លោក Xi Jinping ប្រធានរដ្ឋចិនចូលគាល់ព្រះករុណា ព្រះបាទសម្តេច ព្រះបរមនាថ នរោត្តមសីហមុនី ព្រះមហាក្សត្រនៃព្រះរាជាណាចក្រកម្ពុជានិងសម្តេចព្រះមហាក្សត្រីនរោត្តម មុនីនាថ សីហនុ
នៅថ្ងៃទី២៤ ខែកុម្ភៈ លោក Xi Jinping ប្រធានរដ្ឋចិននិងលោកស្រី Peng Liyuan ភរិយារបស់លោកបានចូលគាល់ព្រះករុណា ព្រះបាទសម្តេច ព្រះបរមនាថ នរោត្តមសីហមុនី ព្រះមហាក្សត្រនៃព្រះរាជាណាចក្រកម្ពុជានិងសម្តេចព្រះមហាក្សត្រីនរោត្តម មុនីនាថ សីហនុនៅសណ្ឋាគាររដ្ឋ Diaoyutai ក្រុងប៉េកាំង។
ថ្លែងក្នុងកិច្ចជំនួប លោក Xi Jinping បានសម្តែងការស្វាគមន៍ចំពោះព្រះមហាក្សត្រ ព្រះបាទនរោត្តម សីហមុនី និងសម្តេចព្រះមហាក្សត្រីនរោត្តម មុនីនាថ សីហនុ ដែលបានយាងមកទីក្រុងប៉េកាំង ដើម្បីពិនិត្យព្រះរាជសុខភាព ។ លោក Xi Jinping បានបញ្ជាក់ថា ប្រទេសចិនមានឆន្ទៈរួមសហការជាមួយកម្ពុជា ដើម្បីកសាងក្របខណ្ឌកិច្ចសហប្រតិបត្តិការ “ពេជ្រប្រាំមួយជ្រុង” គាំទ្រកម្ពុជាក្នុងការកសាង“របៀងអភិវឌ្ឍន៍ឧស្សាហកម្ម” និង “របៀងស្រូវអង្ករនិងត្រី ” ក៏ដូចជាពន្លឿនការកសាងសហគមន៍រួមវាសនាចិន-កម្ពុជា ។ ភាគីចិននឹងបន្តគាំទ្រដល់ការងាររបស់ “ក្រុមការងាររបស់ព្រះមហាក្សត្រ” ដើម្បីនាំមកនូវផលប្រយោជន៍កាន់តែច្រើនដល់ប្រជាជនកម្ពុជា។
ជាការឆ្លើយតប ព្រះមហាក្សត្រីនរោត្តម មុនីនាថ សីហនុបានថ្លែងអំណរគុណចំពោះប្រទេសចិនដែលតែងតែផ្តល់ជំនួយនិងការគាំទ្រដល់កម្ពុជាក្នុងរយៈពេលយូរមក ។ ភាគីកម្ពុជាមានឆន្ទៈរួមសហការជាមួយភាគីចិន ដោយចាត់ទុកខួបទី ៦៥ នៃការបង្កើតទំនាក់ទំនងការទូតរវាងកម្ពុជានិងចិនជាឱកាស ដើម្បីធ្វើឱ្យស៊ីជម្រៅនូវការផ្លាស់ប្តូរមិត្តភាពនិងកិច្ចសហប្រតិបត្តិការលើវិស័យនានា ក្នុងន័យជំរុញឱ្យទំនាក់ទំនងមិត្តភាពជាប្រពៃណីរវាងកម្ពុជានិងចិនបន្តវេនពីមួយជំនាន់ទៅមួយជំនាន់ ៕
