ប្រធានក្រុមប្រឹក្សាខេត្ត និង អភិបាលខេត្តត្បូងឃ្មុំ ដឹកនាំប្រតិភូថ្នាក់ខេត្ត អញ្ជើញគោរពវិញ្ញាណក្ខន្ធសព មហាឧបាសិកា ទន់ ធី

ភ្នំពេញ៖ ឯកឧត្តម ស៊ាន ឡេង ប្រធានក្រុមប្រឹក្សាខេត្ត និងឯកឧត្តមបណ្ឌិត ជាម ច័ន្ទសោភ័ណ អភិបាលខេត្តត្បូងឃ្មុំ ព្រមទាំងមន្ទីរ/អង្គភាពជុំវិញខេត្ត នាថ្ងៃទី៣០ ខែកញ្ញា ឆ្នាំ២០២២នេះ បានដឹកនាំគណៈប្រតិភូថ្នាក់ខេត្ត អញ្ជើញគោរពវិញ្ញាណក្ខន្ធសព ព្រឹទ្ធមហាឧបាសិកាពុទ្ធសាសនូបត្ថម្ភក៍ ទន់ ធី ដែលត្រូវជាម្តាយក្មេក ឯកឧត្តមឧបនាយករដ្ឋមន្រ្តី យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងជាប្រធានគណៈកម្មាធិការជាតិជំរុញចលនាភូមិមួយផលិតផលមួយ និងត្រូវជាជីដូនក្មេក ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ដែលបានទទួលមរណភាព នៅថ្ងៃពុធ ៣កើត ខែអស្សុជ ឆ្នាំខាល ចត្វាស័ក ព.ស២៥៦៦ ត្រូវនឹងថ្ងៃទី២៨ ខែកញ្ញា ឆ្នាំ២០២២ វេលាម៉ោង ០០:១៨នាទីរំលងអាទ្រាត ក្នុងជន្មាយុ ៩០ឆ្នាំ ដោយជរាពាធ ស្ថិតនៅភូមិពន្លៃ ឃុំកក់ ស្រុកពញាក្រែក ខេត្តត្បូងឃ្មុំ ។

ក្នុងឱកាសនោះ ឯកឧត្តម ស៊ាក ឡេង ក្រុមប្រឹក្សាខេត្ត និង ឯកឧត្តមបណ្ឌិត អភិបាលខេត្ត និងសហការី អមដំណើរ ក៏បានចូលរួមសម្ដែងនូវសមាណទុក្ខ យ៉ាងក្រៀមក្រំ ជាមួយ ឯកឧត្តម ឧបនាយករដ្ឋមន្ត្រី យឹម ឆៃលី ព្រមទាំង ក្រុមគ្រួសារ សាច់ញ្ញាតិចំពោះ ការបាត់បង់ម្តាយក្មេក ម្តាយបង្កើត ជីដូន ជីដូនទួត ជាទីគោរពស្រលាញ់ ពោរពេញទៅដោយព្រហ្មវិហារធម៌ ដ៏ល្អប្រពៃ និងបានបីបាច់ថែរក្សា ទំនុកបម្រុងបុត្រធីតា ទាំងអស់ ប្រកបដោយការទទួលខុសត្រូវយ៉ាងខ្ពស់ខ្ពស់បំផុត ។

ទន្ទឹមនឹងនោះ ទោះបីរូបកាយរបស់ មហាឧបាសិកា ទន់ ធី បានបាត់បង់ទៅមែនពិត ក៏ប៉ុន្តែ អំពើជាកុសល កិត្តិយស សេចក្តីថ្លៃថ្នូរ និងស្ថិតនៅស្ថិតស្ថេរ ក្នុងសណ្ដានចិត្ត របស់កូន ចៅ និងញ្ញាតិមិត្តជិតឆ្ងាយទាំងអស់ ជានិច្ចនិរន្តរ៍ ។

នាឱកាសនោះដែរ ឯកឧត្តម ក្រុមប្រឹក្សាខេត្ត និង ឯកឧត្តមបណ្ឌិត អភិបាលខេត្តត្បូងឃ្មុំ និងប្រតិភូអមដំណើរ ក៏បានបួងសួងវត្ថុសក្តិសិទ្ធិក្នុងលោក និងតេជៈបារមី នៃព្រះពុទ្ធ ព្រះធម៌ ព្រះសង្ឃ តាមជួយបីបាច់ថែរក្សា ដល់ដួងវិញ្ញាណក្ខន្ធ មហាឧបាសិកា ទន់ ធី បានទៅកាន់សុគតិភព កុំបីឃ្លៀងឃ្លាតឡើយ ៕