ក្នុងឱកាសបុណ្យវិសាខបូជា និងចូលឆ្នាំខ្មែរខាងមុខ ពន្ធនាគារខេត្តបន្ទាយមានជ័យ បានរៀបចំបើកកិច្ចប្រជុំ ដើម្បីធ្វើការបន្ធូរបន្ថយទោស
ភ្នំពេញ៖ ក្នុងឱកាសពិធីបុណ្យវិសាខបូជានិងបុណ្យចូលឆ្នាំខ្មែរខាងមុខ ពន្ធនាគារខេត្តបន្ទាយមានជ័យបានរៀបចំបើកកិច្ចប្រជុំដើម្បីធ្វើការបន្ធូរបន្ថយ ទោស ដល់ទណ្ឌិតចំនួន ៤៦នាក់ ចាប់ពី ៣ខែ ៦ខែ ដល់៩ខែ ក្រោមអធិបតីភាពលោក ង៉ោ ម៉េងជ្រួន អភិបាលរងខេត្តបន្ទាយមានជ័យ នាថ្ងៃទី៩ ខែកុម្ភៈ ឆ្នាំ២០២៣ កិច្ចប្រជុំនេះធ្វើឡើងនៅសាលប្រជុំសាលាខេត្តបន្ទាយមានជ័យ។
តាមរបាយការណ៍របស់លោកឧត្តមអគ្គានុរក្សថ្នាក់លេខ២ អ៊ុង ស៊ីផាន បានបង្ហាញថា៖ ស្ថិតិ បញ្ជីឈ្មោះ និងសាវតានៃទណ្ឌិត ជនជាតិខ្មែរ និងជនបរទេស ដែលត្រូវបានអង្គភាព ពន្ធនាគារខេត្តបន្ទាយមានជ័យ ស្នើសុំការអនុម័ត ពីគណៈកម្មការ បន្ធូបន្ថយទោស បន្តសុំថ្វាយការសម្រេចពីព្រះមហាក្សត្រនិងថ្នាក់លើ ក្នុងនោះមានបន្ធូរបន្ថយទោសចាប់ ពី៣ខែ ៦ខែ ដល់៩ខែ ដល់ទណ្ឌិតចំនួន២៤នាក់ក្នុងពិធីបុណ្យពិសាខបូជា និងចំនួន២២នាក់ក្នុងឱកាសពិធីបុណ្យចូលឆ្នាំខ្មែរខាងមុខ។
ក្នុងនោះលោក ង៉ោ ម៉េងជ្រួន បានធ្វើការកោតសរសើរនិងវាយតម្លៃចំពោះថ្នាក់ដឹកនាំពន្ធនាគារខេត្តបន្ទាយមានជ័យនិងមន្ត្រីក្រោមឱវ៉ាទ បានធ្វើការខិតខំប្រឹងប្រែងគ្រប់គ្រង ថែរក្សាអ្នកជាប់ឃុំ ក្នុងនោះ បានពិនិត្យ វាយតម្លៃ លើសកម្មភាព អនុវត្ត គុណសម្បត្តិ និងរយៈពេលនៃការជាប់ឃុំ របស់ទណ្ឌិត ហើយវាយតម្លៃ ស្នើសុំបន្ធូរបន្ថយទោស ពី៣ ខែ៦ ដល់៩ខែ។
លោក អភិបាលរងខេត្ត សង្ឃឹមថា៖ ដំណើរការនេះនឹងមិនមាន អំពើពុករលួយ ភាពលំអៀង មិនបក្ខពួក ភាពមិនប្រក្រតី ឬបញ្ហាកើតឡើងឡើយ ពោលធ្វើយ៉ាងណាប្រកបដោយ ការទទួលខុសត្រូវ និងប្រសិទ្ធិភាពខ្ពស់ផងដែរ។
ជាមួយគ្នានោះ លោក ង៉ោ ម៉េងជ្រួន ក៏បាន ផ្តាំផ្ញើរដល់ទណ្ឌិតដែលទទួលបានការបន្ធូរបន្ថយទោស ឲ្យធ្វើការផ្សព្វផ្សាយអំពីការបន្ធូរបន្ធយទោសរបស់ខ្លួន ទៅកាន់ទណ្ឌិតផ្សេងៗទៀត ក្នុងគោលដៅឲ្យចូលរួមគោរព អនុវត្ត បទបញ្ជាផ្ទៃក្នុង វិធាននានារបស់ពន្ធនាគារ និងព្យាយាមកែប្រែខ្លួនឲ្យក្លាយជាពលរដ្ឋល្អ ដើម្បីត្រៀមចូលមករួមរស់នៅក្នុងសហគមន៍ក្រោយពេលអនុវត្តទោសចប់សព្វគ្រប់៕
