ឯកឧត្តម សុខ ប្រសិទ្ធិ អញ្ចើញចុះហត្ថលេខាលើអនុស្សរណៈ នៃការយោគយល់គ្នារវាងសម្ពន្ធយុវជនអាហារូបករណ៍ (ស២) ជាមួយសាកលវិទ្យាល័យ Technology Rajamangala Phra Nakhon
ភ្នំពេញ៖ ឯកឧត្តម សុខ ប្រសិទ្ធិ រដ្ឋលេខាធិការ ក្រសួងព័ត៌មាន និងជាប្រធានក្រុមប្រឹក្សាភិបាល នៃគណៈកម្មការប្រតិបត្តិសម្ពន្ធយុវជនអាហារូបករណ៍ (ស២) នារសៀលថ្ងៃព្រហស្បតិ៍ ១២កើត ខែមាឃ ឆ្នាំខាល ចត្វាស័ក ព.ស២៥៦៦ ត្រូវនឹងថ្ងៃទី២ ខែកុម្ភៈ ឆ្នាំ២០២៣ បានអញ្ចើញចុះហត្ថលេខាលើអនុស្សរណៈ នៃការយោគយល់គ្នារវាងសម្ពន្ធយុវជនអាហារូបករណ៍ (ស២) ជាមួយសាកលវិទ្យាល័យ Technology Rajamangala Phra Nakhon ដោយផ្អែកលើសហប្រតិបត្តិការ នៃការអភិវឌ្ឍន៍ធនធានមនុស្ស តាមរយៈការផ្តល់អាហារូបករណ៍សម្រាប់ការសិក្សាលើជំនាញនានា ជូនសិស្សនិស្សិតកម្ពុជាដែលមានបំណងចង់មកសិក្សានៅព្រះរាជាណាចក្រថៃ។
សាកលវិទ្យាល័យ Technology Rajamangala Phra Nakhon ត្រូវបានបង្កើតឡើងនៅថ្ងៃទី១៨ ខែមករា ឆ្នាំ២០០៥ ។ប៉ុន្តែតាមការពិតទៅ សាកលវិទ្យាល័យ Rajarangas University of Technology Phra Nakhon មានប្រវត្តិយូរលង់ណាស់មកហើយ និងត្រូវបានចាត់ទុកថាជាស្ថាប័នអប់រំ ដ៏ល្បីមួយ ដែលមានជំនាញវិជ្ជាជីវៈជាយូរយាណាស់មកហើយ ដើមឡើយជាផ្នែកមួយនៃវិទ្យាស្ថានបច្ចេកវិទ្យា Rajamargala ដែលជាស្ថាប័នអប់រំដែលផ្តល់ការអប់រំវិជ្ជាជីវៈហើយមានច្រើនជាង ៣៥ សាខាផ្សេង គ្នានៅទូទាំងប្រទេសថៃ។ នៅពេលដែលស្ថានភាពត្រូវបានផ្លាស់ប្តូរពីវិទ្យាស្ថានមួយទៅសាកលវិទ្យាល័យក្នុងឆ្នាំ២០០៥ បានចែកជាសាកលវិទ្យាល័យឯករាជ្យមួយគឺ “សាកលវិទ្យាល័យ “Technology Rajamangala Phra Nakhon “។
មកដល់ពេលនេះ សាកលវិទ្យាល័យ Technology Rajamangala Phra Nakhon ជាសាកលវិទ្យាល័យដែលមានទីតាំងនៅកណ្តាលទីក្រុងបាងកក។ ដែលមានសាខាដើមចំនួន ៥ គឺ ៖ទេវសាខាជោតិវិ, សាខាពាណិជ្ជកម្ម Pfra Nakhon, សាខាជម្ភូវ័នខេត្តឧត្តមសេនាស័ក្កិ បាងកកខាងជើង ដែលមិនឆ្ងាយពីគ្នាទៅវិញទៅមក ។
សាកលវិទ្យាល័យបានរួមចំណែកក្នុងការបង្កើតធនធានមនុស្ស ជាមួយនឹងចំណេះដឹង និងជំនាញផ្នែកវិទ្យាសាស្ត្រ និងបច្ចេកវិទ្យាការគ្រប់គ្រងការបង្រៀននឹងការរៀន ដោយបានបែងចែកចេញជា ៩ មហាវិទ្យាល័យគឺ៖
– មហាវិទ្យាល័យអប់រំឧស្សាហកម្ម
– មហាវិទ្យាល័យបចេ្ចកវិទ្យាគេហវិទ្យា
– មហាវិទ្យាល័យបច្ចេកវិទ្យាគមនាគមន៍
– មហាវិទ្យាល័យគ្រប់គ្រងពាណិជ្ជកម្ម
– មហាវិទ្យាល័យវិទ្យាសាស្ត្រ និងបច្ចេកវិទ្យា
– មហាវិទ្យាល័យវិស្វកម្ម
– មហាវិទ្យាល័យមនុស្សសាស្ត្រ និងសង្គមសាស្ត្រ
– មហាវិទ្យាល័យឧស្សាហកម្មវាយនភ័ណ្ឌ និងរចនាម៉ូដ
– មហាវិទ្យាល័យស្ថាបត្យកម្ម និងរចនា ៕
