ភ្នំពេញ៖ ឯកឧត្តម ថោង ខុន រដ្ឋមន្រ្តីក្រសួងទេសចរណ៍ និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តកំពង់ បានអំពាវនាវដល់ប្រជាពលរដ្ឋចូលរួមថែរក្សាមរតកសន្តិភាពនេះទាំងអស់គ្នា ដើម្បីបន្តការអភិវឌ្ឍរីកចម្រើន ជំរុញជីវភាពរស់នៅ ព្រមទាំងមានឱកាសរៀបចំពិធីបុណ្យកម្សាន្ត នៅទូទាំងប្រទេស។
ការអំពាវនាវយ៉ាងដូច្នេះត្រូវបានធ្វើឡើងនាឱកាសឯកឧត្តម ថោង ខុន អញ្ជើញបិទពិធីបុណ្យ ប្រណាំងទូកនៅខេត្តកំពង់ធំ នាល្ងាចថ្ងៃទី៥ ខែវិច្ឆិកា ឆ្នាំ២០២២ ដែលរៀបចំឡើងតាំងពីថ្ងៃទី៣ ខែវិច្ឆិកា ឆ្នាំ២០២២។
ឯកឧត្តមរដ្ឋមន្ត្រី ថោង ខុន បានលើកឡើងថា សន្តិភាពបានផ្តល់ឱកាសឱ្យប្រទេសជាតិមានការអភិវឌ្ឍរីកចម្រើន លើគ្រប់វិស័យ ដែលញ៉ាំងឱ្យជីវភាពរស់នៅរបស់ប្រជាពលរដ្ឋមានភាពប្រសើរឡើងជាលំដាប់។
ឯកឧត្តមរដ្ឋមន្ត្រីក៏បានអំពាវនាវដល់ប្រជាពលរដ្ឋចូលរួមថែរក្សាមរតកសន្តិភាពនេះទាំងអស់គ្នា ដើម្បីបន្តការ អភិវឌ្ឍរីកចម្រើនសេដ្ឋកិច្ច/សង្គម ជំរុញជីវភាពរស់នៅប្រចាំថ្ងៃ ព្រមទាំងមានឱកាសរៀបចំពិធីបុណ្យកម្សាន្ត នៅទូទាំង ប្រទេស។
ឯកឧត្តម ថោង ខុន បានបន្តទៀតថា ចំពោះអ្នកដែលមិនទាន់មានឈ្មោះក្នុងបញ្ជីបោះឆ្នោត ឬដល់អាយុត្រូវ ចុះឈ្មោះ ឬមានសមាជិកគ្រួសារត្រូវចុះឈ្មោះបោះឆ្នោត សូមអញ្ជើញទៅពិនិត្យឈ្មោះ ផ្ទៀងផ្ទាត់ឈ្មោះ និងចុះឈ្មោះបោះឆ្នោតនៅតាមឃុំ/សង្កាត់របស់ខ្លួន ដែលកំពុងដំណើរការចាប់ពីថ្ងៃទី២០ ខែតុលា ដល់ថ្ងៃទី៨ ខែធ្នូ ឆ្នាំ២០២២ ដើម្បីអាចបោះឆ្នោតជ្រើសតាំងតំណាងរាស្រ្តបាននៅឆ្នាំ២០២៣ខាងមុខ។
ប្រធានក្រុមការងាររាជរដ្ឋាភិបាលខេត្តកំពង់ធំបានអំពាវនាវសូមប្រជាពលរដ្ឋ និងមន្រ្តីរាជការខេត្តកំពង់ធំ អញ្ជើញទៅចាក់វ៉ាក់សាំងដូសជំរុញ (ដូសទី៣ ទី៤ និងទី៥) នៅតាមមណ្ឌលសុខភាពរបស់ខ្លួនតាមពេលវេលា និងការកំណត់របស់គ្រូពេទ្យ។
គួរជម្រាបថា ឆ្នាំនេះព្រះរាជពិធីបុណ្យអំទូក បណ្តែតប្រទីប និងសំពះព្រះខែ អកអំបុក មិនបានរៀបចំធ្វើនៅ រាជធានីភ្នំពេញឡើយ ដោយសាររាជរដ្ឋាភិបាលជាប់រវល់មហាញឹកក្នុងការធ្វើជាម្ចាស់ផ្ទះរៀបចំកិច្ចប្រជុំកំពូល អាស៊ាន និងកិច្ចប្រជុំកំពូលនានា និងទទួលស្វាគមន៍ប្រមុខរដ្ឋ/ប្រមុខរដ្ឋាភិបាល នៃប្រទេសធំៗមកពីជុំវិញ ពិភពលោក។ ប៉ុន្តែនៅតាមបណ្តាខេត្តមួយចំនួនដែលនៅជាប់ដងទន្លេ ស្ទឹង ក៏បានរៀបចំពីធីបុណ្យ អុំទូកប្រពៃណីដ៏ឱឡារឹក រួមទាំងខេត្តកំពង់ធំផងដែរ៕
