បន្ទាប់ពីការទន្ទឹងរង់ចាំដ៏យូមក សៀវភៅដែលមានចំណងជើងថា”កូនប្រុសច្បងដ៏មានជាច្រើនឥទ្ធិពល” ត្រូវបានចេញផ្សាយជាសាធារណៈ
ភ្នំពេញ៖លោក ពៅ សុខ អ្នកនិពន្ធខ្មែរ និងជាអ្នករៀបរៀងសៀវភៅ [កូនប្រុសច្បង ដ៏មានឥទ្ធិពល] ដែលលោកចំណាយពេលស្រាវជ្រាវ ប្រមូលទិន្នន័យជាង៨ឆ្នាំមកហើយ និងចំណាយពេលជាង១០ខែក្នុងការរៀបរៀងកន្លងមកនេះ ក៏បានចេញផ្សាយជាសាធារណៈ កាលពីពាក់កណ្តាលខែវិច្ឆិកានេះ។
លោក ពៅ សុខ បានបញ្ជាក់ថា សៀវភៅ ដែលមានកម្រាស់៣៩០ទំព័រ ដោយមានការឧបត្ថម្ភបោះពុម្ពផ្សាយដោយសម្តេចតេជោនាយករដ្ឋមន្រ្តី ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន គឺនិយាយរៀបពីដំណើរជីវិតរបស់ឧត្តមសេនីយ៍ឯកបណ្ឌិត ហ៊ុន ម៉ាណែត តាំងពីថ្ងៃលោកចាប់កំណើត និងកុមារភាព រហូតដល់លោកចូលប្រឡូកក្នុងសមរភូមិនយោបាយ និងសង្រ្គាមបង្ខូចកិត្តិយស ដ៏ក្តៅគគុករបស់ក្រុមអ្នកប្រឆាំង។ ឯកឧត្ដម ហ៊ុន ម៉ាណែត បានយកឈ្នះលើ ព្យុះនយោបាយ សង្រ្គាមលាបពណ៌ និងបង្ខូចកេរ្ត៍ឈ្មោះទាំងនៅតំបន់អឺរ៉ុប សហរដ្ឋអាមេរិក និងបក្សប្រឆាំងក្រៅប្រទេសទៀតផង។ តាមការគូសបញ្ជាក់របស់លោក ពៅ សុខ សៀវភៅនេះ អាចជាវបាននៅតាមបណ្ណាគារនានា នៅក្នុងរាជធានីភ្នំពេញ និងតូបលក់សៀវភៅស្ថិតនៅក្រោយវិទ្យាល័យស៊ីសុវត្ថិ។
លោក ពៅ សុខ បញ្ជាក់បន្ថែមថា ក្រៅពីការបង្ហាញពីចំណេះដឹង ទេពកោសល្យនៃការដឹកនាំ របស់ឯកឧត្ដមបណ្ឌិត ហ៊ុន ម៉ាណែត សៀវភៅនេះក៏មានរៀបរាប់អំពីសកម្មភាពការងារដ៏មមាញឹក សុទ្ធសឹងតែគ្មានពេលសម្រាករបស់ឯកឧត្ដមបណ្ឌិតជាពិសេសសកម្មភាពដ៏លេចធ្លោរបស់ឯកឧត្ដម ហ៊ុន ម៉ាណែត ដែលដឹកនាំការប្រយុទ្ធនៅសមរភូមិព្រះវិហារ ក្នុងឆ្នាំ២០០៨ ដល់២០១៣ ការដឹកនាំ ការត្រៀមប្រយុទ្ធនៅសមរភូមិអូរអាឡៃ អូរតាង៉ាវ ព្រំដែនកម្ពុជាឡាវ ការដឹកនាំប្រយុទ្ធប្រឆាំង និងទប់ស្កាត់ការរីករាលដាល ជំងឺកាចសាហាវកូវីដ-១៩ រឿងការកែទម្រង់ស៊ីជម្រៅលើវិស័យកងទ័នៅកម្ពុជា ការធ្វើទំនាក់ទំនងជាអន្តរជាតិជាមួយថ្នាក់ដឹកនាំកងទ័ព នៃប្រទេសនានាទាំងក្នុង និងក្រៅតំបន់ និងសកម្មភាពការងារមនុស្សធម៌។
សៀវភៅនេះក៏បានបង្ហាញពីសកម្មភាព និងការងារនយោបាយរបស់ឯកឧត្តមបណ្ឌិត ហ៊ុនម៉ាណែត ផងដែរ។ ស្នាដៃនេះ នឹងយកទៅតម្កល់ទុកជាប្រវត្តិសាស្រ្ត នៅតាមបណ្តាបណ្ណាល័យទាំង២៥រាជធានីខេត្តផងដែរ។
សូមបញ្ជាក់ផងដែរថា កាលពីថ្ងៃទី០២ ខែធ្នូ ឆ្នាំ២០២១ ក្នុងពិធីសម្ពោធដាក់ឱ្យប្រើប្រាស់ផ្លូវ និងអាងប្រព្រឹត្តកម្មទឹកកខ្វក់ ខេត្តព្រះសីហនុ សម្តេចតេជោនាយករដ្ឋមន្រ្តី ហ៊ុន សែន បានប្រកាសគាំទ្រលោកបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្រ្តីបន្តវេន នាពេលអនាគត ហើយនៅពាក់កណ្តាលខែកក្កដា ឆ្នាំ២០២២ ឯកឧត្ដមបណ្ឌិត ហ៊ុន ម៉ាណែត ត្រូវបានសន្និបាតវិសាមញ្ញគណបក្សប្រជាជនកម្ពុជា បោះឆ្នោតគាំទ្រជាឯកច្ឆ័ន្ទ ជាបេក្ខភាពអនាគតនាយករដ្ឋមន្ត្រីផងដែរ៕
