ឯកឧត្តម សុខ ចិន្តាសោភា ជឿជាក់ ការរួបរួមគ្នាក្នុងភាពជាដៃគូ នឹងអាចកសាងនូវខ្សែច្រវាក់ផ្គត់ផ្គង់ ដែលរឹងមាំនិងមានភាពធន់ជាងមុន ក៏ដូចជាអនាគតមួយដ៏ភ្លឺស្វាង

ភ្នំពេញ៖ ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា បានសម្ដែងនូវជឿជាក់លើថាមពលមនុស្សជាតិ ហើយជឿថា ការរួបរួមគ្នាក្នុងភាពជាដៃគូ នឹងអាចកសាងនូវខ្សែច្រវាក់ផ្គត់ផ្គង់ ដែលរឹងមាំនិងមានភាពធន់ជាងមុន ក៏ដូចជាអនាគតមួយដ៏ភ្លឺស្វាង ។

តបតាមការអញ្ជើញរបស់ ក្រសួងការបរទេសវៀតណាម ក្រសួងពាណិជ្ជកម្ម និងទេសចរណ៍អូស្ត្រាលី និងអង្គការសម្រាប់កិច្ចសហប្រតិបតិ្តការសេដ្ឋកិច្ច និងអភិវឌ្ឍន៍ (OECD) នាថ្ងៃទី១៧ ខែតុលា ឆ្នាំ២០២២ ឯកឧត្តម សុខ ចិន្តាសោភា បានចូលរួមក្នុងវេទិកាថ្នាក់រដ្ឋមន្ត្រីតំបន់អាស៊ីអាគ្នេយ៍របស់អង្គការ OECD ឆ្នាំ២០២២ ដែលបានប្រព្រឹត្តទៅពីថ្ងៃទី១៧-១៨ ខែតុលា ឆ្នាំ២០២២ នៅទីក្រុងហាណូយ សាធារណរដ្ឋសង្គមនិយមវៀតណាម។

វេទិកានេះមានការចូលរួមពីឯកឧត្តម Pham Binh Minh ឧបនាយករដ្ឋមន្រ្តីប្រចាំការនៃប្រទេសវៀតណាម, ឯកឧត្តម Bui Thanh Son រដ្ឋមន្រ្តីក្រសួងការបរទេសនៃប្រទេសវៀតណាម, ឯកឧត្តម Tim Ayres អនុរដ្ឋមន្រ្តីទទួលបន្ទុកពាណិជ្ជកម្ម និងកម្មន្តសាលនៃប្រទេសអូស្រ្តាលី, ឯកឧត្តម Mathias Cormann អគ្គលេខាធិការអង្គការ OECD, ឯកឧត្តម ចាយ ណាវុធ ឯកអគ្គរាជទូតកម្ពុជាប្រចាំប្រទេសវៀតណាម, និងឯកឧត្តម លោកជំទាវ លោក លោកស្រី តំណាងប្រទេសសមាជិកអង្គការ OECD អាស៊ាន និងវិស័យឯកជន ដែលមានអ្នកចូលរួមផ្ទាល់ និងតាមប្រព័ន្ធវីដេអូ សរុបប្រមាណ ៤០០នាក់ ៕