សម្តេចតេជោ ហ៊ុន សែន គាំទ្រការបកស្រាយរបស់ឯកឧត្ដម ស សុខា ជុំវិញរឿងបុរសលើកម៉ូតូ ករណីគ្រោះថ្នាក់ចរាចរណ៍ លើស្ពានជ្រោយចង្វារ

ភ្នំពេញ៖ នាយករដ្ឋមន្ត្រីកម្ពុជាសម្តេចតេជោ ហ៊ុន សែន បានគាំទ្រចំពោះការបកស្រាយ និងពន្យល់របស់ ឯកឧត្ដម ស សុខា ជុំវិញរឿងបុរសម្នាក់ ជួយលើកម៉ូតូជនរងគ្រោះ ករណីគ្រោះថ្នាក់ចរាចរណ៍ លើស្ពានជ្រោយចង្វារ។

យោងតាមការខមិនពីគណនីហ្វេសប៊ុកឈ្មោះ “Hun Sen” របស់សម្តេចតេជោ នាយករដ្ឋមន្រ្តី កាលពីយប់ ថ្ងៃទី២៤ ខែមករា ឆ្នាំ២០២៣ សម្ដេចបានលើកឡើងថា “គាំទ្រការបកស្រាយ និងពន្យល់របស់ក្មួយ ស សុខា ។ ត្រូវជួយគ្នា ជាមុន ទើបបញ្ចៀសបាននូវបញ្ហាកាន់តែធំ ។ ខ្ញុំសូមអរគុណ និងកោតសរសើរ ចំពោះអ្នកបានជួយ ដែលនេះជាវប្បធម៌ដ៏ល្អ នៃជាតិសាសន៍របស់យើង”។

ការខមិនរបស់សម្តេចតេជោ ខាងលើនេះ ធ្វើឡើងបន្ទាប់ពីឯកឧត្ដម ស សុខា បានបង្ហោះ សារជុំវិញរឿងបុរសម្នាក់ ដែលជួយលើកម៉ូតូជនរងគ្រោះ ក្នុងករណីគ្រោះថ្នាក់ចរាចរណ៍ លើស្ពានជ្រោយចង្វារ កាលពីពេលថ្មីៗកន្លងទៅនេះ ។

សូមជម្រាបជូនថា ជុំវិញរឿងរ៉ាវបុរសម្នាក់ ដែលជួយលើកម៉ូតូជនរងគ្រោះ ក្នុងករណីគ្រោះ ថ្នាក់ចរាចរណ៍ លើស្ពានជ្រោយចង្វារ ចុងក្រោយ បែរជាត្រូវអ្នកសារព័ត៌មាន សួរដេញដោល និងស្តីបន្ទោសបុរសម្នាក់នោះ បានក្លាយជាប្រធានបទដ៏កក្រើក សម្រាប់អ្នកលេងបណ្តាញសង្គម៕