អាវុធហត្ថខេត្តបន្ទាយមានជ័យ បញ្ជូនជនសង្ស័យម្នាក់ ករណី ក្លែងបន្លំហ្វេសប៊ុក ឆបោក ទៅសាលាដំបូងខេត្ត
ភ្នំពេញ៖ កងរាជអាវុធហត្ថ ខេត្តបន្ទាយមានជ័យ បញ្ជូនជនសង្ស័យម្នាក់ ករណី ក្លែងបន្លំហ្វេសប៊ុក ឆបោក និងនាំយកចេញដោយមិនស្របច្បាប់មានគោលដៅ ទៅសាលាដំបូងខេត្ត ចាត់ការតាមនីតិវិធីជនសង្ស័យត្រូវបាន កម្លាំងការិយាល័យជំនាញ កងរាជអាវុធហត្ថខេត្តរៀបចំសំណុំរឿងពីបទនាំយកចេញដោយមិនស្របច្បាប់មានគោលដៅ បញ្ជូនទៅសាលាដំបូងខេត្ត ហើយ នៅថ្ងៃ ទី២៨ ខែមករា ឆ្នាំ ២០២៣ ដើម្បីចាត់ការតាមនិតិវិធី។
លោកវរសេនីយ៍ទោ ព្រហ្ម ថេង ប្រធានមន្ទីរស្រាជ្រាវ និងបង្ក្រាបបទល្មើស កងរាជអាវុធហត្ថ ខេត្តបន្ទាយមានជ័យ បានឱ្យដឹងថា ជនសង្ស័យ ឈ្មោះ ហួត កើ ភេទប្រុស អាយុ៤៥ឆ្នាំ ជនជាតិខ្មែរចាម សញ្ជាតិខ្មែរ មុខរបរជាងធ្មេញ បច្ចុប្បន្ន ស្នាក់នៅបណ្តោះអាសន្នភូមិតាជ្រឹង ឃុំចង្ហា ស្រុកអូរជ្រៅ ខេត្តបន្ទាយមានជ័យ ។ វត្ថុតាង ចាប់បានរួមមាន ៖ ម៉ូតូ ហុងដា សេរីឆ្នាំ២០០៥ ពាក់ស្លាកលេខ ភ្នំពេញ 1K-5715 មួយគ្រឿង , ទូរស័ព្ទ ដៃ២គ្រឿង ។
លោកវរសេនីយ៍ទោ ព្រហ្ម ថេង បានបញ្ជាក់ថា ដោយមានកិច្ចសហការពីបងប្រុសរបស់ក្មេងស្រីរងគ្រោះនៅថ្ងៃទី២៧ ខែមករា ឆ្នាំ ២០២៣ ជននេះត្រូវបានកម្លាំងការិយាល័យប្រឆាំងការជួញដូរមនុស្ស កងរាជអាវុធខេត្តបន្ទាយមានជ័យ ឃាត់ខ្លួន ក្នុងករណី ក្លែងបន្លំហ្វេសប៊ុក ឆបោក និងនាំយកចេញដោយមិនស្របច្បាប់មានគោលដៅ ប្រព្រឹត្ត កាលពីវេលាម៉ោង០៩និង៥០នាទីយប់ ថ្ងៃទី២៦ ខែមករា ឆ្នាំ២០២៣ នៅចំណុចបេនឡានក្រុងសិរីសោភ័ណ ស្ថិតនៅភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ។
ការឃាត់ខ្លួនជនសង្ស័យខាងលើផ្អែកលើពាក្យបណ្ដឹងរបស់ឈ្មោះ ជា ភក្តី ភេទប្រុស អាយុ២៤ឆ្នាំ រស់នៅភូមិតាង៉ែន ឃុំតាគ្រាម ស្រុកបាណន់ ខេត្តបាត់ដំបង ករណីបាត់ប្អូនស្រីឈ្មោះ ជ.ស្រ.ប អាយុ១៧ឆ្នាំ រស់នៅភូមិភ្នំរន្ទះ ឃុំអង្គប្រាសាទ ស្រុកគិរីវង់ ខេត្តតាកែវ។
លោកវរសេនីយ៍ទោ ព្រហ្ម ថេង បានឱ្យដឹងថា ការបង្ក្រាបករណីខាងលើនេះ ក៏ទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពីឯកឧត្តម កើត វណ្ណារ៉េត ព្រះរាជអាជ្ញា អមសាលាដំបូងខេត្តផងដែរ ។
ក្រោយឃាត់ខ្លួន និងសួរចម្លើយ ជនសង្ស័យ បានសារ ភាពថា រូបខ្លួនពិតជាបានប្រើប្រាស់ គណនីហ្វេសប៊ុកក្លែងក្លាយ ឆបោកជនរងគ្រោះ ក្នុងចេតនាមិនល្អលើក្មេងស្រីរងគ្រោះខាងលើពិតប្រាកដមែន៕
