កងកម្លាំងដឹកជញ្ជូន កងពលតូចថ្មើរជើងលេខ៤២ យោធភូមិភាគទី៤ ចុះជួយដឹកជញ្ជូន សម្ភារៈ និងគ្រឿងផ្ទះពលរដ្ឋ ដែលស្ម័គ្រចិត្តផ្លាស់ប្តូរទីលំនៅ ចេញពីតំបន់អង្គរ ទៅរស់នៅតំបន់រុនតាឯក
ភ្នំពេញ៖ នាថ្ងៃទី២៤ ខែមករា ឆ្នាំ២០២៣ យោងតាមប្រសាសន៍ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឧត្តមសេនីយ៍ទោ ប៉ែន វ៉ូយ មេបញ្ជាការ កងពលតូចថ្មើរជើងលេខ ៤២ យោធភូមិភាគទី៤ បានដាក់បទបញ្ជាយ៉ាងម៉ឺងមាត់ ដល់កងកម្លាំងដឹកជញ្ជូន និងកងកម្លាំងអន្តរាគមន៍ចំណុះកងពល បានជួយដឹកជញ្ជូន លើកដាក់គ្រឿងផ្ទះ និង សម្ភារៈផ្សេងៗ ជូនប្រជាពលរដ្ឋដែលមានទីលំនៅក្នុងភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប ដែលបានស្ម័គ្រចិត្តចាកចេញពីតំបន់រមនីយដ្ឋានអង្គរ ទៅរស់នៅតំបន់អភិវឌ្ឍន៍ថ្មីរុនតាឯក។
ក្រោមការដឹកនាំបញ្ជាផ្ទាល់របស់លោក វរសេនីយ៍ឯក លីវ សារី សេនាធិការរងកងពលតូចថ្មើរជើងលេខ ៤២ ដឹកនាំកម្លាំងសរុបចំនួន ៦០នាក់ និង រថយន្តចំនួន ០៣ គ្រឿង បានយកចិត្តទុកដាក់ខ្ពស់ក្នុងការចុះជួយដឹកជញ្ជូន លើកដាក់គ្រឿងផ្ទះ និង សម្ភារៈផ្សេងៗរបស់ប្រជាពលរដ្ឋ និង សហការយ៉ាងជិតស្និត ជាមួយអាជ្ញាធរមូលដ្ឋានដែលមានការពាក់ព័ន្ធបានយ៉ាងល្អ ។
លោកមេបញ្ជារការកងពលតូចថ្មើរជើងលេខ៤២ បានដាស់តឿនដល់កងកម្លាំងរបស់កងពលទាំងអស់ ត្រូវខិតខំយកចិត្តទុកដាក់ សហការអោយបានជិតស្និតជាមួយប្រជាពលរដ្ឋ អាជ្ញារធរដែនដី និងសមត្ថកិច្ចដែលមានការពាក់ព័ន្ធ ត្រូវអនុវត្តផែនការអោយបាន ១០០% តាមប្រសាសន៍របស់ សម្តេចអគ្គមហាសេនាបតីតេជោ ហ៊ុន សែន នាយរដ្ឋមន្ត្រីនៃព្រះរាជាណាចក្រកម្ពុជា ៕
