អគ្គីភ័យឆាបឆេះផ្ទះមួយកន្លែងអស់ទាំងស្រុង នៅខណ្ឌបឹងកេងកង សមត្ថកិច្ចប្រើប្រាស់រថយន្តទឹកជិត៣០គ្រឿង

ភ្នំពេញ៖ អគ្គីភ័យបានឆាបឆេះផ្ទះមួយកន្លែងអស់ទាំងស្រុង ក្នុងនោះមិនបានបណ្តាលឲ្យអ្នកណាម្នាក់រងរបួសនោះឡើយ។ ហេតុការណ៍នេះបានកើតឡើងនៅវេលាម៉ោង៤និង០០នាទីរសៀល ថ្ងៃទី២១ ខែតុលា ឆ្នាំ២០២២ សិ្ថតនៅចំណុចផ្ទះលេខ១៧២ ផ្លូវលេខ៦៣ កែងផ្លូវ២៨២ ភូមិ៥ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ ។

យោងតាមរបាយការណ៍របស់លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គីភ័យ និងសង្គ្រោះ បានឲ្យដឹងថា ហេតុការណ៍អគ្គិភ័យដែលឆាបឆេះផ្ទះប្រជាពលរដ្ឋខាងលើនេះ កម្លាំងសមត្ថកិច្ចជំនាញកំពុងតែធ្វើការស្រាវជ្រាវ ហើយក្នុងនោះធ្វើឲ្យខូចខាតឆេះផ្ទះ មួយខ្នង ដែលមានទំហំ ១២ម៉ែត្រ X ២០ម៉ែត្រអស់ទាំងស្រុង ដែលសង់ឡើងអំពី ថ្មក្រោមឈើលើប្រក់សង្ក័សី។

លោកវរសេនីយ៍ឯក ព្រហ្ម យ៉ន បន្តទៀតថា នៅវេលាម៉ោង៥និង០០នាទីល្ងាច ថ្ងៃខែឆ្នាំដដែល អគ្គីភ័យនេះត្រូវបានពន្លត់បានទាំងស្រុង ដោយប្រើប្រាស់រថយន្តការិយាល័យអគ្គិភ័យ រាជធានីភ្នំពេញ ចំនួន ១៩គ្រឿង ប្រើប្រាស់ទឹកអស់ចំនួន ១៩ឡាន ស្មើនឹង ៧៦ម៉ែត្រគូប, រថយន្តជំនួយមកពីរថយន្តរបស់ក្រុមហ៊ុន OCICO ទីក្រុងកោះពេជ្រ ចំនួន០៣គ្រឿង ប្រើប្រាស់ទឹកអស់ ០៣ឡាន ស្មើនឹង ១២ម៉ែត្រគូប, រថយន្តទីក្រុង កោះនរា ចំនួន ០១គ្រឿង ប្រើប្រាស់ទឹកអស់ ០១ឡាន ស្មើនឹង ០៤ម៉ែត្រគូប, រថយន្តផ្សារទំនើប អូឡាំព្យា ចំនួន ០២គ្រឿង ប្រើប្រាស់ទឹកអស់ ០២ឡាន ស្មើនឹង ០៨ម៉ែត្រគូប និងរថយន្តក្រុមហ៊ុន ស្រាបៀរកម្ពុជា ចំនួន ០១គ្រឿង ប្រើប្រាស់ទឹកអស់ ០១ឡាន ស្មើនឹង ០៦ម៉ែត្រគូប៕