ថ្នាក់ដឹកនាំ និងមន្រ្តីរាជការនៃអគ្គនាយកដ្ឋាន ក.ប.ប ចូលរួមពិធីសម្បថដើម្បីបំពេញមុខងារ ជានគរបាលយុត្តិធម៌
ភ្នំពេញ៖ ថ្នាក់ដឹកនាំ និងមន្រ្តីរាជការនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» ចំនួន ១៦៥រូប សម្រាប់ថ្នាក់កណ្ដាល និងសាខា ក.ប.ប. រាជធានីភ្នំពេញ នៅថ្ងៃទី១៧ ខែមករា ឆ្នាំ២០២៣ បានអញ្ជើញចូលរួមក្នុងពិធីសម្បថដើម្បីបំពេញមុខងារជានគរបាលយុត្តិធម៌ ក្រោមច្បាប់ស្ដីពីសុវត្ថិភាពម្ហូបអាហារ ស្របតាមមាត្រា៨២ នៃក្រមនីតិវិធីព្រហ្មទណ្ឌ។
យោងតាមមាត្រា២៣ នៃច្បាប់ស្ដីពីសុវត្ថិភាពម្ហូបអាហារបញ្ជាក់ថា មន្រ្តីអធិការកិច្ចម្ហូបអាហារត្រូវទទួលនីតិសម្បទាជានគរបាលយុត្តិធម៌ឱ្យពិនិត្យបទល្មើសដែលមានចែងក្នុងច្បាប់នេះស្របតាមបទប្បញ្ញត្តិនៃក្រមនីតិព្រហ្មទណ្ឌ។ ដោយអនុលោមតាមប្រកាសអន្តរក្រសួង រវាងក្រសួងយុត្តិធម៌ និងក្រសួងពាណិជ្ជកម្ម លេខ១៩៧ កយ.ប្រក/២២ ចុះថ្ងៃទី១៩ ខែធ្នូ ឆ្នាំ២០២២ បានសម្រេចផ្ដល់នីតិសម្បទាជានគរបាលយុត្តិធម៌ ដល់មន្រ្តីអធិការកិច្ចម្ហូបអាហារនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» របស់ក្រសួងពាណិជ្ជកម្ម ចំនួន ៤០៦ រូប។
សូមរំលឹកដែរថា ច្បាប់ស្ដីពីសុវត្ថិភាពម្ហូបអាហារ ត្រូវបានព្រះមហាក្សត្រនៃព្រះរាជាណាចក្រកម្ពុជា ទ្រង់ឡាយព្រះហស្តលេខា ប្រកាសឱ្យប្រើកាលពីថ្ងៃទី៨ ខែមិថុនា ឆ្នាំ២០២២ កន្លងទៅ។
