មន្ត្រីជាន់ខ្ពស់ក្រសួងការងារ៖ បេសកម្មចម្បងដែលក្រសួងការងារទទួលពីរាជរដ្ឋាភិបាល គឺទទួលបន្ទុកទៅលើវិស័យចំនួន៣
ភ្នំពេញ៖ រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម ហេង សួរ បានលើកឡើងថា បេសកម្មជាចម្បងដែលក្រសួងការងារ និងបណ្ដុះបណ្ដាលវិជ្ជាជីវៈបានទទួលអាណត្តិពីរាជរដ្ឋាភិបាលគឺទទួលបន្ទុកទៅលើវិស័យចំនួន៣គឺ វិស័យការងារ វិស័យបណ្តុះបណ្តាលវិជ្ជាជីវៈ និងវិស័យសន្តិសុខសង្គម។
ឯកឧត្ដមបានថ្លែងបែបនេះ នៅក្នុងសន្និសីទសារព័ត៌មានស្ដីពីសមិទ្ធផលសម្រេចបានរយៈពេល៥ឆ្នាំកន្លងមករបស់ក្រសួងការងារ នៅព្រឹកថ្ងៃទី១២ ខែតុលា ឆ្នាំ២០២២។
ឯកឧត្តម ហេង សួរបានឲ្យដឹងថា វិស័យទាំង៣ខាងលើនេះផ្គុំគា្នទៅពាក់ពន្ធ័ទៅនឹងតួអង្គ២សំខាន់នៅក្នុងសេដ្ឋកិច្ចជាតិរបស់យើងគឺ៖១.ពាក់ពន្ធ័ទៅនឹងតួអង្គដែលជាអ្នកផ្ដល់ការងារធ្វើ។ ២.ពាក់ពន្ធ័ទៅនឹងកម្លាំងពលកម្មដែលអាចជាកម្មករនិយោជិកដែលធ្វើការនៅតាមរោងចក្រសហគ្រាស។
ឯកឧត្តមរដ្ឋលេខាធិការ បានបន្តថា ដើម្បីអនុវត្តអាណត្តិក៏ដូចជាបំពេញនូវតួនាទីខាងផ្នែកសេដ្ឋកិច្ចនិងសង្គមកិច្ចនេះ ក្រសួងការងារ និងបណ្តុះបណ្តាលវិជ្ជាជីវៈមានលិខិតបទដ្ឋានកិត្តិយុត្តជាគោលមួយចំនួនដែលនៅក្នុងនោះបើយើងគិតអំពីក្របខ័ណ្ឌគោលនយោបាយគឺក្រសួងមានភារកិច្ចក្នុងការអនុវត្តនូវគោលនយោបាយជាតិស្ដីពីមុខរបរនិងការងារឆ្នាំ២០១៥ ដល់ឆ្នាំ២០២៥,គោលនយោបាយជាតិស្ដីពីបណ្ដុះបណ្ដាលបច្ចេកទេសនិងបណ្ដុះបណ្ដាលវិជ្ជាជីវៈឆ្នាំ២០១៧ ដល់ឆ្នាំ២០២៥,គោលនយោបាយជាតិស្តីពីទេសន្តប្រវេសន៍សម្រាប់ប្រទេសកម្ពុជាឆ្នាំ២០១៩ ដល់ឆ្នាំ២០២៣ និងផែនការយុទ្ធសាស្ត្រអភិវឌ្ឍន៍វិស័យការងារនិងបណ្តុះបណ្តាលវិជ្ជាជីវៈឆ្នាំ២០១៩ ដល់ឆ្នាំ២០២៣ ដែលនៅក្នុងផែនការយុទ្ធសាស្ត្រនេះយើងមានយុទ្ធសាស្រ្តស្នូលចំនួន៥ ហើយយុទ្ទសាស្រ្តទាំង៥នេះគឺក្ដោបទៅលើច្បាប់ចំនួន៤ ដែលយើងកំពុងអនុវត្តរួមមាន៖១.ច្បាប់ស្ដីពីការងារ, ២.ច្បាប់ស្ដីពីរបបសន្តិសុខសង្គម, ៣.ច្បាប់ស្ដីពីសហជីប, ៤.ច្បាប់ស្ដីពីប្រាក់ឈ្នួលអប្បបរមា។
ទន្ទឹមនឹងនេះឯកឧត្តមរដ្ឋលេខាធិការ បានបន្ថែមថាយើងកំពុងតែរៀបចំសេចក្ដីព្រាងច្បាប់ចំនួន៣ផ្សេងទៀតដើម្បីធ្វើយ៉ាងណាឲវិស័យការងារ វិស័យសន្តិសុខសង្គម និងវិស័យបណ្តុះបណ្តាលបច្ចេកទេសនិងវិជ្ជាជីវៈកាន់តែមានភាពគ្រប់ជ្រុងជ្រោយនិងមានយុន្តកាលបទដ្ឋានកិត្តិយុត្តស្របបានតាមបទដ្ឋានអន្តរជាតិគឺ៖ន១.ច្បាប់ស្ដីពីអប់រំបណ្តុះបណ្តាលបច្ចេកទេស និងវិជ្ជាជីវៈ, ២.ច្បាប់ស្ដីពីសុខភាព និងសុវត្ថិភាពការងារ, ៣.ច្បាប់ស្ដីពីទេសន្តរប្រវេសន៍ការងារ៕
