សម្តេចតេជោ ហ៊ុន សែន៖ វត្តមានប្រមុខដឹកនាំអាស៊ាន និងមេដឹកនាំពិភពលោក ពេលនេះ បង្ហាញអំពីមិត្តភាព និងកិច្ចសហប្រតិបត្តិការដ៏រឹងមាំ ក្នុងពិភពលោកមួយដោយ សន្តិភាព
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លោកបានថ្លែងបែបនេះថា វត្តមានរបស់ប្រមុខដឹកនាំអាស៊ាន និងមេដឹកនាំពិភពលោក នៅព្រះរាជាណាចក្រកម្ពុជាពេលនេះ គឺបង្ហាញអំពីមិត្តភាព និងកិច្ចសហប្រតិបត្តិការដ៏រឹងមាំ ដែលធានាថាប្រជាជនយើងទាំងអស់ អាចរស់ក្នុងពិភពលោកមួយដោយសុខសន្តិភាព។
សម្តេចតេជោ ហ៊ុន សែន លោកបានថ្លែងបញ្ជាក់បែបនេះ នៅក្នុងពិធីលៀងសោយភោជន៍ ជូនចំពោះមេដឹកនាំអាស៊ាន និងមេដឹកនាំពិភពលោកដទៃទៀត ដែលបានអញ្ជើញចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ នាយប់ថ្ងៃទី១២ ខែវិច្ឆិកា ឆ្នាំ២០២២។
សម្តេចតេជោបានថ្លែងបែបនេះថា៖ [វត្តមានយើងទាំងអស់គ្នានៅក្នុងកម្មវិធីនាល្ងាចនេះ បានបង្ហញអំពីទិដ្ឋភាពដ៏ពិតប្រាកដ នៃស្មារតីមហាមិត្តភាព និងកិច្ចសហប្រតិបត្តិការដ៏រឹងមាំ និងយូរអង្វែង ដែលជាមូលដ្ឋានមហាគ្រឹះរបស់យើង ក្នុងការធានាឲ្យប្រជាជនយើងទាំងអស់ អាចរស់បាន នៅក្នុងពិភពលោកមួយប្រកបដោយសុខដុមរមនា សុខសន្តិភាព ]។
សម្តេចតេជោ ហ៊ុន សែន លោកបានថ្លែងថា ប្រទេសកម្ពុជាមានមោទនភាព ក្នុងការធ្វើជាប្រធានអាស៊ានលើកទី៣ នាពេលនេះ ហើយក៏បានវាយតម្លៃខ្ពស់ចំពោះការគាំទ្រជាប្រធានអាស៊ាននេះរបស់មេដឹកនាំនានាកន្លងមក។
សម្តេចតេជោលោកបានគូសបញ្ជាក់ថា ប្រទេសកម្ពុជា មានមោទនភាព និងការទទួលខុសត្រូវខ្ពស់ ក្នុងការទទួលតួនាទីជាប្រធានអាស៊ាន ជាលើកទី៣នេះ ក្រោមមូលបទ [អាស៊ានរួមគ្នាធ្វើ ដោះស្រាយបញ្ហាប្រឈមទាំងអស់គ្នា ]តាមរយៈដំណោះស្រាយរួមរបស់យើង សម្រាប់បញ្ហាប្រឈមនៅក្នុងតំបន់ និងពង្រឹងការចូលរួមរបស់អាស៊ាន ដើម្បីសន្តិភាព. ស្ថិរភាព .សុវត្ថិភាព .តំបន់ និងពិភពលោក។
សម្ដេចតេជោលោកបានគូសបញ្ជាក់ថា កិច្ចប្រជុំកំពូល ដែលកម្ពុជាធ្វើជាម្ចាស់ផ្ទះ ធ្វើឡើងចាប់ផ្តើមពីថ្ងៃទី១០ ដល់ទី១៣ ខែវិច្ឆិកា ឆ្នាំ២០២២ នារាជធានីភ្នំពេញ មានព្រឹត្តិការណ៍ដូចជា៖ កិច្ចប្រជុំកំពូលអាស៊ានលើកទី៤០ និងលើកទី៤១ កិច្ចប្រជុំកំពូលអាស៊ាន.ចិន លើកទី២៥ កិច្ចប្រជុំកំពូលអាស៊ាន.ជប៉ុន លើកទី២៥ កិច្ចប្រជុំកំពូលអាស៊ាន.សាធារណរដ្ឋកូរ៉េ លើកទី២៣ កិច្ចប្រជុំកំពូលអាស៊ានបូក៣ លើកទី២៥ កិច្ចប្រជុំកំពូលរំលឹកខួបទី៣០ឆ្នាំ នៃទំនាក់ទំនងជាដៃគូសន្ទនាអាស៊ាន.ឥណ្ឌា កិច្ចប្រជុំកំពូលអាស៊ាន.សហរដ្ឋអាមេរិក លើកទី១០ កិច្ចប្រជុំកំពូលអាស៊ាន.អូស្ត្រាលី លើកទី២ កិច្ចប្រជុំកំពូលរំព្ញកខួបនៃទំនាក់ទំនងអាស៊ាន.កាណាដា កិច្ចប្រជុំកំពូលអាស៊ាន.អង្គការសហប្រជាជាតិ និងកិច្ចប្រជុំកំពូលអាស៉ីបូព៌ា លើកទី១៧ ។។
