សម្តេចតេជោ ហ៊ុន សែន ជំរុញឲ្យទីម័រខាងកើត បង្កើតការវិនិយោគនៅកម្ពុជា ដូចជាម៉ាស៊ីនកិនស្រូវ ម៉ាស៊ីនសំងួត ហើយនាំចេញទៅទីម័រខាងកើតតែម្ដង
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានជំរុញឲ្យទីម័រខាងកើត បង្កើតការវិនិយោគនៅកម្ពុជា ដូចជាផ្នែកម៉ាស៊ីនកិនស្រូវ ម៉ាស៊ីនសំងួត ហើយនាំចេញទៅប្រទេសទីម័រខាងកើតតែម្ដង ។
សម្តេចតេជោ ហ៊ុន សែន នាថ្ងៃទី២០ ខែតុលា ឆ្នាំ២០២២ បានអញ្ជើញទទួលជួបពិភាក្សាការងារ ជាមួយឯកឧត្តមបណ្ឌិត ចូហ្សេ ម៉ានូអែល រ៉ាមូស អរតា (Jose Ramos-Horta) ប្រធានាធិបតីទីម័រខាងកើត ក្នុងឱកាសដែលឯកឧត្តមអញ្ជើញបំពេញទស្សនកិច្ចផ្លូវ រដ្ឋនៅព្រះរាជាណាចក្រកម្ពុជា។
ក្នុងជំនួបនេះ ឯកឧត្តមប្រធានាធិបតីទីម័រខាងកើត បានគោរពថ្លែងអរគុណចំពោះសម្ដេចតេជោ ហ៊ុន សែន ចំពោះរាជរដ្ឋាភិបាលកម្ពុជា ដែលបានគាំទ្រទីម័រលើវិស័យអភិវឌ្ឍន៍ វិស័យកសាងជាតិ ស្ថេរភាពសង្គម និងគាំទ្រ ជាសមាជិកភាពក្នុងសហគមន៍អាស៊ាន។ ហើយថ្មីៗនេះទៀតសោត កម្ពុជា បានជួយទីម័រក្នុងការឧបត្ថម្ភវ៉ាក់សាំងការពារជំងឺកូវីដ-១៩ ជាមួយនឹងបរិក្ខារពេទ្យដទៃទៀតផងដែរ។
ឯកឧត្តម ក៏បានជម្រាបជូនសម្ដេចតេជោ ថា ឯកឧត្តម មកទស្សនកិច្ចនៅប្រទេសកម្ពុជា បានឃើញការរីកចម្រើនរបស់ប្រទេសកម្ពុជាជាលំដាប់។ ជាមួយគ្នានោះ ទំនាក់ទំនងរវាងប្រទេសទាំងពីរ មានការរីកចម្រើនផងដែរ។
ក្នុងន័យនេះ ឯកឧត្តម ក៏បានបញ្ជាក់ជូនសម្ដេចតេជោ នូវបំណងចង់ពង្រីកពង្រឹងចំណងមិត្តភាព ពង្រឹងកិច្ចសហប្រតិបត្តិការរវាងប្រទេសទាំងពីរឲ្យកាន់តែខ្លាំងឡើង តាមរយៈឲ្យមានការហោះហើរត្រង់ប្រទេសទាំងពីរ និងលើកកម្ពស់លើវិស័យពាណិជ្ជកម្មរវាងប្រទេសទាំងពីរផងដែរ។
ជាការឆ្លើយតប សម្ដេចតេជោ ហ៊ុន សែន ក៏បានអបអរសាទរចំពោះឯកឧត្តម ដែលបានជាប់ឆ្នោតកាន់តំណែងជាប្រធានាធិបតីជាលើកទី២។ សម្តេចតេជោបានមានប្រសាសន៍បញ្ជាក់ថា ឆ្នាំនេះជាខួបទី ២០ នៃទំនាក់ទំនងប្រទេសទាំងពីរ។
សម្ដេចតេជោក៏បានសម្តែង នូវការស្វាគមន៍ចំពោះការហោះហើរត្រង់រវាងកម្ពុជា និងទីម័រខាងកើត។
សម្តេចតេជោ ហ៊ុន សែន ក៏បានជំរុញឲ្យទីម័រខាងកើតបង្កើតការវិនិយោគនៅកម្ពុជា ដូចជាផ្នែកម៉ាស៊ីនកិនស្រូវ ម៉ាស៊ីនសំងួត ហើយនាំចេញទៅប្រទេសទីម័រខាងកើតតែម្ដង។
សម្ដេចក៏បានគូសបញ្ជាក់ថា កម្ពុជាបានអនុញ្ញាតឲ្យបរទេសវិនិយោគ ១០០ ភាគរយ។ សម្ដេចក៏បានលើកទឹកចិត្តជំរុញការអនុវត្តកិច្ចព្រមព្រៀងទាំងឡាយណាដែលប្រមុខរដ្ឋាភិបាលបានចុះហត្ថលេខាហើយ ហើយក៏សូមឲ្យពិនិត្យជំរុញកិច្ចសហប្រតិបត្តការលើវិស័យអប់រំ និងវិស័យសន្តិសុខផងដែរ៕
