អំណោយថវិកា និងសម្ភារៈមួយចំនួនរបស់ឧត្តមសេនីយ៍ឯក ហ៊ុន ម៉ាណែត ត្រូវបានផ្ដល់ជូនកីឡាករកីឡាការិនី ក្លឹបកីឡាវាយសី បញ្ជាការដ្ឋានការពារអាកាស កងទ័ពជើងគោក
ភ្នំពេញ៖ នៅថ្ងៃទី២២ ខែមករា ឆ្នាំ២០២៣ ក្លឹបកីឡាវាយសីបញ្ជាការដ្ឋានការពាក់អាកាសកងទ័ពជើងគោក ក្រោមអធិបតីភាពដ៏ខ្ពង់ខ្ពស់ ឯកឧត្តម ឧត្តមសេនីយ៍ទោ សុខ ប៉ាង នាយសេនាធិការរងកងទ័ពជើងគោក មេបញ្ជាការបញ្ជាការដ្ឋានការពារអាកាស ក្រុមការងារគណៈកម្មការប្រតិបត្តិសហព័ន្ធកីឡាវាយសីកម្ពុជា និងជាប្រធានកិត្តិយសក្លឹបកីឡាវាយសីបញ្ជាការដ្ឋានការពារអាកាសកងទ័ពជើងគោក បានប្រារព្ធធ្វើពិធីចែកអំណោយថវិកា និងសម្ភារៈមួយចំនួនរបស់ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរៈភូមិន្ទ មេបញ្ជាការកងទ័ពជើងគោក ជូនកីឡាករកីឡាការិនីម្ចាស់មេដាយចំនួន១៥រូប ក្នុងនោះរួមមានមេដាយមាសចំនួន១១គ្រឿង មេដាយប្រាក់ចំនួន១១គ្រឿង និងមេដាយសំរិទ្ទចំនួន១០គ្រឿង សរុបមេដាយរួមចំនួន៣២ គ្រឿង ដែលទទួលបានពីការចូលរួមប្រកួតនៅគ្រប់ព្រឹត្តិការណ៍របស់សហព័ន្ធកីឡាវាយសីកម្ពុជា និងផ្ដល់ជូនថវិកា និងសម្ភារៈលើកទឹកចិត្តដល់គ្រប់កីឡាករកីឡាការិនីទាំងអស់ក្នុងក្លឹបនោះផងដែរទោះពុំទទួលបានមេដាយក៏ដោយ។
នៅក្នុងពិធីនោះផងដែរឧត្តមសេនីយ៍ទោ សុខ ប៉ាង បានថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំកងទ័ពជើងគោក ជាពិសេសឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក តែងតែគិតគូរយកចិត្តទុកដាក់គ្រប់កាលៈទេសៈជូនគ្រប់កងឯកភាពក៏ដូចជាកងយោធពលខេមរៈភូមិន្ទ ទាំងស្មារតី និងសម្ភារៈសំដៅជួយទ្រទ្រង់ដល់កងកម្លាំងប្រដាប់អាវុធឲ្យសម្រេចបានជោគជ័យរាល់ភារកិច្ច ជាពិសេសវិស័យកីឡាជាតិឯកឧត្តមតែងតែជម្រុញឲ្យចូលរួមហ្វឹកហាត់ដើម្បីពង្រឹងសមត្ថភាព និងកម្លាំងកាយសម្បទាឲ្យបានមាំមួនដើម្បីឈានចូលរួមប្រកួតក្នុងព្រឹត្តិការណ៍ជាតិអន្តរជាតិទទួលបានជ័យលាភីល្អប្រសើរជូនជាតិមាតុភូមិ។
ដោយឡែកក្លឹបកីឡាវាយសីរបស់បញ្ជាការដ្ឋានការពារអាកាសកងទ័ពជើងគោក ក៏ឯកឧត្តមតែងតែជួយឧបត្ថម្ភថវិកា និងសម្ភារៈបានមួយចំនួនធំផងដែរដើម្បីទ្រទ្រង់ឲ្យក្លឹបមានលទ្ធភាពបន្តហ្វឹកហាត់បានមកទល់សព្វថ្ងៃនេះ ជាក់ស្ដែងដូចជាអំណោយដ៏ថ្លៃថ្លាមានថវិកា និងសម្ភារៈក្នុងថ្ងៃនេះគឺបានមកពីទឹកចិត្តសប្បុរសរបស់ឯកឧត្តមមេបញ្ជាការកងទ័ពជើងគោកក្នុងការគិតគូរលើកទឹកចិត្តដល់ប្អូនៗកីឡាករកីឡាការិនីម្ចាស់មេដាយទាំងអស់ក៏ដូចជាក្រុមកីឡាទាំងមូលផងដែរ។
ឯកឧត្តម សុខ ប៉ាង បានសំដែងនូវការកោតសរសើរខ្ពស់ចំពោះម្ចាស់មេដាយទាំងអស់ដែលទទួលបានពីព្រឹត្តិការណ៍ប្រកួតរបស់សហព័ន្ធកីឡាវាយសីកម្ពុជា ហើយឯកឧត្តមបានផ្ដាំផ្ញើដល់ប្អូនៗកីឡាករកីឡាការិនីគ្រូបង្វឹកទាំងអស់ ឲ្យបន្តខិតខំយកចិត្តទុកដាក់ហ្វឹកហាត់ឱ្យអស់ពីលទ្ធភាពជម្រុញការងារគ្រប់គ្រងកម្រិតបច្ចេកទេស ហ្វឹកហាត់បន្សំភាពហត់ឲ្យបានខ្លាំងក្លាដើម្បីធានាកម្លាំងសុះនៅពេលប្រកួតជាក់ស្ដែងមានថាមពលខ្ពស់រឹងមាំ ឯកឧត្តមបានបញ្ជាក់ថាកីឡានាំមកនៅសុខភាព មិត្តភាព និងការអភិវឌ្ឍជាពិសេសជាសឆ្ងាយអំពីការប្រើប្រាស់គ្រឿងញៀន ។
ជាចុងក្រោយឯកឧត្តម ឧត្តមសេនីយ៍ទោ សុខ ប៉ាង នាយសេនាធិការរងកងទ័ពជើងគោក មេបញ្ជាការបញ្ជាការដ្ឋានការពារអាកាសក្នុងនាមក្រុមការងារគណៈកម្មការប្រតិបត្តិសហព័ន្ធកីឡាវាសីកម្ពុជា និងជាប្រធានកិត្តិយសក្លឹបកីឡាវាយសីបញ្ជាការដ្ឋានការពារអាកាសកងទ័ពជើងគោក សូមសម្ដែងនូវការអរគុណយ៉ាងជ្រាលជ្រៅចំពោះ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការងនៃកងយោធពលខេមរៈភូមិន្ទ មេបញ្ជាការកងទ័ពជើងគោក និងសូមគោរពជូនពរឯកឧត្តមមេបញ្ជាការ និងលោកជំទាវព្រមទាំងបុត្រាបុត្រី សូមឱ្យមានសុខភាពល្អកម្លាំងខ្លាំងក្លាប្រាជ្ញាឈ្លាសវៃ ដើម្បីដឹកនាំការអភិវឌ្ឍន៍ជាតិឱ្យមានការរីកចម្រើនលើគ្រប់វិស័យ៕
