កម្លាំងព្រហ្មទណ្ឌរាជធានីភ្នំពេញ បង្ក្រាបក្រុមក្មេងទំនើង១០នាក់ ពាក់ព័ន្ធករណីឆក់ និងអំពើហិង្សា
ភ្នំពេញ៖ កម្លាំងការិយាល័យនគរបាលព្រហ្មទណ្ឌ នៃស្នងការដ្ឋាននគរបាលរាជធានីភ្នំពេញបានស្រាវជ្រាវបង្ក្រាបក្មេងទំនើងសរុបចំនួន១០នាក់ ដែលបានធ្វើសកម្មភាពប្រព្រឹត្តបទល្មើសព្រហ្មទណ្ឌ០២ករណីផ្សេងគ្នា ហើយនៅព្រឹកថ្ងៃទី១៥ ខែកុម្ភៈ ឆ្នាំ២០២៣ ត្រូវបានកម្លាំងជំនាញការិយាល័យព្រហ្មទណ្ឌកម្រិតស្រាល រាជធានីភ្នំពេញចាប់បញ្ជូនទៅតុលាការចាត់ការតាមផ្លូវច្បាប់។
លោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាល រាជធានីភ្នំពេញប្រាប់ឱ្យដឹងថា នៅថ្ងៃទី១១ ខែកុម្ភៈ ឆ្នាំ២០២៣ វេលាម៉ោង០៩និង២០នាទីយប់កម្លាំងជំនាញព្រហ្មទណ្ឌបានស្រាវជ្រាវឃាត់ខ្លួនជនសង្ស័យជាបន្តបន្ទាប់ចំនួន០៤នាក់ នៅចំណុចម្តុំផ្សារមិតថោន ផ្លូវ២០០២ សង្កាត់អូរបែកក្អម ខណ្ឌសែនសុខ រាជធានីភ្នំពេញ ពាក់ព័ន្ធប្រព្រឹត្តបទល្មើស អំពើលួចមានស្ថានទម្ងន់ទោសដោយសារការប្រព្រឹត្តអំពើហិង្សា (ឆក់ទ្រព្យសម្បត្តិរបស់ប្រជាពលរដ្ឋខ្មែរ និងជនបរទេសតាមដងផ្លូវក្នុងរាជធានីភ្នំពេញ)ចំនួន ០៣ ករណីផ្សេងគ្នា។
លោកវរសេនីយ៍ឯកបានបញ្ជាក់ឱ្យដឹងទៀតថា ជនសង្ស័យទាំង៤នាក់មានឈ្មោះ១- គិត សុម៉េង ហៅយ៉ាគើ ភេទប្រុស អាយុ១៨ឆ្នាំ ជនជាតិខ្មែរ គ្មានមុខរបរពិតប្រាកដ រស់នៅក្នុង ភូមិក្បាលរមាស ឃុំក្បាលរមាស ស្រុកទឹកឈូ ខេត្តកំពត។ ២-ឈ្មោះ ថេង ចាន់វីរៈបុត្រ ភេទ ប្រុស អាយុ ១៨ ឆ្នាំ ជនជាតិ ខ្មែរ គ្មានមុខរបរពិតប្រាកដរស់នៅក្នុង សង្កាត់ប្ញស្សីកែវ ខណ្ឌប្ញស្សីកែវ រាជធានីភ្នំពេញ ។ ៣-ឈ្មោះ ជ័យ សុខឆាយ ភេទ ប្រុស អាយុ១៨ឆ្នាំ ជនជាតិ ខ្មែរ មុខរបរ ដឹកអីវ៉ាន់ស្នាក់នៅផ្ទះលេខ៤៩សេ ផ្លូវលេខ២៣០ សង្កាត់ផ្សារដើមគរ ខណ្ឌទួលគោក រាជធានីភ្នំពេញ និង ៤-ឈ្មោះ ងិន ចាន់ពិសិដ្ឋ ភេទប្រុស អាយុ១៨ឆ្នាំ ជនជាតិខ្មែរ គ្មានមុខរបរពិតប្រាកដ។វត្ថុតាងចាប់យក ម៉ូតូ០១គ្រឿងម៉ាក ហុងដា ដែលជនសង្ស័យជិះធ្វើសកម្មភាព។
លោកវរសេនីយ៍ឯកបន្ថែមថា ដោយឡែក១ករណីទៀតគឺជនសង្ស័យជាក្មេងទំនើង៦នាក់ ត្រូវបានកម្លាំងជំនាញព្រហ្មទណ្ឌបង្ក្រាបចាប់ខ្លួនបានជាបន្តបន្ទាប់នៅក្នុងភូមិសាស្ត្ររាជធានីភ្នំពេញកាលពីថ្ងៃទី១០ ខែកុម្ភៈ ឆ្នាំ២០២៣ ក្រោយពីក្រុមបង្កទាំងនេះបានប្រើអំពើ ហិង្សាដោយចេតនាមានស្ថានទម្ងន់ទោស (យកដុំថ្មគប់ នឹងប្រើកាំបិតប៉័ងតោកាប់ទៅលើជនរងគ្រោះ០១នាក់ ឈ្មោះ លី ហុងភាវ ភេទ ប្រុស អាយុ១៧ឆ្នាំ ជនជាតិខ្មែរ មានទីលំនៅ ផ្លូវបេតុង ភូមិធម្មត្រី សង្កាត់ព្រៃស ខណ្ឌដង្កោ រាជធានីភ្នំពេញ ជាសិស្សសាលាទួនហ្វា បណ្តាលឲ្យរងរបួសយ៉ាងដំណំ ប្រព្រឹត្តនៅចំណុចកន្លែងលក់ហ្វឺ ផ្លូវលេខ៣០៤ ភូមិ៥ សង្កាត់អូរឡាំពិក ខណ្ឌបឹងកេងកង រាជធានីភ្នំពេញ កាលពីថ្ងៃទី៦ ខែមករា ឆ្នាំ២០២៣ វេលាម៉ោង១៤និង០០នាទីរសៀល៕
