ឯកឧត្តម អ៊ុន ចាន់ដា ដឹកនាំមន្ត្រីរាជការមន្ទីរ-អង្គភាពជុំវិញខេត្ត និងអាជ្ញាធរមូលដ្ឋាន ចូលរួមក្នុងពិធីកាន់បិណ្ឌ៩ ជាមួយប្រជាពលរដ្ឋយ៉ាងច្រើនកុះករ នៅវត្តភ្នំព្រះវិហារ ក្នុង ស្រុកបាធាយ
ភ្នំពេញ៖ ឯកឧត្តម អ៊ុន ចាន់ដា អភិបាលខេត្តកំពង់ចាម នៅថ្ងៃទី១៩ ខែកញ្ញា ឆ្នាំ២០២២ បានដឹកនាំមន្ត្រីរាជការមន្ទីរ-អង្គភាពជុំវិញខេត្ត និងអាជ្ញាធរមូលដ្ឋាន ចូលរួមក្នុងពិធីកាន់បិណ្ឌ៩ ជាមួយប្រជាពលរដ្ឋយ៉ាងច្រើនកុះករ នៅវត្តភ្នំព្រះវិហារ ស្ថិតក្នុងភូមិបឹងវែង ឃុំតាំងក្រសាំង ស្រុកបាធាយ ។
ក្នុងពិធីកាន់បិណ្ឌ វេនទី៩នេះ ឯកឧត្តមអភិបាលខេត្ត និងមន្ត្រីរាជការក្រោមឱវាទ បាននាំយកទេយ្យវត្ថុ និងបច្ច័យមួយចំនួនប្រគេនព្រះសង្ឃដែលគង់ចាំព្រះវស្សាអស់ត្រីមាស ព្រមទាំងបានរៀបចំប្រារព្វពិធីតាមបែបសាសនា ដើម្បីឧទ្ទិសកុសលផលបុណ្យ ជូនដល់បុព្វការីជនទាំងប្រាំពីរសណ្ដាន ដែលបានចែកឋានទៅកាន់បរលោក និងបានបួងសួងសូមឱ្យវត្ថុស័ក្កិសិទ្ធិទាំងពួង តាមជួយថែរក្សាទំនុកបម្រុងចម្រុងចម្រើនដល់មន្ត្រីរាជការក្នុងខេត្ត ក៏ដូចជាបងប្អូនប្រជាពលរដ្ឋខ្មែរទាំងអស់ ជាពិសេសតាមជួយថែរក្សាប្រទេសជាតិយើង ឱ្យមានសុខសន្តិភាព និងការអភិវឌ្ឍរីកចម្រើន។
ជាមួយគ្នានោះ ឯកឧត្តមអភិបាលខេត្ត ព្រមទាំងមន្ត្រីរាជការចូលរួមទាំងអស់ បានរាប់បាត្រ បង្សុកូល វេរភត្តាហា ប្រគេនព្រះសង្ឃ និងពហូទេវា ដាឆ្លងជាកិច្ចបង្ហើយបុណ្យ និងបានប្រគេនទ័យទានជាច្រើនមុខ មានដូចជា អង្គរ ១០០ គីឡូក្រាម, មី ១កេសធំ, ទឹកដោះគោខាប់ ១កេសធំ, ត្រីខ ១ កេស, ទឹកត្រី ៥ យួរ, ទឹកស៊ីអ៊ីវ ៥យួរ , ទឹកសុទ្ធ ៥កេស, តែ ៥ គីឡូ, ស្ករស ៥ គីឡូ , បាយ ម្ហូប និងផ្លែឈើ និងបច្ច័យសម្រាប់កសាងជាង ៥ លានរៀលផងដែរ ។
ស្ថិតក្នុងឱកាសដ៏ប្រសើរនោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានទូលប្រគេនតបទៅនឹងសំណូមពររបស់លោកគ្រូព្រះចៅអធិការវត្តភ្នំព្រះវិហារ ដែលបានសំណូមពរឲ្យរដ្ឋបាលខេត្ត ជួយស្ថាបនាផ្លូវចូលវត្ត ប្រវែងប្រមាណជា ៦,០០០ ម៉ែត្រ ថា ផ្លូវនោះ គឺមានគម្រោងសាងសង់ហើយ។ ឯកឧត្តមអភិបាលខេត្ត ក៏បានគូសបញ្ជាក់ទៀតថា គម្រោងផ្លូវនេះ ប្រជាពលរដ្ឋ និងទទួលបានសមិទ្ធផល នៅមុនពិធីបុណ្យចូលឆ្នាំខ្មែរ ឆ្នាំ ២០២៣ ខាងមុខ។
ក្នុងឱកាសនោះ ឯកឧត្តម អភិបាលខេត្ត បាននាំយកអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់លោកយាយ លោកតា និងពុទ្ធបរិស័ទដែលអញ្ជើ់ញមកចូលរួមកាន់បិណ្ឌទី៩ ចំនួន ៦០០នាក់ ដោយក្នុងម្នាក់ៗ ជូនសារ៉ុង ១ និងថវិកា ១០.០០០រៀល ៕
