អភិបាលខេត្តបាត់ដំបង ជម្រុញឲ្យមន្ទីរជំនាញ យកចិត្តទុកដាក់ ពីច្រាំងទំនប់កំពីងពួយ ដែលរងការបាក់ដីមាត់ច្រាំងទំនប់ច្រើនកន្លែង ត្រូវធ្វើការជួសជុលកែលម្អឲ្យប្រសើរឡើងវិញ

ភ្នំពេញ៖ កន្លងទៅថ្មីៗនេះ ឯកឧត្តម​ សុខ​ លូ​ អភិបាលខេត្តបាត់ដំបង បានចុះពិនិត្យមើលស្ថានភាពរងការខូចខាតទំនប់អាងកំពីងពួយ ផ្នែកខាងលើចាប់ពីចំណុចភ្នំកំប៉ង់​ដល់ចំណុចជីរក់​ ស្ថិតនៅ​ភូមិបឹងក្រសាល​ ឃុំស្នឹង​ ស្រុកបាណន់​ ដែលកំពុងរងនូវការខូចខាត ដោយសារតែរលកទឹកអាងវាយ​ដាច់ច្រាំងទំនប់នៃផ្នែកខ្លះៗ នៅតាមមាត់ច្រាំងទំនប់ជាច្រើនកន្លែង។ តែទោះបីស្ថានភាពបែបនេះក្តី ក៏មិនទាន់ដល់កម្រិតក្នុងការប្រកាសអាសន្ននោះទេ​។

នេះបើតាមការអះអាងគូសបញ្ជាក់ពីលោកអភិបាលស្រុកបាណន់និងថ្នាក់ដឹកនាំក្រសួងកសិកម្ម រុក្ខាប្រមាញ់និងនេសាទ ព្រមទាំងមន្ទីរជំនាញក្នុងខេត្ត បានអមដំណើរ និងចុះទៅពិនិត្យមើលដល់ទីតាំងកើតហេតុជាក់ស្តែង ។

ក្មុងការចុះទៅពិនិត្យមើលពីស្ថានភាពមាត់ច្រាំងទំនប់កំពីងពួយ ផ្នែកខាងលើ ដែលត្រូវរងការខូចខាតបាក់ដី មាត់ច្រាំងទំនប់ជាបន្តបន្ទាប់ ដែលបង្កឲ្យមានការបារម្ភភ័យខ្លាចពីប្រជាពលរដ្ឋរស់នៅទីនោះ ខណៈតាមមាត់ច្រាំងទំនប់អា
ង ត្រូវបានទឹករលកបោកបក់ដាច់មាត់ច្រាំង ជាច្រើនកន្លែង ហើយកន្លែងលើខ្នងទំនប់ខ្លះ បានបាក់ដាច់ខ្លាំងថែមទាំងរំខានដល់មធ្យោបាយធ្វើដំណើរនិងការដឹកកសិផលទីនោះទៀតផង។

ប្រភពពីប្រជាពលរដ្ឋដែលរស់នៅនិងអាស្រ័យផលក្បែរៗទំនប់នេះ បានគូសបញ្ជាក់បន្ថែមឲ្យដឹងផងដែរថា៖ ខ្នងទំនប់នៅទីនេះ បានបាក់ដាច់ដីមាត់ច្រាំងដោយសារតែរលកទឹកអាងបោកដាច់ជារៀងរាល់ឆ្នាំក្នុងរដូវវស្សា ពេលទឹកអាងពេញប្រៀប។ តែនៅឆ្នាំនេះទឹកអាងបោកបាក់ដាច់ដីច្រាំងទំនប់ចូលជ្រៅមកលើខ្នងទំនប់ជាងឆ្នាំកន្លងទៅ ។

ក្នុងករណីពាក់ព័ន្ធកំពុងកើតឡើងនេះឯកឧត្តម សុខ លូ អភិបាលខេត្តបាត់ដំបង បានណែនាំ និងជម្រុញ ឲ្យក្រុមការងារជំនាញរបស់មន្ទីរធនធានទឹក​និងឧតុនិយមខេត្តបាត់ដំបង ត្រូវចុះពិនិត្យមើល និងមានវិធានការ ក្នុងការជួសជុលកែលម្អនូវកន្លែងដែលរងការខូចខាតឲ្យបានប្រសើរឡើងវិញនៅពេលខាងមុខ និងត្រូវយកចិត្តទុកដាក់ចាត់តាំងមន្ត្រីឲ្យមកយាមប្រចាំការជាប់ជាប្រចាំនិងត្រូវយកចិត្តទុកដាក់ឲ្យបានម៉ត់ចត់ពីហានិភ័យដែលអាចបង្កឡើងបាន និងត្រូវពិនិត្យក្នុងការជួសជុលកែលម្អឡើងវិញក្នុងពេលវេលាសមស្រប ដែលអាចធ្វើបាននិងមិនត្រូវមើ
លរំលងពីផលប៉ះពាល់អាចបង្កនូវផលវិបាកធ្ងន់ធ្ងរងាយនិងកើតឡើងបាននៅទីនោះទេ ៕