ឯកឧត្តម ហេង គុណលាង ដឹកនាំគណៈប្រតិភូកម្ពុជាចូលរួមក្នុងកិច្ចប្រជុំស្តីពីកម្មវិធីសហប្រតិបត្តិការបច្ចេកទេសរវាងកម្ពុជានិងទីភ្នាក់ងារថាមពលបរមាណូអន្តរជាតិ (IAEA)

ភ្នំពេញ៖ ឯកឧត្តម ហេង គុណលាង អគ្គនាយកនៃអគ្គនាយកដ្ឋានថាមពល ក្រសួងរ៉ែនិងថាមពល នាព្រឹកថ្ងៃចន្ទ ៨កើត ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៧ ខែកុម្ភៈ ឆ្នាំ២០២៣ បានអញ្ជើញដឹកនាំគណៈប្រតិភូកម្ពុជាចូលរួមក្នុងកិច្ចប្រជុំស្តីពីកម្មវិធីសហប្រតិបត្តិការបច្ចេកទេសរវាងកម្ពុជានិងទីភ្នាក់ងារថាមពលបរមាណូអន្តរជាតិ (IAEA) កាលពីថ្ងៃទី២០ ដល់ទី ២៤ ខែកុម្ភៈ ឆ្នាំ២០២៣ នៅទីស្នាក់ការកណ្តាលនៃទីភ្នាក់ងារ​ IAEA ស្ថិតក្នុងទីក្រុងវីយ៉ែន ប្រទេសអូទ្រីស ដោយមានការចូលរួមដោយតំណាងពីក្រសួងស្ថាប័ន-ពាក់ព័ន្ធរួមមានក្រសួងរ៉ែនិងថាមពល ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រសួងកសិកម្ម រុក្ខាប្រមាញ់ និងនេសាទ និងមន្ទីរពេទ្យហ្លួងម៉ែ។

កិច្ចប្រជុំនេះត្រូវបានរៀបចំឡើងក្នុងគោលបំណងដើម្បី៖
១-ពិនិត្យនិងពិភាក្សាចុងក្រោយលើសំណើគម្រោងសហប្រតិបត្តិការបច្ចេកទេសរវាងកម្ពុជានិងទីភ្នាក់ងារ IAEA សរុបចំនួន ០៥ គម្រោង សម្រាប់អនុវត្តឆ្នាំ ២០២៤-២០២៥
២-ពិនិត្យនិងពិភាក្សាបឋមលើសេចក្តីព្រាងក្របខ័ណ្ឌថ្នាក់ជាតិ (Country’s Programme Framework-CPF) ដើម្បីបន្តសហប្រតិបត្តិការជាមួយទីភ្នាក់ងារ IAEA ពីឆ្នាំ ២០២៤-២០២៩
៣-ស្វែងរកជំនួយបច្ចេកទេសគាំទ្រលើការងារពាក់ព័ន្ធនឹងការរៀបចំផែនការថាមពលអគិ្គសនី (Energy Planning) និងប្រសិទ្ធភាពថាមពល ( Energy Efficiency) ក្នុងនោះរួមមានការបណ្តុះបណ្តាលមន្ត្រីជំនាញលើការប្រើប្រាស់ប្រាស់កម្មវិធី Model for Analysis of Energy Demand (MAED-2) និង Wien Automatic System Planning Package (WASP) របស់ IAEA ស្របពេលដែលរាជរដ្ឋាភិបាលកម្ពុជាទើបតែអនុម័តលើផែនការមេសម្រាប់អភិវឌ្ឍវិស័យថាមពលអគ្គិសនី ២០២២-២០៤០ និងគោលនយោបាយជាតិស្តីពីប្រសិទ្ធភាពថាមពល ២០២២-២០៣០ និង
៤-ពិនិត្យ និងពិភាក្សាលើការកៀរគរជំនួយសហប្រតិបត្តិការបច្ចេកទេសក្នុងក្របខ័ណ្ឌគម្រោង Rays of Hope របស់ IAEA ដើម្បីចូលរួមអភិវឌ្ឍន៍មន្ទីរពេទ្យហ្លួងម៉ែជាមន្ទីរពេទ្យឯកទេសព្យាបាលជំងឺមហារីក ៕