ទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA) បំពេញទស្សនកិច្ចសិក្សា លើប្រព័ន្ធសន្ដិសុខកម្ពុជា
ភ្នំពេញ៖ ដំណើរបំពេញទស្សនកិច្ចសិក្សារបស់ទីភ្នាក់ងារ JICA មកកាន់ ប.ស.ស. កម្ពុជា បានបង្ហាញយ៉ាងច្បាស់អំពីការយកចិត្តទុកដាក់រួមចំណែកក្នុងការលើកកម្ពស់កិច្ចសហប្រតិបត្តិការអន្តរជាតិជាមួយកម្ពុជា ជាពិសេសលើការសិក្សាឈ្វេងយល់ ប្រមូលទិន្នន័យ និងព័ត៌មានសំខាន់ៗ ពាក់ព័ន្ធទៅនឹងប្រព័ន្ធសន្តិសុខសង្គមកម្ពុជា ដើម្បីវិភាគបញ្ហាគន្លឹះ និងកំណត់ចំណុចអាទិភាពផ្សេងៗ ដែលទីភ្នាក់ងារ JICA មានលទ្ធភាពអាចផ្តល់ការឧបត្ថម្ភគាំទ្រដល់ ប.ស.ស. ដើម្បីពង្រឹង និងពង្រីកប្រព័ន្ធសន្តិសុខសង្គមក្នុងប្រទេសកម្ពុជាឱ្យកាន់តែប្រសើរឡើង។
ក្នុងដំណើរទស្សនកិច្ចសិក្សាខាងលើ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាងដ៏ខ្ពង់ខ្ពស់ ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. បានផ្ដល់កិត្តិយសសម្ដែងការស្វាគមន៍យ៉ាងកក់ក្តៅ ចំពោះលោក Tomoya YOSHIDA អគ្គនាយករង ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ដែលបានដឹកនាំក្រុមការងារនៃទីភ្នាក់ងារ JICA មកបំពេញទសន្សកិច្ចសិក្សានៅ ប.ស.ស. កម្ពុជា ចាប់ពីថ្ងៃទី១២-២១ ខែតុលា ឆ្នាំ២០២២នេះ។
ឯកឧត្តមបណ្ឌិត អគ្គនាយករង ប.ស.ស. បានថ្លែងអំណរគុណយ៉ាងជ្រាលជ្រៅដល់ទីភ្នាក់ងារ JICA ដែលបានផ្តល់ការឧបត្ថម្ភគាំទ្រគម្រោងជំនួយអភិវឌ្ឍនានា ក៏ដូចជាការផ្តល់វគ្គបណ្តុះបណ្តាលមកដល់ថ្នាក់ដឹកនាំ មន្ត្រី និងបុគ្គលិកជំនាញនៃ ប.ស.ស. កន្លងមក ។
បច្ចុប្បន្នជាមួយគ្នានេះដែរ ប.ស.ស. ក៏កំពុងសហការជាមួយទីភ្នាក់ងារ JICA លើគម្រោងអភិវឌ្ឍន៍ប្រព័ន្ធបច្ចេកវិទ្យាព័ត៌មាន និងគមនាគមន៍ (ICT) នៃរបបសន្តិសុខសង្គម ក្រោមការអភិវឌ្ឍដោយក្រុមហ៊ុន HITACHI ជប៉ុន និងគម្រោងសហប្រតិបត្តិការបច្ចេកទេសរបស់ទីភ្នាក់ងារ JICA សម្រាប់របបធានារ៉ាប់រងសុខភាពសង្គមសម្រាប់ប្រជាជន ក្នុងវិស័យសេដ្ឋកិច្ចក្រៅប្រព័ន្ធ (SHIP Project) និងគម្រោងជំនួយអភិវឌ្ឍន៍ផ្លូវការ (ODA) នៃប្រព័ន្ធបច្ចេកវិទ្យាព័ត៌មាន និងគមនាគមន៍ (ICT) មកកាន់ ប.ស.ស.។
ជាមួយគ្នានេះ ឯកឧត្តមបណ្ឌិត អគ្គនាយករង ប.ស.ស. បានស្នើឱ្យគ្រប់នាយកដ្ឋានពាក់ព័ន្ធនៃ ប.ស.ស. ត្រូវបង្កើនកិច្ចសហប្រតិបត្តិការ និងការផ្លាស់ប្ដូរបទពិសោធន៍គ្នា ជាមួយទីភ្នាក់ងារ JICA ដើម្បីពង្រឹង និងពង្រីកប្រព័ន្ធសន្តិសុខសង្គមកម្ពុជាសម្រាប់ប្រជាជនកម្ពុជា ប្រកបដោយភាពជាដៃគូ និងយកចិត្តទុកដាក់ខ្ពស់បំផុត ដើម្បីពង្រឹងទំនាក់ទំនងរវាងអង្គភាពទាំងពីរ លើផ្នែកមួយនេះ ឱ្យបានកាន់តែប្រសើរឡើង ប្រកបដោយប្រសិទ្ធភាពខ្ពស់ សមធម៌ និងមាននិរន្តរភាព។
សូមបញ្ជាក់ថា៖ កិច្ចប្រជុំពិភាក្សាខាងលើប្រព្រឹត្តទៅ នាព្រឹកថ្ងៃទី១៣ ខែតុលា ឆ្នាំ២០២២ នៅសាលប្រជុំធំ ស្នាក់ការកណ្ដាល ប.ស.ស. រាជធានីភ្នំពេញ ដោយមានការចូលរួមពីថ្នាក់ដឹកនាំ មន្រ្តី និងបុគ្គលិករបស់នាយកដ្ឋានជំនាញ នៃប.ស.ស. និងទីភ្នាក់ងារ JICA សរុបប្រមាណជា ២០រូប តាមរយៈប្រព័ន្ធវីដេអូអនឡាញ ៕
