ក្រសួងវប្បធម៌នឹងរៀបចំមហោស្រពភាពយន្តជាតិខ្នាតខ្លីកម្ពុជាលើកទី៣ឆ្នាំ២០២២ ចាប់ពីថ្ងៃទី១៦ដល់ថ្ងៃទី២០ខែធ្នូចុងឆ្នាំនេះ
ភ្នំពេញ៖ ក្រសួងវប្បធម៌និងវិចិត្រសិល្បៈ នឹងរៀបចំមហោស្រពភាពយន្តជាតិខ្នាតខ្លីកម្ពុជា លើកទី៣ ឆ្នាំ២០២២ ក្រោមពាក្យស្លោក «ភាពយន្តខ្នាតខ្លីជាជំហានឆ្ពោះទៅកាន់ភាពយន្តខ្នាតវែង» ចាប់ពីថ្ងៃទី១៦ ដល់ថ្ងៃទី២០ ខែធ្នូ ឆ្នាំ២០២២ នៅសាលសន្និសីទចតុម្មុខ ខណៈដែលមហោស្រពនេះបានខកខានរៀបចំ ២ឆ្នាំហើយ ដោយសារតែជំងឺរាតត្បាតជាសកលកូវីដ១៩។
ការជូនដំណឹងនេះធ្វើឡើងក្នុង សន្និសីទសារព័ត៌មាន ស្តីពីការរៀបចំមហោស្រពភាពយន្តជាតិខ្នាតខ្លីកម្ពុជា លើកទី៣ នៅសណ្ឋាគារ Rosewood រាជធានីភ្នំពេញ នាព្រឹកថ្ងៃទី៧ ខែតុលា ឆ្នាំ២០២២ ដោយមានការចូលពីឯកឧត្តម ស៊ិន ចន្ទសាយ៉ា ទីប្រឹក្សាក្រសួងវប្បធម៌ និងវិចិត្រសិល្ប: , លោក ឯក ប៊ុនថា អគ្គនាយករង នៃ អគ្គនាយកដ្ឋានបច្ចេកទេសវប្បធម៌ ,លោក ប៉ុក បូរក្ស ប្រធាននាយកដ្ឋានសិល្ប:ភាពយន្ត និងផ្សព្វផ្សាយវប្បធម៌, លោក Deependra Chuachan ទីប្រឹក្សានាយកដ្ឋានសិល្បៈភាពយន្ត និងផ្សព្វផ្សាយវប្បធម៌ និងដៃគូគាំទ្រសរុបប្រមាណ៦០នាក់។
លោក ប៉ុក បូរក្ស ប្រធាននាយកដ្ឋានភាពយន្ត និងផ្សព្វផ្សាយវប្បធម៌ បានមានប្រសាសន៍ថា ការរៀបចំមហោស្រពភាពយន្តជាតិខ្នាតខ្លីកម្ពុជានេះ ដើម្បីជំរុញលើកទឹកចិត្តយុវជន អភិវឌ្ឍសមត្ថភាពច្នៃប្រឌិត រួមចំណែកអភិវឌ្ឍវិស័យភាពយន្តកម្ពុជា។
សំឡេង៖ « គោលបំណងផ្តល់ការណែនាំប្រកបដោយភាពច្នៃប្រឌិត និងការគាំទ្រផ្នែកគ្រឿងបរិក្ខារ ដល់ផលិតករភាពយន្តដែលចាប់អារម្មណ៍ក្នុងការផលិតភាពយន្តដើម្បីដាក់ចូលរួមក្នុងការប្រកួតប្រជែងក្នុងឱកាសមហោស្រពជាតិភាពយន្តខ្នាតខ្លីនេះ គណៈកម្មការរៀបចំមហោស្រពនឹងរៀបចំកម្មវិធីបណ្តុះបណ្តាលភាពយន្តចាប់ពីថ្ងៃទី១០ដល់ថ្ងៃទី២៨ខែតុលា ឆ្នាំ២០២២»។
មហោស្រពជាតិភាពយន្តខ្នាតខ្លីកម្ពុជាត្រូវបានបង្កើតឡើងឆ្លាស់គ្នាជាមួយនឹងមហោស្រពជាតិភាពយន្តខ្នាតវែងកម្ពុជា រៀងរាល់២ឆ្នាំម្ដង ដោយក្រសួងវប្បធម៌និងវិចិត្រសិល្បៈ ដែលមាននាយកដ្ឋានភាពយន្ត និងផ្សព្វផ្សាយវប្បធម៌ ជាសេនាធិការ។ មហោស្រពជាតិភាពយន្តខ្នាតខ្លីកម្ពុជា លើកទី២ ប្រារព្ធឡើងនៅឆ្នាំ២០១៨តែខកខាននៅឆ្នាំ២០២០ ខណៈមហោស្រពជាតិភាពយន្តខ្នាតវែងកម្ពុជា ត្រូវបានខកខាននៅឆ្នាំ២០១៩ តែបានរៀបចំនៅឆ្នាំ២០២១ ជាលើកទី៥។
សេចក្តីជូនដំណឹងរបស់ក្រសួងវប្បធម៌ បញ្ជាក់ថា ការរៀបចំមហោស្រពភាពយន្តជាតិខ្នាតខ្លីកម្ពុជា លើកទី៣ ក៏មានការប្រកួតប្រជែង ដោយការទទួលយកខ្សែភាពយន្តខ្នាតខ្លីរបស់ផលិតករ មកវាយតម្លៃផ្តល់ជ័យលាភី និងរង្វាន់ផងដែរ ។ ផុតកំណត់នៃការទទួលពាក្យចូលរួមប្រកួត នៅថ្ងៃទី១៥ ខែវិច្ឆិកា ឆ្នាំ២០២២។
ចំពោះគោលការណ៍វិនិច្ឆ័យជ្រើសរើស និងសិទ្ធិចាក់បញ្ចាំង ស្នាដៃភាពយន្តខ្នាតខ្លីទាំងអស់ ដែលបានចូលរួមនឹងត្រូវដាក់បញ្ចាំងជាសាធារណៈនៅសាលសន្និសីទចតុម្មុខ និងរោងភាពយន្តនានា នៅរាជធានីភ្នំពេញ រយៈពេល ៣ថ្ងៃ ចាប់ពីថ្ងៃទី១៧ ដល់ថ្ងៃទី២០ ខែធ្នូ ឆ្នាំ២០២២។
ក្រសួងវប្បធម៌បានបញ្ជាក់ថា ការប្រកួតប្រជែងនេះ គឺបើកចំហសម្រាប់ផលិតករភាពយន្តកម្ពុជាទាំងអស់ ដែលផលិតភាពយន្តខ្នាតខ្លីមានរយៈពេលមិនលើកពី៣០នាទី ក្នុងរយៈពេល៤ឆ្នាំចុងក្រោយនេះ ។ ចំពោះភាពយន្តដែលផលិតដោយផលិតករបរទេស ក៏មានសិទ្ធិក្នុងការបញ្ចាំងនៅក្នុងកម្មវិធីរបស់មហោស្រពផងដែរ ប៉ុន្តែគ្រាន់តែមិនមានសិទ្ធិក្នុងការចូលរួមប្រកួតប្រជែងយកពានរង្វាន់ឡើយ។
សូមបញ្ជាក់ថាស្នាដៃភាពយន្តដែលត្រូវបានជាប់ជាជ័យលាភីលេខ១ ទទួលបានពានមាស អមដោយថវិកា ១២.០០០.០០០ រៀល, ជ័យលាភីលេខ២ ទទួលបានពានប្រាក់ អមដោយថវិកា ៨.០០០.០០០រៀលនិងជ័យលាភីលេខ៣ ទទួលបានពានសំរិទ្ធ អមដោយថវិកា ៤.០០០.០០០ រៀល។ រង្វាន់លើកទឹកចិត្ត៖ ជ័យលាភីទស្សនិកជន ទទួលបានពានលើកទឹកចិត្ត៕
