ឯកឧត្តម កៅ ខុនដារ៉ា អញ្ជើញដឹកនាំកិច្ចប្រជុំពិភាក្សាស្តីអំពីការរៀបចំបំពាក់សម្ភារៈដល់នាយកដ្ឋាន និងអង្គភាព នៃអគ្គនាយកដ្ឋានចំណុះក្រសួងមហាផ្ទៃ នៅអគារទីស្តីការក្រសួងមហាផ្ទៃថ្មី

ភ្នំពេញ៖ នារសៀលថ្ងៃសុក្រ ទី២៤ ខែកុម្ភៈ ឆ្នាំ២០២៣ ឯកឧត្តម កៅ ខុនដារ៉ា រដ្ឋលេខាធិការក្រសួងមហាផ្ទៃ ទទួលបន្ទុកការងារស្ថាបនា និងវិស្វកម្ម និងផ្នែកហិរញ្ញវត្ថុស៊ីវិល បានអញ្ជើញអធិបតីដឹកនាំកិច្ចប្រជុំពិភាក្សាស្តីអំពីការរៀបចំបំពាក់ សម្ភារៈផ្សេងៗដល់នាយកដ្ឋាន និងអង្គភាព នៃអគ្គនាយកដ្ឋាននីមួយៗ ចំណុះក្រសួងមហាផ្ទៃ ដែលត្រូវផ្លាស់ចូលមកបម្រើការងារក្នុងអគារទីស្តីការក្រសួងមហាផ្ទៃថ្មី។ នៅក្នុងកិច្ចប្រជុំនេះក៏មានការអញ្ជើញចូលរួមពី ឯកឧត្តម លោកជំទាវ តំណាងអគ្គនាយកដ្ឋាន និងអង្គភាពនានាចំណុះក្រសួងមហាផ្ទៃ និងមន្ត្រីពាក់ព័ន្ធជាច្រើនរូបផងដែរ។

នាឱកាសនោះ ឯកឧត្តម រដ្ឋលេខាធិការក្រសួងមហាផ្ទៃ បានមានប្រសាសន៍ថា កិច្ចប្រជុំថ្ងៃនេះគឺធ្វើឡើងដើម្បីពិភាក្សាគ្នាលម្អិតជាមួយបណ្តាអគ្គនាយកដ្ឋាន និងអង្គភាពចំណុះក្រសួងមហាផ្ទៃ ដើម្បីពិនិត្យពិភាក្សាឡើងវិញលើការងារស្នើសុំរៀបចំបំពាក់សម្ភារៈបច្ចេកទេសផ្សេងៗ និងសម្ភារៈការិយាល័យសម្រាប់នាយកដ្ឋាន និងអង្គភាពនានាចំណុះក្រសួងមហាផ្ទៃ ដែលត្រូវផ្លាស់ប្តូរចូលបំពេញការងារនៅក្នុងអគារទីស្តីការក្រសួងមហាផ្ទៃថ្មី នាពេលខាងមុខ។ ជាងនេះទៀត ឯកឧត្តម ក៏បានបញ្ជាក់បន្ថែមថា រាល់សំណើគឺត្រូវធ្វើតាមតម្រូវការរបស់អង្គភាពនីមួយៗ ជាពិសេស ឱ្យមានលក្ខណៈសមស្របបំផុត ជៀសវាងការស្នើសុំលើសពីតម្រូវការជាក់ស្តែងដែលមិនមែនជាតម្រូវការចាំបាច់របស់អង្គភាពនីមួយៗ។

ជាមួយគ្នានេះ ឯកឧត្តម ក៏បានណែនាំឱ្យអគ្គនាយកដ្ឋាន និងអង្គភាពពាក់ព័ន្ធទាំងអស់ ជាពិសេសប្រធានអង្គភាពនីមួយៗ ត្រូវធ្វើតារាងស្នើសុំលម្អិតឡើងវិញ និងត្រូវសិក្សាឱ្យបានច្បាស់លាស់លើតម្រូវការជាក់ស្តែងរបស់អង្គភាពនីមួយៗ ដើម្បីថ្នាក់ដឹកនាំក្រសួងធ្វើការពិនិត្យសម្រេចបំពាក់ជូនទៅតាមតម្រូវការ និងស្របតាមបច្ចេកទេសឱ្យបានគ្រប់គ្រាន់៕