ប្រតិភូក្រសួងអប់រំ និងក្រុមការងារបេសកកម្ម ADB ធ្វើទស្សនកិច្ចរួមគ្នា នៅវិទ្យាល័យស្វាយរៀង និងវិទ្យាល័យ ហ៊ុន សែន ប្រសូតិ

ភ្នំពេញ៖ ប្រតិភូក្រសួងអប់រំ យុវជន និងកីឡា និងក្រុមការងារបេសកកម្មធនាគារអភិវឌ្ឍន៍អាស៊ី នាថ្ងៃទី២១ តុលានេះ បានធ្វើទស្សនកិច្ចរួមគ្នា នៅវិទ្យាល័យស្វាយរៀង និងវិទ្យាល័យ ហ៊ុន សែន ប្រសូតិ ក្រោមការដឹកនាំដោយ ឯកឧត្ដមបណ្ឌិត ឌី ខាំបូលី ប្រធានគ្រប់គ្រងគម្រោង (USESDPII) លោក ម៉ា សុភា ប្រធានក្រុមការងារបេសកកម្ម (ADB) និងមានការចូលរួមពីមន្ត្រីជាន់ខ្ពស់ (ADB) ថ្នាក់នាំគម្រោង ទីប្រឹក្សាគម្រោង មន្ត្រីអនុវត្តគម្រោង មន្ទីរអប់រំ យុវជន និងកីឡា ខេត្តស្វាយរៀង គណៈគ្រប់គ្រងសាលារៀន លោកគ្រូ អ្នកគ្រូ និងភាគីពាក់ព័ន្ធ។

ដំណើរទស្សនកិច្ចនេះមានគោលបំណង ពិនិត្យវឌ្ឍនភាពនៃការគ្រប់គ្រងនៅសាលារៀន ការសិក្សាផ្នែកវិទ្យាសាស្ត្រ ផលជះលើការសិក្សា ការជួសជុលអគារធនធាន ការងារបរិស្ថាន និងសុវត្ថិភាពសង្គម។

ប្រតិភូបានចុះពិនិត្យអាគារធនធានដែលបានជួសជុល បន្ទប់ពិសោធន៍ បន្ទប់កុំព្យូទ័រ បណ្ណាល័យ បន្ទប់ពហុបំណង និងបន្ទប់រៀនចំនួន២ ដែលបានប្រែក្លាយជាបន្ទប់ពិសោធន៍បន្ទប់ពហុបំណង ព្រមទាំងសម្ភារៈពិសោធន៍ដែលបានបំពាក់ និងសៀវភៅដែលបានផ្គត់ផ្គង់។

ជាលទ្ធផលនៃទស្សនកិច្ចនេះ ប្រតិភូបានកោតសរសើរចំពោះវឌ្ឍនភាពរបស់សាលារៀន និងកិច្ចខិតខំប្រឹងប្រែងរបស់ថ្នាក់ដឹកនាំសាលារៀន និងគ្រូបង្រៀន ប្រកបដោយការប្ដេជ្ញាចិត្តខ្ពស់ ការរៀបចំការពិសោធន៍បានពេញលេញ ការប្រើប្រាស់បច្ចេកវិទ្យាព័ត៌មាន (ICT) សម្រាប់ការរៀន និងបង្រៀន ក្នុងអំឡុងពេលអគារកំពុងជួសជុល។ ក្រុមការងារក៏បានពិភាក្សា និងដោះស្រាយបញ្ហាប្រឈម ព្រមទាំងផ្ដល់អនុសាសន៍មួយចំនួនលើការកសាងឧត្តមានុវត្តន៍៕