តំណាង ប.ស.ស. កម្ពុជា ចូលរួមកិច្ចប្រជុំត្រីភាគីថ្នាក់តំបន់ស្តីពី កិច្ចគាំពារសង្គម និងយន្តការនៃការជំរុញ សហគ្រាសឲ្យចូលទៅក្នុងប្រព័ន្ធ នៅទីក្រុងបាងកក

ភ្នំពេញ៖ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាងដ៏ខ្ពង់ខ្ពស់ ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម បានចូលរួមកិច្ចប្រជុំត្រីភាគីថ្នាក់តំបន់ស្តីពី កិច្ចគាំពារសង្គម និងយន្តការនៃការជំរុញសហគ្រាសឲ្យចូលទៅក្នុងប្រព័ន្ធ ដែលមានរយៈពេល ២ថ្ងៃ ចាប់ពីថ្ងៃទី១៥ ដល់ថ្ងៃទី១៦ ខែវិច្ឆិកា ឆ្នាំ២០២២ នៅទីក្រុងបាងកក ប្រទេសថៃ។

កិច្ចប្រជុំត្រីភាគីនេះរៀបចំឡើងក្នុងគោលបំណង៖

(១) លើកកម្ពស់ការផ្លាស់ប្តូរបទពិសោធន៍រវាងជំនាញការថ្នាក់ជាតិ រួមទាំងតំណាងត្រីភាគី ស្តីពីស្ថានភាព និងអនាគតនៃសន្តិសុខសង្គម

(២) លើកកម្ពស់ការឆ្លុះបញ្ចាំងរួមជាត្រីភាគីក្នុងតំបន់ អំពីសារៈសំខាន់នៃកិច្ចខិតខំប្រឹងប្រែងក្នុងការពង្រីកការគ្របដណ្តប់កិច្ចគាំពារសង្គមក្នុងគោលដៅលើកកម្ពស់ការផ្លាស់ប្តូរឆ្ពោះទៅរកយន្តការនៃការជំរុញសហគ្រាសឲ្យចូលក្នុងប្រព័ន្ធ

(៣) លើកកម្ពស់កិច្ចពិភាក្សាស្តីពីតួនាទីដៃគូត្រីភាគីរបស់អង្គការអន្តរជាតិខាងការងារ (ILO) ក្នុងការពន្លឿនការពង្រីកការគ្របដណ្តប់កិច្ចគាំពារសង្គមសម្រាប់កម្មករនិយោជិតទាំងអស់។

សូមបញ្ជាក់ថា៖ កិច្ចប្រជុំត្រីភាគីនេះ ត្រូវបានរៀបចំឡើងដោយអង្គការអន្តរជាតិខាងការងារ (ILO) ដោយមានការចូលរួមពីតំណាងមកពីប្រទេសបង់ក្លាដែស កម្ពុជា ហ្វីជី ឥណ្ឌា ម៉ុងហ្គោលី នេប៉ាល់ ហ្វីលីពីន ថៃ និងវៀតណាម៕