សមាគមអតីតយុទ្ធជនកម្ពុជា ខេត្តកណ្តាលនាំយក ថវិកាបេឡាមរណៈសង្គ្រោះ ប្រគល់ជូនគ្រួសារសពយោធិន (មុខសញ្ញាពិការ)
ភ្នំពេញ៖ លោកវរសេនីយ៍ឯក ឈៀ វណ្ណឌី មេបញ្ជាការរង នៅថ្ងៃទី១៤ ខែកញ្ញា ឆ្នាំ២០២២ បានដឹកនាំក្រុមការងារ ជាប្រធាន អនុប្រធានសមាគមន៍អតីតយុទ្ធជន ស្រុកខ្សាច់កណ្តាល និង សមាគមអតីតយុទ្ធជន ក្រុងតាខ្មៅ នាយទាហានក្នុងទីបញ្ជាការ បាននាំយកថវិកាបេឡាមរណៈសង្គ្រោះ រួមនិងលិខិតចូលរួមរំលែកមរណទុក្ខ ជូនដល់គ្រួសារសពអតីតយុទ្ធជនចំនួន ៤.០០០,០០០រៀលជូនដល់គ្រួសារសពលោក កែវ លន់ (មុខសញ្ញាពិការ) ដែលមានទីតាំងស្ថិតក្នុងភូមិស៊ីធរកើត ឃុំស៊ីធរ ស្រុកខ្សាច់កណ្ដាល ខេត្តកណ្តាល។
ជាមួយគ្នានេះដែរ ក្រុមការងារ ក៏បាននាំមកជាមួយនូវ បច្ច័យបាពីការចូលរួមរបស់ នាយទាហាន នាយទាហានរង ទូទាំងតំបន់ប្រតិបត្តិការសឹករងកណ្តាល សរុបចំនួន ២.១៥០,០០០រៀល និង អង្ករ គ្រឿងឧបភោគបរិភោគ និងសម្ភារៈផ្សេងទៀត ដែលជាអំណោយរបស់ប្រធាន សមាគមអតីតយុទ្ធជនខេត្តកណ្តាល យកទៅចែកជូនដល់ក្រុមគ្រួសារសពផងដែរ។
ក្រុមគ្រួសារសពអតីតយុទ្ធជនកម្ពុជាស្រុកខ្សាច់កណ្តាល បានថ្លែងអំណរគុណយ៉ាងជ្រាលជ្រៅចំពោះសម្តេចតេជោ នាយករដ្ឋមន្ត្រី ប្រធានសមាគមអតីតយុទ្ធជនកម្ពុជា ឯកឧត្តម អគ្គលេខាធិការសមាគម ឯកឧត្តមប្រធានសមាគមអតីតយុទ្ធជនកម្ពុជាខេត្តកណ្តាល និងក្រុមការងារថ្នាក់ខេត្ត អាជ្ញាធរមូលដ្ឋាន ដែលជានិច្ចកាលតែងតែគិតគូរពីសុខទុក្ខប្រជាពលរដ្ឋគ្រប់កាលៈទេសៈ គ្រប់ទីកន្លែង ៕
