កាកបាទក្រហមកម្ពុជា ទទួលជាលើកទី២ នូវវ៉ាក់សាំង SARS-CoV-2 (Sinopharm) ចំនួន ៣០ម៉ឺនដូស ជាអំណោយរបស់សមាគមជាតិកាកបាទក្រហមចិន

ភ្នំពេញ៖ កាកបាទក្រហមកម្ពុជា ដែលមាន ហ្លួងម៉ែ នរោត្តម មុនិនាថ សីហនុ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានទទួលជាលើកទី២ នូវវ៉ាក់សាំង SARS-CoV-2 (Sinopharm) ចំនួន ៣០ម៉ឺនដូស ជាអំណោយរបស់សមាគមជាតិកាកបាទក្រហមចិន។ វ៉ាក់សាំងទាំងនេះ ត្រូវបានប្រគល់បន្តជូនក្រសួងសុខាភិបាល ដើម្បីបម្រើការក្នុងយុទ្ធនាការ ចាក់វ៉ាក់សាំងបង្ការជំងឺកូវីដ-១៩ នៅព្រះរាជាណាចក្រកម្ពុជា។

ពិធីប្រគល់-ទទួល បានប្រព្រឹត្តទៅនៅអាកាសយានដ្ឋានអន្តរជាតិភ្នំពេញ នាថ្ងៃព្រហស្បតិ៍ ទី ១៥ ខែធ្នូ ឆ្នាំ២០២២នេះ ក្រោមវត្តមាន លោកជំទាវកិត្តិសង្គហបណ្ឌិត ឃួន សុដារី អនុប្រធានកាកបាទ ក្រហមកម្ពុជា តំណាងដ៏ខ្ពង់ខ្ពស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទ ក្រហមកម្ពុជា និងឯកឧត្តម ឆាំង ជាន (Chang Jian) អគ្គទីប្រឹក្សាស្ថានទូតសាធារណរដ្ឋប្រជាមានិតនិត ប្រចាំព្រះរាជាណាចក្រកម្ពុជា តំណាង ឯកឧត្តម វាំង វិនធាន (Wang Wentian) ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា និងដោយមានការអញ្ជើញចូលរួមពី ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងថ្នាក់ដឹកនាំ-មន្ត្រីក្រសួងសុខាភិបាល ព្រមទាំងថ្នាក់ដឹកនាំ មន្ត្រី និងយុវជនកាកបាទក្រហមកម្ពុជា ផងដែរ។

ក្នុងឱកាសនោះ ឯកឧត្តម ឆាំង ជាន បានមានប្រសាសន៍ថា «ចិននិងកម្ពុជា គឺជាមិត្តដែកថែប និងជាសហគមន៍វាសនារួម ដែលតែងគាំទ្រនិងជួយគ្នាទៅវិញទៅមក។ ចាប់តាំងពីមានការផ្ទុះឡើងនូវជំងឺកូវីដ១៩មក ប្រជាជនចិននិងកម្ពុជាតែងរួមសុខទុក្ខជាមួយគ្នា ជួយគ្នាទៅវិញទៅមក បង្កើតគំរូសម្រាប់កិច្ចសហប្រតិបត្តិការអន្តរជាតិក្នុងការប្រយុទ្ធប្រឆាំងជំងឺកូវីដ-១៩។ យើងមិនអាចបំភ្លេចបានទេ ក្នុងគ្រាដ៏លំបាកបំផុតដែលចិនកំពុងប្រយុទ្ធប្រឆាំងនឹងជំងឺកូវីដ១៩ ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា និង សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ដែលព្រះអង្គទាំងទ្វេបានសព្វព្រះរាជហឫទ័យប្រោស ព្រះរាជទានជំនួយដ៏ថ្លៃថ្លាដល់ ភាគីចិន ហើយ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបំពេញទស្សនកិច្ចនៅប្រទេសចិននៅពេលមានព្រិលធ្លាក់យ៉ាងខ្លាំង បានបង្ហាញពីការគាំទ្រដល់ ប្រជាជនចិនក្នុងការទប់ស្កាត់ជំងឺវីរុសកូវីដ-១៩តាមសកម្មភាពជាក់ស្តែង។

ឯកឧត្តម បានបញ្ជាក់ផងដែរថា យើងមានសេចក្តីសោមនស្សរីករាយដែលបានឃើញថា ក្រោមការដឹកនាំដ៏ឈ្លាសវៃរបស់សម្តេចតេជោ កម្ពុជាសម្រេចបានសមិទ្ធផលគួរឱ្យកត់សម្គាល់ក្នុងការ ប្រយុទ្ធប្រឆាំងនឹងជំងឺកូវីដ-១៩ ហើយសេដ្ឋកិច្ចសង្គមក៏កំពុងតែអភិវឌ្ឍន៍ឡើងវិញជាបន្ដបន្ទាប់ ទទួលបានការកោតសរសើរពីប្រជាជនកម្ពុជានិងសហគមន៍អន្តរជាតិ។ កាកបាទក្រហមចិន និងកាកបាទក្រហមកម្ពុជារក្សាទំនាក់ទំនងកិច្ចសហប្រតិបត្តិការយ៉ាងជិតស្និទ្ធ នៅពេលភាគីម្ខាងណាជួបការលំបាក ភាគីទាំងពីរតែងតែផ្តល់ជំនួយឱ្យគ្នាទៅវិញទៅមក។ ជាមួយគ្នានេះ ឆ្នាំ២០២៣គឺជាខួបអនុស្សាវរីយ៍លើកទី៦៥នៃការបង្កើតទំនាក់ទំនង ការទូតរវាងចិននិងកម្ពុជា និងជា “ឆ្នាំមិត្តភាពចិន-កម្ពុជា”។ ភាគីចិននឹងសហការជាមួយភាគីកម្ពុជា ក្នុងកិច្ចសហប្រតិបត្តិការទប់ស្កាត់ជំងឺ និងការអភិវឌ្ឍ ស្ដារឡើងវិញនូវទំនាក់ទំនងប្រជាជននិងវប្បធម ជាបន្តបន្ទាប់ បង្កើនចំណងមិត្តភាពជាប្រពៃណីរវាងប្រទេសទាំងពីរ ជំរុញការកសាងរួមគ្នានូវសហគមន៍ វាសនារួមរវាងចិន និងកម្ពុជាឱ្យទទួលបានសមិទ្ធផលថ្មីៗ ផ្តល់ផលប្រយោជន៍ជូនដល់ប្រទេសនិង ប្រជាជនទាំងពីរ រួមចំណែកកាន់តែធំធេងដល់សន្តិភាព ស្ថិរភាព និងវិបុលភាពក្នុងតំបន់និងលើ ពិភពលោក។

ថ្លែងក្នុងឱកាសនោះដែរ ក្នុងនាមកាកបាទក្រហមកម្ពុជា ដែលមាន ហ្លួងម៉ែ នរោត្តម មុនិនាថ សីហនុ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន, លោកជំទាវកិត្តិសង្គហបណ្ឌិត ឃួន សុដារី បានថ្លែងដោយក្តីសោមនស្សរីករាយ ដោយបានមកចូលរួមក្នុងពិធីប្រគល់-ទទួល ជាលើកទី២ នូវវ៉ាក់សាំងប្រភេទស៊ីណូហ្វាម ចំនួន ៣០០.០០០ដូស ជាអំណោយរបស់សមាគមជាតិកាកបាទក្រហមចិន ជូនកាកបាទក្រហមកម្ពុជា។

លោកជំទាវកិត្តិសង្គហបណ្ឌិត បានគូសបញ្ជាក់ថា អំណោយជាវ៉ាក់សាំងពីសមាគមជាតិ កាកបាទក្រហមចិន លើកទី១ ចំនួន ១០ម៉ឺនដូស កាលពីថ្ងៃទី ២៣ ខែសីហា ឆ្នាំ២០២១ រួមជាមួយវ៉ាក់សាំង ដែលរាជរដ្ឋាភិបាល បានទទួលជាង ៥៣លានដូស ពីប្រភពនានា ជាពិសេសពីសាធារណរដ្ឋប្រជាមានិតចិន ពិតជាបានរួមចំណែកធ្វើឱ្យកម្ពុជាសម្រេចបាន ជោគជ័យក្នុងសមរភូមិកូវីដ-១៩ តាមយុទ្ធសាស្ត្រផ្ការីកស្រោចវ៉ាក់សាំងពីទីក្រុងដល់ជនបទ គ្រប់គ្រងបានទាំងស្រុងគួរឱ្យកត់សម្គាល់នូវការឆ្លងរាតត្បាតជំងឺកូវីដ-១៩ រហូតបានបើកប្រទេសជាតិ ឡើងវិញក្នុងគ្រប់វិស័យ និងធ្វើឱ្យប្រក្រតីភាពឡើងវិញនូវដំណើរការសេដ្ឋកិច្ចគ្រួសារ សង្គម ព្រមទាំងបាននិងកំពុងជំរុញកំណើនសេដ្ឋកិច្ចជាតិ ដើម្បីបន្តការអភិវឌ្ឍប្រទេស។ ជំនួយមនុស្សធម៌ជាវ៉ាក់សាំងដ៏ប្រពៃថ្លៃថ្លាទាំងអស់ពីគ្រប់មជ្ឈដ្ឋាន ពិតជាពុំអាចកាត់ថ្លៃបានឡើយ ហើយថែមទាំងបានគូសបញ្ជាក់ពីចំណងមិត្តភាព សហប្រតិបត្តិការ និងសាមគ្គីភាពរឹងមាំ ក្នុងស្មារតីជួយគ្នាទៅវិញទៅមកក្នុងគ្រាដ៏សែនលំបាកនៃការដោះស្រាយបញ្ហាប្រឈមជាសកលមួយនេះ។

លោកជំទាវ បានបន្តថាកម្ពុជា បាននិងកំពុងក្រេបជញ្ជក់ផ្លែផ្កាពីជំនួយជាបន្តបន្ទាប់របស់មិត្តចិន មានដូចជា ថវិកាហិរញ្ញប្បទាន ការវិនិយោគ សំណង់ ផ្លូវថ្នល់ ស្ពាន។ល។ និងខាងផ្នែកសុខាភិបាល មានដូចជា មន្ទីរពេទ្យ ឧបករណ៍ សម្ភារវេជ្ជសាស្រ្តជាដើម។ បច្ចុប្បន្ននេះទៀត តាមស្មារតីនៃកិច្ចសន្ទនា សាកលអាស៊ានលើកទី២ «ការស្តារឡើងវិញ គ្រប់ជ្រុងជ្រោយក្រោយវិបត្តិកូវីដ-១៩» កម្ពុជា បន្តខិតខំប្រឹងប្រែងឆ្ពោះទៅអនាគត និង វិបុលភាពរួម ផ្អែកលើបទពិសោធន៍ពីវិបត្តិនៃជំងឺកូវីដ-១៩ និងបន្តកសាងភាពធន់ផ្នែកសង្គម ដោយផ្តោតលើការអភិវឌ្ឍប្រព័ន្ធសុខាភិបាល ការលើកកម្ពស់ សេវាសុខភាពសាធារណៈ និងប្រព័ន្ធការពារសង្គម ទាំងគុណភាព និងវិសាលភាព ដើម្បីត្រៀមខ្លួនឆ្លើយតបទៅនឹងវិបត្តិ ឬហានិភ័យនានា ដែលអាចកើតមានឡើង ជាយថាហេតុ នាពេលអនាគត។

លោកជំទាវកិត្តិសង្គហបណ្ឌិត បានគូសបញ្ជាក់ផងដែរថា «កាកបាទក្រហមកម្ពុជា រួមជាមួយសមាគម ជាតិកាកបាទក្រហមចិន និងសមាគមជាតិនានា នៅក្នុងចលនាកាកបាទក្រហម-អឌ្ឍចន្ទក្រហម ប្តេជ្ញាចិត្តបន្តខិតខំឱ្យបានកាន់តែខ្លាំងក្លាថែមមួយកម្រិតទៀត ក្នុងការបន្តប្រយុទ្ធប្រឆាំងនឹងជំងឺកូវីដ-១៩ ដែលពុំទាន់ទៅណាឆ្ងាយពីយើង រួមជាមួយនឹងការបន្តប្រមូលផ្តុំកម្លាំងមនុស្សធម៌ជាតិ-អន្តរជាតិ ដោះស្រាយបញ្ហាប្រឈមនានា និងក្នុងការកសាងភាពធន់សហគមន៍ និងវិបុលភាព ប្រជាជន តាមរយៈសកម្មភាពនៅមូលដ្ឋាន សម្រេចបានគោលដៅសកល។

ជាមួយគ្នានេះ លោកជំទាវកិត្តិសង្គហបណ្ឌិត បានអំពាវនាវ ដល់បងប្អូនរួមជាតិ សូមបន្តប្រកាន់ខ្ជាប់នូវវិធានការសុខាភិបាល តាមពាក្យស្លោក «ការពារប្រសើរជាងព្យាបាល» និងជាពិសេស សូមបន្តនាំគ្នាទៅចាក់វ៉ាក់សាំងដូសមូលដ្ឋាន និងដូសជំរុញឱ្យបានគ្រប់ៗគ្នា ស្របតាមការប្តេជ្ញាចិត្តរបស់ រាជរដ្ឋាភិបាល ក្នុងការមិនទុកឱ្យមានប្រជាជនណាម្នាក់ មិនបានចាក់វ៉ាក់សាំង នៅពេលដល់វេនរបស់ខ្លួននោះឡើយ ដើម្បីធានាបានសុខុមាលភាពរបស់គ្រួសារនីមួយៗ និងរក្សាបាននូវស្ថិរភាព នៃកំណើនសេដ្ឋកិច្ចក្នុងសុខសន្តិភាព។

លោកជំទាវកិត្តិសង្គហបណ្ឌិត បានថ្លែងអំណរគុណយ៉ាងជ្រាលជ្រៅបំផុតចំពោះ សមាគមជាតិកាកបាទក្រហមចិន ដែលបានផ្តល់អំណោយមនុស្សធម៌ដ៏ថ្លៃថ្លានាពេលនេះ។ កិច្ចសហប្រតិបត្តិការរវាងកាកបាទក្រហមកម្ពុជា និងសមាគមជាតិកាកបាទក្រហមចិន ត្រូវបានរឹតបន្តឹងជាបន្តបន្ទាប់ តាមរយៈការផ្លាស់ប្តូរទស្សនកិច្ចថ្នាក់ដឹកនាំ, ការចុះកិច្ចព្រមព្រៀង សហប្រតិបត្តិការទ្វេភាគីជាដំណាក់កាល, ការផ្តល់អំណោយមនុស្សធម៌ក្នុងពេលមានគ្រោះមហន្តរាយ និងក្នុងដំណាក់កាលកូវីដ-១៩ ដើម្បីកសាងភាពធន់សហគមន៍ និងសូមឱ្យចំណងមិត្តភាព និងកិច្ចសហប្រតិបត្តិការគ្រប់វិស័យនៃប្រទេសយើងទាំងពីរ និងចំណងកិច្ចសហប្រតិបត្តិការ រវាងកាកបាទក្រហមកម្ពុជា និងសមាគមជាតិកាកបាទក្រហមចិន ដែលមានជាយូរលង់មកហើយ កាន់តែរឹងមាំ ឥតប្រែប្រួលជាយូរអង្វែងតរៀងទៅ៕