វរសេនីយ៍ឯក ស៊ឹម សំអៀត ដឹកនាំក្រុមការចុះត្រួតពិនិត្យការដ្ឋាន របស់កងអនុសេនាតូចសំណង់ផ្តេក៣ បានកែសម្រួលផ្លូវ ២៨គីឡូម៉ែត្រ ក្នុងចំណោមចម្ងាយផ្លូវ ៣៩៨គីឡូម៉ែត្រ
អាហ្វ្រិកកណ្តាល៖ នៅថ្ងៃទី៣១ ខែធ្នូរឆ្នាំ២០២២ វរសេនីយ៍ទោ ឡាំ ទេពមេបញ្ជាការ រងកងអនុសេនាធំសំណង់វិស្វកម្ម លេខ៤៣២ ក្នុងបេសកកម្មអង្គការសហប្រជាជាតិនៅសាធារណរដ្ឋអាហ្វ្រិកកណ្តាល បានឱ្យដឹងថា រយៈពេល២ថ្ងៃ ពីថ្ងៃទី២៩ដល់ថ្ងៃទី៣០ ខែធ្នូរ ឆ្នាំ២០២២ លោក វរសេនីយ៍ឯក ស៊ឹម សំអៀត មេបញ្ជាការ កងអនុសេនាធំវិស្វកម្មសំណង់លេខ៤៣២ បានដឹកនាំក្រុមការ ចុះត្រួតពិនិត្យការដ្ឋានរបស់កងអនុសេនាតូចសំណង់ផ្តេក៣ ដែលបានកែសម្រួលផ្លូវ២៨គ.ម ក្នុងចំណោមចម្ងាយផ្លូវសរុប៣៩៨គីឡូម៉ែត្រ។
លោកថា ការកែសម្រួលផ្លូវជំហ៊ានទីមួយនេះ គឺចាប់ពីចំណុចរង្វង់មូលប្រៀរ(Bria)ទៅកាន់ទន្លេBoungo-1 ដែលមានចម្ងាយ២៨គ.ម សម្រេច បាន៨៥%។
ដោយឡែកនៅថ្ងៃទី២ មេបញ្ជាការកងអនុសេនាធំបានដឹកនាំក្រុមការងារស្រាវជ្រាវ បច្ចេកទេសនិងជំនួយការ ការងារកិច្ចការស៊ីវិលចំនួន១នាក់(Civil Affair) ដើម្បីទៅត្រួតពិនិត្យ និងវាយតម្លៃទៅលើសាឡាង ដែលមានបណ្តោយ១៦.៥០ម នៅក្នុងទន្លេBoungo-1 ។
ការវាយតម្លៃនេះ យើងពិនិត្យឃើញថា កម្រាលឈើខាងលើដែលមានទំហំ(១៦.៥០×៣)ម ខូចទាំងស្រុង យើងនឹងមានគម្រោងជួសជុលដើម្បីដឹកជញ្ជូនគ្រឿងចក្រកែសម្រួលផ្លូវនិងសាងសង់បន្ទាយបណ្តោះអាសន្ន(TOB)ចំនួនពីរ Ouanda-Djalle និង Sam-Ouanja នៅពេលខាងមុខ៕
