ឯកឧត្តម ខេង ស៊ុម៖ អាជ្ញាធរនៅមូលដ្ឋានទាំងអស់ ត្រូវខិតខំដោះស្រាយបញ្ហាទំណាស់វិវាទ ក្រៅប្រព័ន្ធតុលាការឲ្យបានសមស្រប និងមានប្រសិទ្ធភាព
ភ្នំពេញ៖ ឯកឧត្តម ខេង ស៊ុម ប្រធានក្រុមប្រឹក្សាខេត្តបន្ទាយមានជ័យ បានលើកឡើងថា អាជ្ញាធរក្រុង ស្រុក ឃុំ សង្កាត់ ភូមិ ទាំងអស់ ធ្វើយ៉ាងណាត្រូវខិតខំដោះស្រាយបញ្ហាទំនាស់វិវាទ ក្រៅប្រព័ន្ធតុលាការទាំងអស់ ដែលកើតមាននៅមូលដ្ឋាន ឲ្យបានសមស្រប និងមានប្រសិទ្ធភាព ។
ប្រធានក្រុមប្រឹក្សាខេត្តបន្ទាយមានជ័យ ថ្លែងបែបនេះបានធ្វើឡើង ក្នុងឱកាសដឹកនាំកិច្ចប្រជុំសាមញ្ញ លើកទី៤២ អាណត្តិទី៣ នៅសាលប្រជុំក្រុមប្រឹក្សាខេត្តបន្ទាយមានជ័យ នាថ្ងៃទី៧ ខែធ្នូ ឆ្នាំ២០២២ ។ កិច្ចប្រជុំនេះក៏បានអញ្ជើញចូលរួមជាអធិបតីភាពពីឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងដោយមានការចូលរួមពី លោក លោកស្រី អភិបាលរងខេត្ត ប្រធានអនុប្រធានមន្ទីរនានាជុំវិញខេត្ត តំណាងថ្នាក់ដឹកនាំកងកម្លាំង ប្រដាប់អាវុធទាំង៣ប្រភេទ លោក លោកស្រី អភិបាល អភិបាលរង ក្រុង ស្រុកទាំង៩ និងក្រុមប្រឹក្សាឃុំ សង្កាត់ជាច្រើនរូប ។
ធ្វើសេចក្តីរាយការណ៍ក្នុងកិច្ចប្រជុំនេះ ឯកឧត្តមអ៊ុំ រាត្រី អភិបាលខេត្តបន្ទាយមានជ័យ បានបញ្ជាក់ថា៖ បញ្ហាសន្តិសុខ សណ្តាប់ធ្នាប់សង្គមមិនមានអ្វីគួរឲ្យកត់សម្គាល់នោះឡើយ ដោយកម្លាំងមានសមត្ថកិច្ចជាសេនាធិការនិងរដ្ឋបាលខេត្តបានធ្វើការរួមគ្នា រៀបចំសន្តិសុខសណ្តាប់ធ្នាប់បានល្អជូនបងប្អូនប្រជាពលរដ្ឋ ។ចំពោះការផ្តល់សេវានានាយើងបានបន្តខិតខំប្រឹងប្រែងគ្រប់ ក្រុង ស្រុក ក៏ដូចជាឃុំ សង្កាត់ និងអង្គភាពច្រកចេញ ចូលតែមួយ របស់រដ្ឋបាលខេត្ត ការផ្តល់សេវាជូនប្រជាពលរដ្ឋដោយរលូន ។
ទាក់ទិននឹងតម្លៃសូ្រវនោះ ក្រសួងកសិកម្ម រដ្ឋបាលខេត្ត បានធ្វើការរួមគ្នាជាមួយធានាគារអភិវឌ្ឍជនបទនិងកសិកម្មនិងក្រុមហ៊ុនបៃតង ព្រមទាំងម្ចាស់រោងម៉ាស៊ីមកិនស្រូវ ដែលទទួលទិញស្រូវ បានខិតខំប្រឹងប្រែងដោះស្រាយតម្លៃស្រូវបានជោគជ័យដោយរក្សាតម្លៃ ជាង៩បាតឡើង ក្នុង១គ.ក្រ សម្រាប់ស្រូវលេខ១ លេខ២ ជាង៨បាត បើស្រូវចាប់ឆាយក៏ត្រឹម៨បាតនោះផងដែរ ដែលធ្វើឲ្យបងប្អូនប្រជាកសិករ អបអរសាទរចំពោះតម្លៃទាំងនោះ ដោយពីមុនស្រូវរងចាំរថយន្ត ប៉ុន្តែពេលនេះ រថយន្តរងចាំស្រូវវិញ ។
ឯកឧត្តមអភិបាលខេត្តបន្តថា៖ចំពោះការងារប្រឡងបាក់ឌុបកន្លងមកនេះ នៅក្នុងខេត្តបន្ទាយមាន ជ័យ មិនមានអ្វីកើតឡើងួរឲ្យកត់សម្គាល់នោះឡើយ ។ ជាមួយនោះរដ្ឋបាលខេត្ត បានជួយសម្របសម្រួលរាល់កិច្ចការងារទាំងអស់ ទាំងសន្តិសុខ សណ្តាប់ធ្នាប់ ការរៀបចំមណ្ឌលប្រឡងនិងបានជួយជ្រុមជ្រែងដល់បេក្ខជនដែលមកប្រឡង ។
ជាមួយគ្នានោះដែរ ឯកឧត្តម ខេង ស៊ុម ប្រធានក្រុមប្រឹក្សាខេត្ត ក៏បានដាក់ចេញនូវគោលការណ៍មួយចំនួន ដើម្បីអនុវត្តបន្ត ក្នុងនោះគឺសូមឲ្យអាជ្ញាធរនិងកងកម្លាំងទាំងអស់នៅតាមមូលដ្ឋាន បន្តយកចិត្តទុកដាក់លើការងារការពារសន្តិសុខ សណ្តាប់ធ្នាប់ សុវត្ថិភាព ជូនប្រជាពលរដ្ឋនៅតាមលំនៅដ្ឋាន ជាពិសេសគឺត្រូវលុនបំបាត់នូវល្បែងស៊ីសងគ្រប់ប្រភេទ ក្មេងទំនើង បញ្ហាគ្រឿងញៀន ចោរកម្ម លួចឆក់ ធ្វើយ៉ាងណាកុំឲ្យកើតមានឡើងស្របតាមគោលនយោបាយ «ភូមិ ឃុំ សង្កាត់ មានសុវត្ថិភាព» ។ ជំរុញការចាក់វ៉ាក់សាំងកូវីដ-១៩ ដល់បងប្អូនប្រជាពលរដ្ឋ នៅតាមលំនៅដ្ឋានឲ្យបានគ្រប់គ្នា ។ បន្តជំរុញការដោះស្រាយបញ្ហាទំនាស់វិវាទដីធ្លី ក្នុងដីតំបន់៣ឲ្យបានចប់សព្វគ្រប់ ដោយអនុវត្តតាមគោលនយោបាយឈ្នះ ឈ្នះ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
ឯកឧត្តមប្រធានក្រុមប្រឹក្សាខេត្ត បានបញ្ជាក់ថា៖ អាជ្ញាធរក្រុង ស្រុក ឃុំ សង្កាត់ ភូមិទាំងអស់ ធ្វើយ៉ាងណាត្រូវខិតខំដោះស្រាយបញ្ហាទំនាស់វិវាទ ក្រៅប្រព័ន្ធតុលាការទាំងអស់ ដែលកើតមាននៅមូលដ្ឋានឲ្យ បានសមស្របនិងមានប្រសិទ្ធភាព ៕
