លោក អ៊ុង ក្រពុំផ្កា គឺជាអតីតនាយកសាកលវិទ្យាល័យ ភូមិន្ទបច្ចេកទេសភ្នំពេញ កើតនៅ: ថ្ងៃទី ៦ មិថុនា គ.ស. ១៩២៤ នៅ តាខ្មៅ ខេត្តកណ្តាល ឪពុកនាម : អ៊ុង កែវ ម្តាយនាម : គឹម ស៊ុម។
លោកជាអតីតសិស្សនៃ អនុវិទ្យាល័យ ព្រះស៊ីសុវត្ថិ និងបានបន្តការសិក្សានៅទីក្រុង ហាណូយ ព្រមទាំងបានទទួល សញ្ញាប័ត្រ ផ្នែកវិស្វករ ខាងសាធារណៈការ ។ ពេលដែលត្រឡប់ចូល មកកម្ពុជាវិញ លោកបានរៀបអាពាហ៍ពិពាហ៍ជាមួយ នាង ផ្លែក សូណារ៉េត ដែលត្រូវជាប្អូនស្រីបង្កើត របស់លោកស្រីផ្លែក ភិរុណ ប្រធានកាកបាទក្រហមកម្ពុជា។
ជាមួយនឹង នាង ផ្លែក សូណារ៉េត លោកអ៊ុង ក្រពុំផ្កា មានបុត្រ ៦ នាក់ ក្នុងនោះរួមមានប្រុស ៣នាក់ និងស្រី ៣នាក់ ដែលសព្វថ្ងៃ រស់នៅស្រុកបារាំង ។
លោក អ៊ុង ក្រពុំផ្កា បានត្រូវតែងតាំងជា វិស្វកររង ថ្នាក់ទី ១ នៅភ្នំពេញ។ លោកមានតួនាទីជា អ្នករាយការណ៍ ផ្នែក សាធារណៈការ និងទូរគមនាគមន៍ នៃគណៈកម្មការអនុវត្តន៍ សន្ធិសញ្ញា បារាំង-ខ្មែរ ឆ្នាំ ១៩៥០ ។ បន្ទាប់មក លោកត្រូវបានឡើងជា នាយកផ្នែករងកម្មន្ត និង អាគារស៊ីវិល នៅឆ្នាំ ១៩៥៥ ។ ក្នុងឋានៈជានាយក លោក អ៊ុង ក្រពុំផ្កា ពិនិត្យត្រួតត្រាលើ សាធារណៈការសំខាន់ៗ នៅទីក្រុងភ្នំពេញ ។ លោកក៏ជា ស្ថាបត្យករ (ARCHITECTE) ធ្វើមកុដ សម្រាប់ព្រះមហាក្សត្រ ផងដែរ។
នៅឆ្នាំ ១៩៥៦ លោកបានចូលជាសមាជិក “សង្គមរាស្រ្តនិយម” ដែលមាន សម្តេច នរោត្តម សីហនុ ជាព្រះប្រធាន ។ ក្រោយមកលោកត្រូវបានតែងតាំងជា អនុរដ្ឋលេខាធិការ សុខាភិបាលសាធារណៈ និង សង្គមកិច្ច របស់រដ្ឋាភិបាល ឯកឧត្តម សាន យន់ (៣ មករា ១៩៥៧-៩ មេសា ១៩៥៧) ។
លោក អ៊ុង ក្រពុំផ្កា បានចូលរួមជាច្រើនលើក ក្នុងមុខងារជា សមាជិកនៃរដ្ឋាភិបាល សង្គមរាស្រ្តនិយម ដែលមានដូចខាងក្រោម ៖
១. អនុរដ្ឋលេខាធិការ សាធារណៈការ និង ទូរគមនាគមន៍ ទទួលភារៈ ប៉ុស្តិ៍ ទូរលេខទូរស័ព្ទ នៃរដ្ឋាភិបាល សម្តេច ប៉ែន នុត ( ២១ មករា-២៩ មេសា ១៩៥៨) ។
២. រដ្ឋលេខាធិការ សាធារណៈការ និងទូរគមនាគមន៍ នៃរដ្ឋាភិបាលឯកឧត្តម ផូ ព្រឿង ( ១៩ មេសា ១៩៦០ ដល់ ២៨ មីនា ១៩៦១)។
៣. រដ្ឋមន្រ្តី ក្រសួងឧស្សាហកម្ម, សាធារណៈការ និង ទូរគមនាគមន៍ នៃរដ្ឋាភិបាល សម្តេចព្រះប្រមុខរដ្ឋ នរោត្តម សីហនុ ( ១៧ វិច្ឆិកា ១៩៦១ ដល់ ៦ សីហា ១៩៦២)។
៤. អនុរដ្ឋលេខាធិការ សាធារណៈការ និង ទូរគមនាគមន៍ ទទួលបន្ទុក ប៉ុស្តិ៍ ទូរគមនាគមន៍ នៃរដ្ឋាភិបាលព្រះអង្គម្ចាស់ នរោត្តម កន្តុល (៦ តុលា ១៩៦២ ដល់ ៦ ធ្នូ ១៩៦៤)។
៥. រដ្ឋមន្រ្តី ឧស្សាហកម្ម និងទូរគមនាគមន៍ នៃរដ្ឋាភិបាល នរោត្តម កន្តុល ( ២៥ ធ្នូ ១៩៦៤ ដល់ ៧ ឧសភា ១៩៦៥)។
៦. រដ្ឋមន្រ្តី សាធារណៈការ និង សិល្បៈស្ថាបនាជនបទ នៃ “រដ្ឋាភិបាលស្រោចស្រង់” របស់លោកសេនាប្រមុខ លន់ នល់ (១៤ សីហា ១៩៦៩ ដល់ ១៨ មីនា ១៩៧០)។
– ពីឆ្នាំ ១៩៧២ ដល់ ១៩៧៥ លោកត្រូវបានតែងតាំងជា ប្រធានអគ្គនាយក ក្រុមហ៊ុន អាកាសចរ AIR CAMBODGE ដែលមានទំនាក់ទំនងពាណិជ្ជកម្មជាមួយ AIR FRANCE និង UTA។
– នៅឆ្នាំ ១៩៦០ លោកបានត្រូវតែងតាំងជា នាយក សាកលវិទ្យាល័យ ភូមិន្ទបច្ចេកទេសភ្នំពេញ និង ជាអភិបាល មហាវិទ្យាល័យ ស្ថាបត្យកម្ម និង សាកលវិទ្យាល័យ វិចិត្រសិល្បៈ ក្នុងឋានៈជា រដ្ឋមន្រ្តី ក្រសួងឧស្សាហកម្ម សាធារណៈការ និងទូរគមនាគមន៍ ។
– នៅឆ្នាំ ១៩៦១ លោក អ៊ុង ក្រពុំផ្កា បានទុកសមិទ្ធិជាច្រើន ដល់កម្ពុជាដែលមានដូចជា ៖
~ បង្កើតទីភ្នាក់ងារ ប៉ុស្តិ៍ប្រៃសណីយ៍ ៧កន្លែង នៅភ្នំពេញ
~ បង្កើតសម្ព័ន្ធការវិទ្យុ ទូរស័ព្ទ (liai son radio telephonique) ផ្ទាល់ រវាងកម្ពុជា-បារាំង (១៣ មករា ១៩៦១)
~ ចាប់ផ្តើមការដ្ឋានសាងសង់ ស្ពាន លើដៃទន្លេសាប រៀបជួសជួលផ្លូវពី ភ្នំក្រវាញ ទៅឆ្លូងលើ
~ រៀបចំធ្វើផ្លូវរទេះភ្លើង ភ្នំពេញ-ព្រះសីហនុ (ការដ្ឋាននេះ មានការចូលរួមពីអ្នកស័្មគ្រចិត្តរួមគ្នា ទាំងមន្រ្តី ទាំងរាស្រ្ត)។
+ ដោយសារ គុណសម្បត្តិក្នុងការងារ លោក អ៊ុង ក្រពុំផ្កា បានទទួលគ្រឿងឥស្សរិយយស LEGION D’HONNEUR ។
– នៅខែកញ្ញា ១៩៦៦ លោកត្រូវបានតែងតាំង ជា “រាជប្រតិភូ សម្រាប់ទស្សនកិច្ច ឧត្តមសេនីយ ដឺហ្គោល”។
– ចំណែកឯស្នាដៃរបស់លោក មានដូចជា៖ផ្ទះសំណាក់ និង សាកលវិទ្យាល័យបាត់ដំបង, ស្ថានីយរថភ្លើង កំពត និង ភូមិគ្រឹះ គន្ធបុប្ផា(ព្រឹទ្ធសភាសព្វថ្ងៃ) ។
– លោក អ៊ុង ក្រពុំផ្កា បានបាត់ខ្លួននៅក្នុងរបបខ្មែរក្រហម ឆ្នាំ ១៩៧៥ ៕
ប្រភពៈ មន្ទីរទេសចរណ៍ខេត្តបាត់ដំបង
