ឧត្តមសេនីយ៍ឯក យឿង សុខុន និងឯកឧត្តម អ៊ូច ភា អញ្ជើញបិទវគ្គហ្វឹកហ្វឺនបំប៉នពង្រឹងសមត្ថភាពយោធា បាញ់គ្រាប់ពិត ឆ្នាំ២០២២ របស់តំបន់ប្រតិបត្តិការសឹករងតាកែវ
ភ្នំពេញ៖ ឯកឧត្តម ឧត្តមសេនីយ៍ឯក យឿង សុខុន មេបញ្ជាការរងទ័ពជើងគោក មេបញ្ជាការយោធភូមិភាគទី៣ និងឯកឧត្តម អ៊ូច ភា អភិបាលខេត្តតាកែវ ព្រមទាំងថ្នាក់ដឹកនាំ នៅថ្ងៃទី៣១ ខែមករា ឆ្នាំ២០២៣ បានអញ្ជើញជាអធិបតីនៅក្នុងពិធីបិទ វគ្គហ្វឹកហ្វឺនបំប៉នពង្រឹងសមត្ថភាពយោធាឆ្នាំ២០២២ របស់តំបន់ប្រតិបត្តិការសឹករងតាកែវ នៅទីលានបាញ់គ្រាប់ពិត ស្ថិតនៅភូមិបុស្សតាផង់ ឃុំត្រពាំងក្រញូង ស្រុកត្រាំកក់។
ពិធីនេះក៏មានការអញ្ជើញចូលរួមដោយ លោកឧត្តមសេនីយត្រី នាង សុភារ៉ា មេបញ្ជាការតំបន់ប្រតិបត្តិការសឹករងតាកែវ លោកមេបញ្ជាការរងកងរាជអាវុធហត្ថខេត្ត លោកស្នងការរងនគរបាលខេត្ត ព្រមទាំងថ្នាក់ដឹកនាំរដ្ឋបាលខេត្តតាកែវ ជាច្រើនរូបផងដែរ។
បើតាមការបញ្ជាក់ពី លោកឧត្តមសេនីយ៍ត្រី នាង សុភារ៉ា មេបញ្ជាការតំបន់ប្រតិបត្តិការសឹករងតាកែវ ការរៀបចំបាញ់គ្រាប់ពិតនេះ គឺតំបន់សឹករងតាកែវ បានសហការជាមួយ ការិយាល័យហ្វឹកហ្វឺនយោធភូមិភាគទី៣ បានបើកវគ្គហ្វឹកហ្វឺនបំប៉នពង្រឹងសមត្ថភាពយោធាឆ្នាំ ២០២២ ដល់សិក្ខាកាមចំនួន ៨០នាក់ របស់តំបន់ប្រតិបត្តិការសឹករងតាកែវ មានរយះពេល ៣ខែ និងប្រើប្រាស់ប្រភេទអាវុធ PKMS និងអាវុធ AK47 ។
ឯកឧត្តម អ៊ូច ភា អភិបាលខេត្តតាកែវ បានថ្លែងការកោតសរសើរចំពោះ តំបន់ប្រតិបត្តិការសឹករងខេត្តតាកែវ ដែលបានរៀបចំ ហ្វឹកហ្វឺននេះ ដើម្បីបង្កើនចំណេះថ្មីៗបន្ថែមទៀត ហើយការបាញ់ស៊ីបគ្រាប់ពិតរបស់យើងទទួលបានលទ្ធផលល្អ បាញ់ចំគោលដៅ ដែលមានចំងាយ ១០០ម៉ែត្រ ពិតជាមានសារសំខាន់សម្រាប់យោធិនរបស់យើង សព្វថ្ងៃនេះប្រទេសយើងមានសុខសន្តិភាពពេញលេញ ក្រោមការដឹកនាំរបស់រាជរដ្ឋាភិបាលកម្ពុជាមាន សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ក៏ប៉ុន្តែកម្លំាងយោធារបស់យើងត្រូវតែមានភាពរឹងមាំ ដើម្បីបន្តការពារបុព្វហេតុជាតិមាតុភូមិរបស់យើង ប្រទេសយើងមានសុខសន្តិភាពមិនអាចបំភ្លេចចោលកាតព្វកិច្ចយោធា។
មានប្រសាសន៍នាឱកាសនោះដែរ ឯកឧត្តម ឧត្តមសេនីយ៍ឯក យឿង សុខុន មេបញ្ជាការរងទ័ពជើងគោក មេបញ្ជាការយោធភូមិភាគទី៣ បានបន្ថែមថា ចំពោះវគ្គហ្វឹកហ្វឺននេះ គឺបានផ្ដល់នូវការយល់ដឹង និងបទពិសោធន៍ល្អៗ ដែលអាចធានាបានអំពីសមត្ថភាព ជំនាញ វិជ្ជាជីវៈរបស់យោធិនយើងបានល្អបន្ថែមទៀត ទាំងក្នុងការងារប្រយុទ្ធ និងត្រៀមប្រយុទ្ធ ដោយដើរទន្ទឹមគ្នានឹងការងារអប់រំចិត្តសាស្ត្រ ដល់យោធិនគ្រប់រូបឲ្យមានមនសិការ វិជ្ជាជីវៈគោរពច្បាប់វិន័យកងទ័ព ជាពិសេសបំពេញភារកិច្ចតួនាទីរបស់ខ្លួនបម្រើជាតិមាតុភូមិ ដោយស្មោះត្រង់ដាច់ខាតចំពោះ ជាតិ សាសនា ព្រះមហាក្សត្រ ក៏ដូចជា ការធានានូវការអនុវត្តយ៉ាងម៉ឺងម៉ាត់នូវបទបញ្ជារបស់រាជរដ្ឋាភិបាល ក្រសួងការពារជាតិ អគ្គបញ្ជាការ បញ្ជាការដ្ឋានកងទ័ពជើងគោក៕
