ឯកឧត្តម ផាន អូន អញ្ជើញចូលរួមក្នុងកិច្ចប្រជុំលើកទី៥២ របស់អនុគណៈកម្មាធិការវិទ្យាសាស្ត្រ និងបច្ចេកវិទ្យាអាហារអាស៊ាន

ភ្នំពេញ៖ ឯកឧត្តម ផាន អូន ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋាន ក.ប.ប. និងជាប្រធានអនុគណៈកម្មាធិការជាតិស្តីពី វិទ្យាសាស្រ្ត និងបច្ចេកវិទ្យាអាហារ (Cambodia COSTI Sub-Committee on Food Science and Technology) នៅថ្ងៃទី៦ ខែតុលា ឆ្នាំ២០២២ បានអញ្ជើញចូលរួមក្នុងកិច្ចប្រជុំ លើកទី៥២ នៃអនុគណៈកម្មាធិការវិទ្យាសាស្ត្រ និងបច្ចេកវិទ្យាអាហារអាស៊ាន “The 52nd Meeting of the Sub-Committee on Food Science and Technology – SCFST-52” ដែលបានរៀបចំឡើងតាមរយៈប្រព័ន្ធវីឌីអូអនឡាញ Zoom។

អង្គប្រជុំបានប្រព្រឹត្តឡើង ដោយធ្វើការពិភាក្សាលើរបៀបវារៈចំនួន ៧រួមមាន៖
១. ការអនុម័តរបៀបវារៈ
២. ចំណុចសំខាន់នៃកិច្ចប្រជុំលើកទី៥១ នៃអនុគណៈកម្មាធិការ និងលទ្ធផលនៃកិច្ចប្រជុំពាក់ព័ន្ធផ្សេងៗ
៣. ស្ថានភាពនៃគម្រោង សកម្មភាព និងគំនិតផ្តួចផ្តើមផ្សេងៗរបស់អនុគណៈកម្មាធិការ
៤. ផែនការសកម្មភាពរបស់អនុគណៈកម្មាធិការសម្រាប់ឆ្នាំ ២០១៦-២០២៥
៥. បញ្ហាផ្សេងៗ
៦. ពេលវេលា និងទីតាំងសម្រាប់កិច្ចប្រជុំលើកទី៥៣ របស់អនុគណៈកម្មាធិការ
៧. ការពិចារណា និងការអនុម័តលើរបាយការណ៍ នៃកិច្ចប្រជុំលើកទី៥២ របស់អនុគណៈកម្មាធិការ

កិច្ចប្រជុំនេះត្រូវបានរៀបចំឡើង ដោយលេខាធិការដ្ឋានអាស៊ាន ដឹកនាំកិច្ចប្រជុំដោយប្រទេសឥណ្ឌូនេស៊ី និងមានការចូលរួមពីសមាជិក អនុកម្មាធិការមកពីបណ្តាប្រទេសផ្សេងៗ ក្នុងតំបន់អាស៊ាន សមាជិកនៃអនុគណៈកម្មាធិការជាតិស្តីពី វិទ្យាសាស្រ្ត និងបច្ចេកវិទ្យាអាហារ និងសហការីនៃអគ្គនាយកដ្ឋាន ក.ប.ប.៕