ភ្នំពេញ៖ ឯកឧត្ដមបណ្ឌិត ទូច វិសាលសុខ រដ្ឋលេខាធិការក្រសួងអប់រំយុវជន និងកីឡា នាថ្ងៃទី១៣ ធ្នូ បានអនុញ្ញាតឱ្យគណៈប្រតិភូក្រសួងអប់រំនៃសាធារណរដ្ឋកូរ៉េ បានចូលជួបសម្ដែងការគួរសម និងសំណេះសំណាល នៅទីស្ដីការក្រសួងអប់រំ យុវជន និងកីឡា ដើម្បីរាយការណ៍ពីសមិទ្ធផល ដែលសម្រេចបាន និងស្នើសុំអនុសាសន៍នានា លើកិច្ចសហប្រតិបត្តិការភាពជាដៃគូ ក្នុងការលើកម្ពស់ការអប់រំបែបឌីជីថលនៅកម្ពុជា ដោយផ្តោតលើវឌ្ឍនភាពការងារបណ្ដុះបណ្ដាលគ្រូបង្រៀនកម្ពុជា និងបានពិភាក្សាសម្រាប់អនុវត្តសកម្មភាពបន្ត ។
ក្នុងដំណើរទស្សនកិច្ច គណៈប្រតិភូក្រសួងអប់រំនៃសាធារណរដ្ឋកូរ៉េ បានជួបប្រជុំពិភាក្សាជាមួយនាយកដ្ឋានជំនាញ និងគ្រឹះស្ថានសាធារណដែលមានគ្រូបង្រៀនធ្លាប់បានចូលរួមវគ្គបណ្ដុះបណ្ដាល នៅទីក្រុងប៊ូសានដោយផ្ទាល់ និងតាមអនឡាញ ដើម្បីស្វែងយល់អំពីការអនុវត្តការប្រើប្រាស់ ICT នៅក្នុងវិស័យអប់រំ ។ ការចុះពិនិត្យសម្ភារៈបច្ចេកទេសព័ត៌មានវិទ្យា នៅតាមគ្រឹះស្ថានសិក្សា ដែលបានផ្ដល់ដោយក្រសួងអប់រំនៃសាធារណរដ្ឋកូរ៉េ សិក្សាតម្រូវការចាំបាច់របស់កម្ពុជាលើផ្នែកបច្ចេកវិទ្យាព័ត៌មានអប់រំ និងការធ្វើបច្ចុប្បន្នភាពកម្មវិធីបណ្ដុះបណ្ដាល ICT ដើម្បីពង្រឹងសមត្ថភាពគ្រូបង្រៀន តាមរយៈការទទួលបានជំនាញបច្ចេកវិទ្យាដ៏ចាំបាច់ នាយុគសម័យសេដ្ឋកិច្ចពិភពលោកដែលផ្អែកលើពុទ្ធិបច្ចុប្បន្ន។
គួររំលឹកផងដែរថា ក្រសួងអប់រំ យុវជន និងកីឡា បានចុះអនុស្សរណៈយោគយល់ជាមួយក្រសួងអប់រំនៃសាធារណរដ្ឋកូរ៉េ ចាប់ពីឆ្នាំ២០០៥ និងបានចុះហត្ថលេខាជាថ្មី ដើម្បីបន្តកិច្ចសហប្រតិបត្តិការលើផ្នែកបច្ចេកវិទ្យាព័ត៌មាន និងសារគមនាគមន៍ (ICT) ក្នុងវិស័យអប់រំ ក្នុងឆ្នាំ២០២១៧ ដែលផ្ដោតសំខាន់លើគោលបំណង៖
– លើកកម្ពស់សមត្ថភាពមន្ត្រីជំនាញ និងគ្រូបង្រៀនកម្ពុជា នៅកម្រិតមធ្យមសិក្សាបឋមភូមិ និងទុតិយភូមិ ឱ្យមាន ចំណេះដឹងលើការប្រើប្រាស់បច្ចេកវិទ្យាព័ត៌មានក្នុងការស្រាវជ្រាវរៀន និងបង្រៀន-រៀន
– ឧបត្ថម្ភនូវបរិក្ខារបច្ចេកទេសផ្នែកព័ត៌មានវិទ្យា និងសម្ភារៈបច្ចេកទេសចាំបាច់នានា ដើម្បីផ្តល់លទ្ធភាពគ្រប់គ្រាន់ ដល់អង្គភាពជំនាញ និងសាលារៀន អាចអនុវត្តនូវការអប់រំបានដោយគុណភាព និងប្រសិទ្ធភាពតាមរយៈ ការប្រើប្រាស់បច្ចេកវិទ្យាព័ត៌មាន
-ផ្លាស់ប្ដូរវប្បធម៌និងបទពិសោធន៍រវាងគា្នទៅវិញទៅមក ដើម្បីពង្រឹងចំណងកិច្ចសហប្រតិបត្តិការនៃភាគីទាំងពីរ ៕
