ថ្នាក់ដឹកនាំ បុគ្គលិកគ្រូបង្រៀននៃសាលាអន្តរជាតិ ស៊ី អាយ អេ ហ្វឺសត៍ ជាង ១០០នាក់ ទទួលបានការ ផ្សព្វផ្សាយរបបសន្ដិសុខសង្គមផ្នែកប្រាក់សោធន ពី ប.ស.ស.
ភ្នំពេញ៖ ឆ្លើយតបទៅនឹងការស្នើសុំរបស់សាលាអន្តរជាតិ ស៊ី អាយ អេ ហ្វឺសត៍ កាលពីពេលកន្លងទៅ នៅរសៀលថ្ងៃពុធ ទី១២ ខែតុលា ឆ្នាំ២០២២ នេះ ដោយទទួលបានការអនុញ្ញាតពីសំណាក់ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. លោក អ៊ុក សំអូន ប្រធាននាយកដ្ឋានសេវាអតិថិជន និងទំនាក់ទំនងសាធារណៈ នៃ ប.ស.ស. បានអញ្ជើញធ្វើបទបង្ហាញស្ដីពី របបសន្តិសុខសង្គមផ្នែកប្រាក់សោធន ជូនដល់ថ្នាក់ដឹកនាំ និងបុគ្គលិក សាលាអន្តរជាតិ ស៊ី អាយ អេ ហ្វឺសត៍ សរុបប្រមាណជាង ១០០នាក់។
ក្នុងបទបង្ហាញខាងលើ លោកប្រធាននាយកដ្ឋាន បានបញ្ជាក់យ៉ាងច្បាស់ថា៖ របបសន្ដិសុខសង្គមផ្នែកប្រាក់សោធន គឺជាកាតព្វកិច្ចដែលត្រូវចូលរួមអនុវត្តក្នុងការបង់ភាគទាន ៤% នៃប្រាក់ឈ្នួលរបស់បងប្អូននិយោជិត ដែលក្នុងនោះនិយោជកចូលរួមបង់ភាគទាន ២% និងបងប្អូននិយោជិតបង់ភាគទានដែលជាចំណែកខ្លួនឯង ២%ផងដែរ ដោយឡែកអត្ថប្រយោជន៍ដែលបងប្អូននិយោជិតនិងទទួលបានមកវិញគឺ ៤% ពេញតែម្ដង។
លោកប្រធាននាយកដ្ឋាន បានបន្ដទៀតថា៖ ការចូលរួមចំណែក ២% ជាកាតព្វកិច្ចរបស់ភាគីនិយោជកនេះ គឺជាការជួយលើកទឹកចិត្តដល់កម្មករនិយោជិតដែលបម្រើការងារនៅក្នុងសហគ្រាស គ្រឹះស្ថានរបស់ខ្លួនឱ្យមានការខិតខំប្រឹងប្រែងក្នុងការបំពេញការងារបន្ថែមទៀតដើម្បីបង្កើនផលិតភាពការងារឱ្យកាន់តែរីកចម្រើននិងនិរន្ដរ៍ភាពការងាររបស់បងប្អូនផ្ទាល់តែម្ដង។
លោកប្រធាននាយកដ្ឋាន បានបន្ថែមទៀតថា៖ នៅពេលដែលបងប្អូនដល់អាយុចូលនិវត្តន៍ ប.ស.ស. និងបើកប្រាក់សោធនជូនបងប្អូនជារៀងរាល់ខែ ដោយក្នុងមួយខែបើកជូនពីរដង ហើយអ្វីដែលសំខាន់នោះគឺបងប្អូននឹងទទួលបានសេវាថែទាំសុខភាពដោយឥតគិតថ្លៃពី ប.ស.ស. ផងដែរ៕
