សម្តេច ហេង សំរិន អនុញ្ញាតឱ្យប្រធានក្រុមប្រឹក្សាសកលដើម្បីភាពអត់អោន និងសន្តិភាព ជួបសម្តែងការគួរសម

ភ្នំពេញ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា និងជាប្រធានមហាសន្និបាតលើកទី៤៣ បានអនុញ្ញាតឲ្យ ឯកឧត្តម អាមេដ ប៊ីន មហាមេដ អាល់ចាវណ្ណ (Ahmed Bin Mohamed Aljarwan) ប្រធានក្រុមប្រឹក្សាសកល ដើម្បីភាពអត់អោន និងសន្តិភាព (GCTP) ចូលជួបសម្តែងការគួរសមនៅក្នុងឱកាសដែលឯកឧត្តម បានចូលលរួមមហាសន្និបាអន្តរសភាអាស៊ានលើកទី៤៣ ដែលសភាកម្ពុជាធ្វើជាម្ចាស់ផ្ទះ។

ឯកឧត្តម អាមេដ ប៊ីន មហាមេដ អាល់ចាវណ្ណ បានថ្លែងអំណរគុណយ៉ាងជ្រាលជ្រៅចំពោះ សម្តេចបានអនុញ្ញាតឱ្យឯកឧត្តមនិងគណៈប្រតិភូបានចូលជួបសម្តែងការគួរសមនាឱកាសនេះ។

ឯកឧត្តមបានជម្រាបសម្តេចអំពីបេសកកម្មរបស់អង្គការលោក ដែលនៅពេលនេះមានសមាជិកចំនួន៩៥ សុទ្ធសឹងជាសភាប្រទេសនានានៅក្នុងសលកលោក។

ឯកឧត្តមបានគូសបញ្ជាក់ពេលខាងមុខអង្គការបស់ឯកឧត្តមនឹងបើកការិយាល័យនៅកម្ពុជា ហើយឯកឧត្តម សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភាកម្ពុជានឹងត្រូវក្លាយជាប្រធាន GCTP នៅក្នុងអាណត្តិ​ រយៈពេលមួយឆ្នាំ។

ឯកឧត្តម អាមេដ ប៊ីន មហាមេដ អាល់ចាវណ្ណ គោរពស្នើសូមសម្តេចប្រធានរដ្ឋសភាជួយជំរុញកិច្ចសហប្រតិការរវាងអង្គការ GCTP និងស្ថាប័នរដ្ឋសភា ដើម្បីផ្សព្វផ្សាយទៅកាន់ពិភពលោកអោយបានដឹងកាន់ច្រើន ពីវប្បធម៌ និងការស្រឡាញ់សុខសន្តិភាព របស់កម្ពុជា។

សម្តេចអគ្គមហាពញាចក្រី ហេង សំរិន បានសម្តែងសេចក្តីសោមនស្សរីករាយ និងសូមស្វាគមន៍ ឯកឧត្តម អាមេដ ប៊ីន មហាមេដ អាល់ចាវណ្ណ ប្រធានក្រុមប្រឹក្សាសកល ដើម្បីភាពអត់អោន និងសន្តិភាព​ និងសហការី ដែលបានមកចូលរួមមហាសន្និបាតអន្តរសភាអាស៊ាន(អាយប៉ា)លើកទី៤៣ នៅកម្ពុជា។ សម្តេចបានគាំទ្របេសកកម្មការងាររបស់ GCTP និងបានកោតសរសើរ នូវបទអន្តរាគមន៍ របស់ឯកឧត្តម នៅក្នុងសម័យប្រជុំពេញអង្គលើកទី១ នៃមហាសន្និបាតអាយប៉ាលើកទី៤៣នេះ។

ក្នុងនាមរដ្ឋសភាកម្ពុជា សម្តេចប្រធានរដ្ឋសភា បានឯកភាព នឹងធ្វើជាម្ចាស់ផ្ទះរៀបចំកិច្ចប្រជុំដ៏មានសារៈសំខាន់របស់សភាអន្តរជាតិ ដើម្បីភាពអត់អោន និងសន្តិសភាព​ នៅក្នុងឆ្នាំ២០២៣​ ខាងមុខ ៕