អគ្គនាយករង ប.ស.ស អញ្ជើញបើកវគ្គបណ្តុះបណ្តាលស្តីពី ការកំណត់សិទ្ធិ និងរបៀបប្រើប្រាស់ប្រព័ន្ធ មជ្ឈមណ្ឌលព័ត៌មាន នៃ ប.ស.ស.
ភ្នំពេញ៖ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាងដ៏ខ្ពង់ខ្ពស់ ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នាថ្ងៃទី១ ខែវិច្ឆិកា ឆ្នាំ២០២២ ឯកឧត្តមបានអញ្ជើញជាអធិបតីភាពបើកវគ្គបណ្តុះបណ្តាលស្តីពី “ការកំណត់សិទ្ធិ និងរបៀបប្រើប្រាស់ប្រព័ន្ធមជ្ឈមណ្ឌលព័ត៌មាន នៃ ប.ស.ស.” ។
ឯកឧត្តមបណ្ឌិតបានលើកឡើងថា កាលពីឆ្នាំ២០១១ ការិយាល័យសេវាអតិថិជនគ្រាន់ជាផ្នែកមួយនៃការិយាល័យគោលនយោបាយ ដែលមានបន្ទប់នៅជាន់ផ្ទាល់ដីដោយមានទំហំតូចចង្អៀត និងមានមន្រ្តី បុគ្គលិកប្រចាំការតែ ៦នាក់ប៉ុណ្ណោះ ព្រមទាំងប្រើប្រាស់ទូរស័ព្ទលើតុធម្មតាមិនស្របតាម និយាមបច្ចេកទេសនោះទេ។
ប៉ុន្តែបច្ចុប្បន្ន ប.ស.ស. ត្រូវបានកែសម្រួលនូវរចនាសម្ព័ន្ធគ្រប់គ្រងអង្គភាពថ្មី ដោយបង្កើតការិយាល័យសេវាអតិថិជន ស្ថិតក្រោមនាយកដ្ឋានសេវាអតិថិជន និងទំនាក់ទំនងសាធារណៈ មានកន្លែងធ្វើការផ្តល់សេវាជូនអតិថិជនសមរម្យ មានរចនាសម្ព័ន្ធ និងមានឧបករណ៍បច្ចេកទេស ព្រមទាំងប្រព័ន្ធដែលមានលក្ខណៈស្តង់ដារ ដើម្បីជួយជំរុញដល់ការផ្តល់សេវារបស់ភ្នាក់ងារព័ត៌មានកាន់តែមានប្រសិទ្ធភាពមួយកម្រិតទៀត។ នៅពេលអនាគតដ៏ខ្លីខាងមុខនេះ ការិយាល័យសេវាអតិថិជននឹងមានកន្លែងធ្វើការថ្មី ស្ថិតក្នុងអគារ ប.ស.ស. ដែលមានលក្ខណៈស្តង់ដារ និងទំនើបកម្ម ទីកន្លែងមានលក្ខណៈធំទូលាយជាងពេលបច្ចុប្បន្ន។
ឆ្លៀតក្នុងឱកាសនោះឯកឧត្តមបណ្ឌិតបាន កោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ មន្រ្តី និងបុគ្គលិកនាយកដ្ឋានបច្ចេកវិទ្យាព័ត៌មាន នាយកដ្ឋានសេវាអតិថិជន និងទំនាក់ទំនងសាធារណៈ និងក្រុមហ៊ុនបារគូ ស៊ីស្ទឹម ដែលបានសហការគ្នាយ៉ាងល្អ ក្នុងការពន្លឿនការដំឡើងប្រព័ន្ធទាន់ពេលវេលា ស្របពេលរាជរដ្ឋាភិបាល ក្រោមការដឹកនាំដ៏ឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាទើបធ្វើឲ្យប្រទេសមានសុខសន្តិភាព និងការអភិវឌ្ឍគ្រប់វិស័យ ក្នុងនោះវិស័យសន្តិសុខសង្គម បានពង្រីកវិសាលភាពដាក់ឲ្យអនុវត្តនៅរបបសន្តិសុខសង្គម ផ្នែកប្រាក់សោធនសម្រាប់បុគ្គលទាំងឡាយ ដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ នាពេលថ្មីៗនេះ និងបន្តពង្រីកវិសាលភាពផ្នែកថែទាំសុខភាពដល់កម្មករនិយោជិតវិស័យសេដ្ឋកិច្ចក្រៅប្រព័ន្ធ រួមមានអ្នកបើកម៉ូតូរ៉ឺម៉ក និងអ្នកបម្រើតាមផ្ទះ។
ក្នុងឱកាសថ្លែងសុន្ទរកថា បើកវគ្គបណ្តុះបណ្តាលខាងលើនេះ ឯកឧត្តមបណ្ឌិតបានលើកទឹកចិត្តដល់មន្រ្តី និងបុគ្គលិកជំនាញ ប.ស.ស. ទាំងអស់យកចិត្តទុកដាក់ក្នុងការរៀនសូត្រ ហើយប្រសិនបើមានកន្លែងណាដែរមិនច្បាស់ សូមកុំមានការខ្មាស់អៀន និងត្រូវហ៊ានសួរ និងឆ្លើយទៅកាន់លោកគ្រូឧទ្ទេស ដើម្បីឲ្យវគ្គបណ្តុះបណ្តាល របស់យើងទទួលបាននូវគុណតម្លៃ និងប្រកបដោយគុណភាព ដើម្បីពង្រឹងសមត្ថភាពខ្លួនឯងបន្ថែមទៀត។
សូមបញ្ជាក់ថា៖វគ្គបណ្តុះបណ្តាលនេះប្រព្រឹត្តិទៅនៅស្នាក់ការ កណ្ដាល ប.ស.ស. រាជធានីភ្នំពេញដោយមានការអញ្ជើញចូលរួមពីថ្នាក់ដឹកនាំ និងបុគ្គលិកប្រមាណជា៣០នាក់៕
