ក្រសួងបរិស្ថាន រៀបចំដំណើរការវាយតម្លៃ និងទទួលស្គាល់អង្គភាពគំរូក្នុងវិស័យបរិស្ថាន ដើម្បីបង្កើនប្រសិទ្ធភាព និងគុណផលការងារ

ភ្នំពេញ៖ ក្នុងក្របខណ្ឌការកសាងរដ្ឋបាលទំនើបឆ្នាំ២០២២នេះ ក្រសួងបរិស្ថាន បានរៀបចំដំណើរការវាយតម្លៃនិងទទួលស្គាល់អង្គភាពគំរូក្នុងវិស័យបរិស្ថាន ដើម្បីបង្កើនប្រសិទ្ធភាព និងគុណផលការងារខ្ពស់ ជាក់ស្តែង។

នៅថ្ងៃទី១៧ ខែតុលា ឆ្នាំ២០២២នេះ ក្រសួងបរិស្ថាន បានរៀបចំពិធីធ្វើបទបង្ហាញស្តីពី«សមិទ្ធផល និងវឌ្ឍនភាពការងារឆ្នាំ២០២២ របស់អង្គភាពចំនួន២០ ក្នុងចំណោម ៣២៨អង្គភាព និងសហគមន៍ដែលបានចូលរួមប្រកួតប្រជែង យកចំណាត់ថ្នាក់ជ័យលាភីមកពី អង្គភាពចំណុះទីស្តីការក្រសួង មន្ទីរបរិស្ថានរាជធានី ខេត្ត តំបន់ការពារធម្មជាតិ និងសហគមន៍តំបន់ការពារធម្មជាតិ ដើម្បីពិនិត្យ វាយតម្លៃ និងផ្តល់ពិន្ទុ ជ្រើសយកអង្គភាពទទួលជ័យលាភីលេខ១ដល់លេខ៣ និងអង្គភាពទទួលបានការលើកទឹកចិត្ត។

កម្មវិធីនេះបានដឹកនាំដោយឯកឧត្តម ផៃ ប៊ុនឈឿន រដ្ឋលេខាធិការប្រចាំការ និងជាប្រធានគណៈកម្មការវាយតម្លៃនិងទទួលស្គាល់អង្គភាពគំរូក្នុងវិស័យបរិស្ថាន (គ.វ.ប.) និងមានការអញ្ជើញចូលរួមឯកឧត្តម លោកជំទាវ អស់លោកជាថ្នាក់ដឹកនាំក្រសួង សមាជិក គ.វ.ប. និងតំណាងក្រសួងមុខងារសាធារណៈសរុបចំនួន៩០រូប។

ក្នុងកិច្ចការនេះ អនុគណៈកម្មការវាយតម្លៃ និងទទួលស្គាល់អង្គភាពគំរូក្នុងវិស័យបរិស្ថានទាំងបួន បានចុះពិនិត្យ ផ្ទៀងផ្ទាត់សមិទ្ធកម្មដល់ទីតាំងអង្គភាពគោលដៅទាំង៤១អង្គភាពរួមមាន អង្គភាពចំណុះទីស្តីការក្រសួងចំនួន១១អង្គភាព មន្ទីរបរិស្ថានរាជធានី ខេត្តចំនួន១០អង្គភាព តំបន់ការពារធម្មជាតិចំនួន១០អង្គភាព និងសហគមន៍តំបន់ការពារធម្មជាតិចំនួន១០អង្គភាព ដើម្បីជ្រើសផ្តល់ពិន្ទុ លើការអភិវឌ្ឍន៍ស្ថាប័នរបស់ខ្លួន ដោយជ្រើសរើសយក០៥អង្គភាពពីផែននីមួយៗ មកធ្វើបទបង្ហាញការពារសមិទ្ធកម្មរបស់ខ្លួន ឆ្ពោះទៅជ្រើសរើសចំណាត់ថ្នាក់អង្គភាពជ័យលាភី៕