ឯកឧត្តម វ៉ី សំណាង អញ្ជើញចុះសួរសុខទុក្ខ និងនាំយកអំណោយមនុស្សធម៌កាកបាទក្រហមកម្ពុជា ចែកជូនពលរដ្ឋងាយរងគ្រោះ៤០គ្រួសារ ស្ថិតនៅឃុំយាយ ម៉ៅពេជ្រនិល ស្រុកភ្នំស្រួច

ភ្នំពេញ៖ ឯកឧត្តម វ៉ី សំណាង អភិបាលនៃគណៈ អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ស្ពឺ ព្រមទាំងសហការី នៅព្រឹកថ្ងៃទី២៨ ខែកញ្ញា ឆ្នាំ២០២២នេះ បានអញ្ជើញចុះសួរសុខទុក្ខ និងនាំយកអំណោយមនុស្សធម៌របស់កាកបាទ ក្រហមកម្ពុជា ទៅចែកជូនប្រជាពលរដ្ឋងាយរងគ្រោះចំនួន៤០គ្រួសារ ស្ថិតនៅឃុំយាយ ម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ។

ឆ្លៀតក្នុងឱកាសនោះ ឯកឧត្តមអភិបាលខេត្ត បានក្រើនរំលឹកដល់ប្រជាពលរដ្ឋដែល រស់នៅតាមតំបន់ទំនាប ដីសណ្ត បណ្តោយដងស្ទឹងព្រែកត្នោត បង្កើនការប្រុងប្រយ័ត្នខ្ពស់ ចំពោះគ្រោះជំនន់ទឹកភ្លៀង ព្រោះវាអាចកើតមានជាយថាហេតុគ្រប់ពេលវេលាក្នុងករណី មេឃនៅតែបន្តភ្លៀងខ្លាំងបន្ថែមទៀតនោះ។

ឯកឧត្តមបន្តថា បើទោះជាក្នុងខណៈនេះ ទឹកជំនន់ស្ទឹងព្រែកត្នោតនៅមិនទាន់ហក់ ឡើងដល់កម្រិតប្រកាសឱ្យប្រុងប្រយ័ត្នក៏ដោយ ប៉ុន្តែជំនន់ទឹកភ្លៀងហូរធ្លាក់ពីតំបន់ភ្នំ នៃភូមិ សាស្រ្តខេត្តកំពង់ស្ពឺ បានធ្វើឱ្យស្ថានភាពទឹកស្ទឹងព្រែកត្នោតជន់ឡើងយ៉ាងឆាប់រហ័សគួរឱ្យ កត់សម្គាល់ ដោយមានការជន់លិចផ្នែកខ្លះនៃតំបន់ទំនាបនៅភូមិសាស្ត្រស្រុកមួយចំនួនក្នុង ខេត្តកំពង់ស្ពឺ។

ជាមួយគ្នានោះ ឯកឧត្តមអភិបាលខេត្ត បានធ្វើការជំរុញឱ្យអាជ្ញាធរគ្រប់លំដាប់ថ្នាក់ត្រូវ ត្រៀមលក្ខណៈរកទីទួលសុវត្ថិភាព ថ្នាំបង្ការ ក៏ដូចជាស្បៀងអាហារ ស្រូវពូជឱ្យបានរួចរាល់ សម្រាប់ត្រៀមបង្ការជូនប្រជាពលរដ្ឋដែលរងគ្រោះដោយជំនន់ទឹកភ្លៀង៕