សម្តេចតេជោ ហ៊ុន សែន៖ ស៊ន តារា កំពុងប្រព្រឹត្តកំហុសធ្ងន់ធ្ងរដែលបានវាយប្រហារចំពោះឪពុកម្តាយខ្លួន
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍ថា លោក ស៊ន តារា សកម្មជនក្រុមប្រឆាំងម្នាក់ ដែលចាកចេញគ្រួសារទៅរស់នៅក្រៅប្រទេសថា កំពុងប្រព្រឹត្តកំហុសធ្ងន់ធ្ងរខាងសីលធម៌ ដោយបានវាយប្រហារចំពោះឪពុកម្តាយខ្លួន។
ការលើកឡើងរបស់ សម្តេចតេជោ ហ៊ុន សែន បានធ្វើឡើងបន្ទាប់ពីឪពុកម្តាយរបស់ លោក ស៊ន តារា បានចេញមុខបញ្ជាក់ប្រាប់អ្នកសារព័ត៌មាន អំពីអត្តចរិតរបស់កូន ដែលមិនស្តាប់បង្គាប់ឪពុកម្តាយ។ តាមរយៈវីដេអូឃ្លីបរយៈពេលជាង២នាទី លោក សុខ ស៊ុនណារ៉េត ជាឪពុកបង្កើតរបស់ លោក ស៊ន តារា ហើយក៏ជាទាហានមួយរូបដែរនោះ បានរៀបរាប់ថា លោកបានព្យាយាមអប់រំ និងទូន្មាន លោក ស៊ន តារា ជាច្រើនតែមិនស្តាប់ ហើយរហូតដល់កូនរូបនេះ ប្រមាថរូបលោកថា «ចេះមិនដល់ខ្លួនថែមទៀតផង»។
ថ្លែងក្នុងពិធីប្រគល់សញ្ញាបត្រ ជូននិស្សិតសាកលវិទ្យាល័យភូមិន្ទភ្នំពេញជាង ៧ពាន់នាក់ នាព្រឹកថ្ងៃទី២៤ ខែកុម្ភៈ ឆ្នាំ២០២៣ សម្តេចតេជោ ហ៊ុន សែន បានលើកឡើងដូច្នេះថា៖ «វាមិនចម្លែកទេ បើក្មួយប្រមាថឪពុកខ្លួនឯងថា “ប៉ាឯងកុំចេះ ! ខ្ញុំរៀនចេះជាងប៉ាឯង” ប្រសិនបើក្មួយប្រើភាសាដូចអ្វីដែលឪពុកក្មួយឯងនិយាយ ក្មួយខុសធំហើយ រឿងក្មួយគេចោទបញ្ហាអញ្ចេះគឺថា “បើ ស៊ន តារា ធ្វើរបៀបនេះជាមួយឪពុកម្តាយរបស់ខ្លួន វាមិនចាំបាច់គិតទេទៅលើការវាយប្រហារអ្នកដទៃ រាប់តាំងវាយប្រហារលើព្រះមហាក្សត្រ វាយប្រហារមកលើខ្ញុំជានាយករដ្ឋមន្ត្រី ឬកូនរបស់ខ្ញុំ»។
សកម្មជន ស៊ន តារា បានចាកចេញទៅរស់នៅប្រទេសបារាំង ទន្ទឹមគ្នាជាមួយនឹងមេដឹកនាំក្រុមប្រឆាំងដទៃទៀត បន្ទាប់ពីគណបក្សសង្រ្គោះជាតិ ត្រូវបានរំលាយ។ ក្រោយរស់នៅក្រៅប្រទេស លោកបានបើកយុទ្ធនាការផ្សព្វផ្សាយព័ត៌មានវាយប្រហាររាជរដ្ឋាភិបាលជាបន្តបន្ទាប់។
តាមរយៈវីដេអូ កាលពីថ្ងៃទី២១ ខែកុម្ភៈ ឆ្នាំ២០២២ លោក សុខ ស៊ុនណារ៉េត បានបន្តអំពាវនាវឱ្យកូនឈប់វាយប្រហារលើ សម្តេចតេជោ ហ៊ុន សែន ដែលមានជាអ្នកមានគុណបំណាច់ចំពោះជាតិ និងប្រជាជនកម្ពុជា។ ប៉ុន្តែសកម្មជនរូបនេះ ពុំបានស្តាប់នូវការអំពាវនាវរបស់ឪពុកខ្លួនទេ។
ក្នុងពិធីដដែលនេះ សម្តេចតេជោ ហ៊ុន សែន បានពន្យល់បន្ថែមដល់ លោក ស៊ន តារា ដោយលើកឡើងថា «ក្មួយនិយាយថា ក្មួយគោរពសិទ្ធិប្រជាពលរដ្ឋ និងស្តាប់ប្រជាពលរដ្ឋ គេគ្រាន់តែវ៉ៃតែមួយម៉ាត់ទេថា “បើគ្រាន់តែឪពុកម្តាយខ្លួនឯង មិនទាំងស្តាប់ផង តើវាយកត្រចៀកស្តាប់ពលរដ្ឋធ្វើស្អី?” ក្មួយអើយក្មួយ! ល្មមបានហើយគ្រប់គ្រាន់ហើយ»។
សម្តេចតេជោ ហ៊ុន សែន បានលើកពីប្រវត្តិរូប លោក ស៊ន តារា ដែលកើតនៅចុងឆ្នាំ១៩៧៩ ក្រោយថ្ងៃរំដោះ៧មករា ប៉ុន្មានខែប៉ុណ្ណោះ គឺមានន័យថា ឪពុកម្តាយរបស់ លោក ស៊ន តារា ជាអ្នកនៅសេសសល់ពីការកាប់សម្លាប់របស់ខ្មែរក្រហម ហើយត្រូវបានរំដោះ។ សម្តេចតេជោ បានទូន្មានថា ឪពុកម្តាយគ្រប់រូបគឺជាព្រះនៅក្នុងផ្ទះ ប៉ុន្តែ លោក ស៊ន តារា បែរជាមើលងាយឪពុកម្តាយដែលជាអ្នកបង្កើតខ្លួនគេផ្ទាល់។
ទោះជាយ៉ាងនេះក្តី សម្តេចបានបញ្ជាក់ថា សម្តេចមិនបិទផ្លូវរបស់ លោក ស៊ន តារា នោះទេ ខណៈដែលពេលនេះឪពុកម្តាយរបស់ លោក ស៊ន តារា សុទ្ធតែបានអំពាវនាវឱ្យកូន មានការកែប្រើឥរិយាបទ៕
