ឯកឧត្តម សែម សុវណ្ណនី ចុះពិនិត្យផ្លូវបេតុង២ខ្សែនៅឃុំតាលន់ និងឃុំខ្ពប ស្រុកស្អាង ក្រោយស្ថាបនារួចរាល់

ភ្នំពេញ៖ ឯកឧត្តម សែម សុវណ្ណនី ប្រធានក្រុមការងាររាជរដ្ឋាភិបាលចុះជួយស្រុកស្អាង ខេត្តកណ្តាល នៅថ្ងៃទី១៤ ខែតុលា ឆ្នាំ២០២២ បានដឹកនាំក្រុមការងារ ចុះពិនិត្យមើលផ្លូវបេតុង ចំនួន២ខ្សែ។ ផ្លូវ១ខ្សែមាន ប្រវែង១៣០០ម៉ែត្រ ស្ថិតនៅក្នុងឃុំតាលន់ ដែលមានការតភ្ជាប់ពីឃុំត្រើយស្លា និងផ្លូវបេតុ១ខ្សែទៀត មានប្រវែង១៥០០ម៉ែត្រ នៅក្នុងភូមិកោះថ្មី ឃុំខ្ពប ស្រុកស្អាង ខេត្តកណ្តាល ក្រោយពីស្ថាបនារួចរាល់ ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

ឯកឧត្តម សែម សុវណ្ណនី បានឱ្យដឹងថា ផ្លូវទាំង២ខ្សែខាងលើនេះ គឺបានស្ថាបនាដោយកងកម្លាំងវិស្វកម្ម នៃមជ្ឈមណ្ឌលជាតិរក្សាសន្តិភាព ហើយផ្លូវនេះ បានជួយសម្រួលដល់ការងារធ្វើដំណើររបស់ប្រជាពលរដ្ឋ ជាពិសេសបង្ករលក្ខណៈងាយស្រួល ក្នុងការដឹកទំនិញកសិផលកសិកម្ម របស់ពួកគាត់ទៅកាន់ទីផ្សារ។

ឯកឧត្តម បានបញ្ជាក់ថា “ស្មោះត្រង់ជាមួយទេវតា គឺទេវតាជួយដូច្នេះហើយ”។ ឯកឧត្តម សែម សុវណ្ណនី បានឱ្យដឹងដែរថា ក្នុងភូមិសាស្ត្រស្រុកស្អាង ជាពិសេស នៅឃុំត្រើយស្លា, ឃុំតាលន់ និងឃុំខ្ពប ជាដើម ក្រុមការងារបានធ្វើការស្ថាបនាផ្លូវ ជាង១០ខ្សែ ដែលមានប្រវែងជាង២០គីឡូម៉ែត្រ និងបានបំពាក់អំពូលសូឡា នៅតាមដងផ្លូវ ជាច្រើនពាន់ដើមផងដែរ។ ដោយឡែកផ្លូវបេតុងថ្មី២ខ្សែនេះ ក៏បានបំពាក់អំពូលសូឡា ​រួចរាល់ផងដែរ។

ក្នុងដំណើរពិនិត្យផ្លូវបេតុង និងសួរសុខទុក្ខប្រជាពលរដ្ឋនៅតាមខ្នងផ្ទះ ឯកឧត្តម បាននាំយកក្រមារចែកប្រជាពលរដ្ឋតាមដល់ផ្លូវចំនួន៤០០នាក់ផងដែរ សម្រាប់ឃុំតាលន់។ បន្ទាប់មកឯកឧត្តម សែម សុវណ្ណនី និងក្រុមការងារ បានឆ្លងទូកដរ​​ទៅពិនិត្យផ្លូវបេតុងនៅភូមិកោះថ្មី ឃុំខ្ពប ដើម្បីជួបសំណេះសំណាលប្រជាពលរដ្ឋ ដោយនាំយកការផ្តាំផ្ញើរការសួរសុខទុក្ខពីសំណាក់សម្តេចតេជោ ហ៊ុន សែន និងឯកឧត្តម ប្រាក់ សុខុន និងបាននាំយកអំណោយចែកជូនប្រជាពលរដ្ឋ៦០គ្រួសារដែលមានជីវភាពខ្វះខាត នៅក្នុងភូមិកោះថ្មីនេះផងដែរ ដោយក្នុង១គ្រួសារទទួលបានអង្ករ១០គីឡូក្រាម មី១កេស និងទឹកស៊ីអ៉ីវយួរ។ ក្នុងដំណើរចុះសួរសុខទុក្ខប្រជាពលរដ្ឋតាមដងផ្លូវ ដោយមើលឃើញ ជាក់ស្តែងផ្ទះលោកយាយ ប៊ុន​ ញឹប អាយុ៨៨ឆ្នាំ ដែលមានជំងឺប្រចាំកាយផងនោះ ហើយផ្ទះត្រូវរបើកដំបូលផងនោះ ឯកឧត្តម សែម សុវណ្ណនី បានឧបត្ថម្ភថវិកា ចំនួន៦០០ដុល្លា​ដើម្បីធ្វើការសាងសង់ផ្ទះថ្មីជូនគាត់។

ឯកឧត្តម បានឧបត្ថម្ភថវិកាចំនួន៥០០ដុល្លា ដល់សាលាបឋមសិក្សាប៊ុនរ៉ានីហ៊ុនសែនកោះថ្មី ដើម្បីចាក់ខ្សាច់បំពេញទីធ្លាសាលាកុំឱ្យទឹកលិច៕