជាពលរដ្ឋទូទៅដែលមិនមានឱកាសទៅរកការងារធ្វើនៅកន្លែងឆ្ងាយៗមានលទ្ធភាពគ្រប់គ្រាន់អាចរកការងារធ្វើមូលដ្ឋានភូមិ ឃុំ របស់ខ្លួនដែលមានសុវត្ថភាពក្នុងការងារ។
ជាមួយនេះ ក្នុងនាមអាជ្ញាធរខេត្ត ឯកឧត្តម សំណូមពរឱ្យក្រុមហ៊ុន យកចិត្តទុក ដាក់សហការឱ្យបានជិតស្និទ្ធនិងមានទំនាក់ទំនងល្អជាមួយអាជ្ញាធរគ្រប់ថ្នាក់ ស្ថាប័ន អង្គភាព សមត្ថកិច្ចជំនាញ គ្រប់ផ្នែក អ្នកពាក់ព័ន្ធនានា និងបណ្តាក្រុមហ៊ុន វិស័យឯកជននានា ព្រមទាំងប្រជាពលរដ្ឋមូលដ្ឋាន ដើម្បីចូលរួមគាំទ្រឱ្យកិច្ចដំណើរការរបស់ក្រុមហ៊ុន ជាពិសេសសង្វាក់ផលិតកម្មនៃរោងចក្រ និងដំណើរការអាជីវកម្ម ផលិតកម្ម សំដៅរួមចំណែកជាមួយរាជរដ្ឋាភិបាលក្នុងការលើកកម្ពស់សុខុមាលភាពរបស់ ប្រជាពលរដ្ឋ និងការអភិវឌ្ឍសេដ្ឋកិច្ច-សង្គម ប្រកបដោយចីរភាពដែលបានឆ្លើយតបទៅនឹងតម្រូវការពិតប្រាកដរបស់ប្រជាពលរដ្ឋ។
សូមបញ្ជាក់ថា ក្រុមហ៊ុនភាគហ៊ុនកៅស៊ូក្រុងប៊ុក មានក្រុមហ៊ុនបុត្រសម្ព័ន្ធគឺ ក្រុមហ៊ុនក្រុងប៊ុករតនគិរីអភិវឌ្ឍន៍កៅស៊ូ ដែលឈរជើងវិនិយោគនៅក្នុងខេត្តរតនគិរី នៃព្រះរាជាណាចក្រកម្ពុជាមានផ្ទៃដីកៅស៊ូសរុបចំនួន ៥.៦២១,០ហិកតា ប្រមូលផលទាំង៥.៦២១,០ហិកតា។ គម្រោងអភិវឌ្ឍន៍កៅស៊ូរបស់ក្រុមហ៊ុនស្ថិតក្នុងចំណុះស្រុកពីរគឺ ស្រុកតាវែង និងស្រុកអណ្តូងមាស។មានកម្លាំងពលកម្មចំនួន១ ១៤៦នាក់ក្នុងនោះមាន ១ ០៧២នាក់ជាជនជាតិខ្មែរនិង ៧៤នាក់ជាជនជាតិវៀតណាម៕
