រដ្ឋមន្ត្រីក្រសួងប្រៃសណីយ៍ អញ្ជើញជាអធិបតីក្នុងពិធីបិទសន្និសីទស្តីពី បរិវត្តកម្មឌីជីថលនៅកម្ពុជា ឆ្នាំ២០២២

ភ្នំពេញ៖ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ នៅរសៀលថ្ងៃទី២៨ ខែតុលា ឆ្នាំ២០២២ បានអញ្ជើញជាអធិបតីក្នុងពិធីបិទសន្និសីទ ស្តីពីបរិវត្តកម្មឌីជីថល នៅកម្ពុជា ឆ្នាំ២០២២ ក្រោមប្រធានបទ ” ការជំរុញសម្ទុះនៃការត្រៀមខ្លួនចាប់យក វិស័យឌីជីថល” ដែលបានចូលរួមសហការរៀបចំ ដោយ ក្រសួងអប់រំ យុវជន និងកីឡា ក្រុមហ៊ុន eduCLaaS Global និងក្រុមហ៊ុន Confexhub Group។

សន្និសីទនេះមានការចូលរួមពីតំណាងស្ថាប័នរាជរដ្ឋាភិបាល វិស័យឯកជន សមាគមពាណិជ្ជកម្ម ព្រមទាំងផ្នែកពាក់ព័ន្ធនឹងការអភិវឌ្ឍធនធានមនុស្ស និងការធ្វើបរិវត្តកម្មឌីជីថល សរុបប្រមាណ២៣០នាក់។

សន្និសីទនេះរៀបចំឡើងក្នុងគោលបំណងទទួលបាននូវការយល់ដឹង ក៏ដូចជាពិភាក្សាប្រមូលនូវធាតុចូល សំខាន់ៗរួមគ្នា ដើម្បីចូលរួមលើកកម្ពស់បរិវត្តកម្មឌីជីថលនៅកម្ពុជាត្រៀមខ្លួនរួចជាស្រេច សម្រាប់ការប្រកួត ប្រជែងនៅក្នុងតំបន់ និងសាកលលោកដែលនឹងអាចកើតមានឡើងនៅក្នុង បរិបទឌីជីថលនាពេលបច្ចុប្បន្ន។

ថ្លែងក្នុងសន្និសីទនេះ ឯកឧត្តមរដ្ឋមន្រ្ដី ជា វ៉ាន់ដេត បានមានប្រសាសន៍ថា សន្និសីទនេះជាការចាប់ផ្ដើមដ៏ល្អ ដោយបានផ្តល់ឱកាសជួបជុំពីសំណាក់ស្ថាប័នពាក់ព័ន្ធទាំងអស់ទាំងវិស័យសាធារណៈ និងឯកជន ដែលជាផ្នែកមួយចូលរួមចំណែកក្នុងការត្រៀមខ្លួនឆ្លើយតបទៅនឹងបដិវត្តន៍ឧស្សាហកម្ម ៤.០។

ជាមួយគ្នានេះដែរ ឯកឧត្តមរដ្ឋមន្ត្រី បានបន្តថា កាលានុវត្តភាពនៅក្នុងវិស័យឌីជីថល ត្រូវបានព្យាករណ៍ថានឹង អាចធ្វើឱ្យសេដ្ឋកិច្ចវិស័យឌីជីថលរបស់អាស៊ាន កើនឡើងប្រមាណ មួយទ្រីលាន ដុល្លារសហរដ្ឋអាមេរិក ដល់GDP ក្នុងតំបន់។

លើសពីនេះទៀត ឯកឧត្តមរដ្ឋមន្រ្ដី ក៏បានលើកឡើងនូវកិច្ចសហការរវាងក្រសួងប្រៃសណីយ៍និងទូរគមនាគមន៍ ជាមួយក្រសួងអប់រំ យុវជន និងកីឡា ក្នុងការសម្របសម្រួលអក្ខរកម្មឌីជីថលនៅក្នុងកម្មវិធីសិក្សា ដើម្បីត្រៀមខ្លួន កសាងមជ្ឈមណ្ឌលបច្ចេកវិទ្យាសហគមន៍ជូនដល់គ្រឹះស្ថានអប់រំទូទាំងប្រទេស៕