ភ្នំពេញ៖ ឯកឧត្ដម សុខ លូ អភិបាលខេត្តបាត់ដំបង បានបញ្ជាក់ថា លោកតាដំបងគ្រញូង គឺពណ៌នៅដដែលដូចមុន មិនមានអ្វីប្រែប្រួលទេ។
ការបញ្ជាក់បែបនេះរបស់អភិបាលខេត្តបានធ្វើឡើងបន្ទាប់ពីមានការបង្ហោះផ្សាយអំពីរូបភាពដែលក្រុមជាងកំពុងលាបថ្នាំថ្មីលើបដិមាលោកតាដំបងគ្រញូង ហើយត្រូវបានប្រជាពលរដ្ឋបញ្ចេញមន្ទិលសង្ស័យ និងព្រួយបារម្ភខ្លាចមានការប្ដូរពណ៌ថ្មីលើបដិមាដែលជាទីសក្ការៈនៃប្រជាជាតិខ្មែរ និងជានិម្មិតរូបដ៏ពិសិដ្ឋនៃខេត្តបាត់ដំបង។
តាមរយៈបណ្ដាញសង្គមហ្វេសប៊ុកនៅថ្ងៃទី១១ ខែកុម្ភៈ ឆ្នាំ២០២៣នេះ ឯកឧត្ដម សុខ លូ បានបញ្ជាក់ឱ្យដឹងយ៉ាងដូច្នេះថា “ មានអ្នកខ្លះគាត់ថាម៉េចតាដំបងគ្រញូងលាបព៌ណស…ខ្លះថាម៉េចព៌ណក្រហម…ខ្លះថាដូរព៌ណថ្មីហើយឆ្នាំថ្មី…ចាំមើលចេះ..ចុះ។ ល។សូមជម្រាថាព៌ណគឺនៅដដែលដូចមុនអញ្ចឹង មិនមានអីប្រែប្រួលទេ។ នេះគ្រាន់តែជាថ្នាំទ្រនាប់តែប៉ុណ្ណោះ។ សូមទានជ្រាបនិងសូមអរគុណបាទ”។
បើតាមលោក លាង វាសានា អភិបាលក្រុងបាត់ដំបង បានបញ្ជាក់ឱ្យដឹងដែរថា ការកែលម្អរពណ៌លោកតាដំបូងគ្រញូង បានធ្វើឡើងតំណាលគ្នានឹងគម្រោងកែលម្អហេដ្ឋារចនាសម្ព័ន្ធមួយចំនួនទៀផតក្នុងក្រុងបាត់ដំបង ដើម្បីប្រារព្ធសង្ក្រាន្តបាត់ដំបង២០២៣ សហការរៀបចំដោយ ស.ស.យ.ក.ខេត្តបាត់ដំបង និងរដ្ឋបាលខេត្តបាត់ដំបង៕
