ឯកឧត្តម អ៊ុ ម៉ារ៉ា រដ្ឋលេខាធិការក្រសួងមហាផ្ទៃ អញ្ជើញប្រកាសចូលកាន់តំណែង អភិបាលរងខេត្តកំពង់ធំ ចំនួន៤រូប និងនាយករដ្ឋបាល ១រូប

ភ្នំពេញ៖ ឯកឧត្តម អ៊ុ ម៉ារ៉ា រដ្ឋលេខាធិការក្រសួងមហាផ្ទៃ តំណាងសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃនៅរសៀលថ្ងៃទី២៦ ខែសីហា ឆ្នាំ២០២២ បានអញ្ជើញចូលរួមជាអធិបតីក្នុងពិធីប្រកាសចូលកាន់តំណែងអភិបាលរងខេត្តចំនួន ៤រូបនិងនាយករដ្ឋបាលខេត្តចំនួន១រូប។

អញ្ជើញចូលរួមក្នុងពិធីនេះមានឯកឧត្តម ងួន រតន: អភិបាលខេត្តកំពង់ធំ, ឯកឧត្តម ឈុន ឈន់ ប្រធានក្រុមប្រឹក្សាខេត្ត ប្រតិភូអមដំណើរព្រមទាំងជួរថ្នាក់ដឹកនាំ មន្ត្រីរាជការកងកម្លាំងប្រដាប់អាវុធគ្រប់ប្រភេទ និងអាជ្ញាធរ ស្រុក ក្រុង និងឃុំ សង្កាត់ ជាច្រើនរូប។

យោងតាមអនុក្រឹត្យ ស្តីពីការតែងតាំងមន្រ្តីរាជការ ដែលបានចុះហត្ថលេខា ដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃកម្ពុជា បានកំណត់តែងតាំង មន្រ្តីរាជការចំនួន០៤រូប ជាអភិបាលរងនៃគណអភិបាលខេត្តកំពង់ធំនិងនាយករដ្ឋបាលសាលាខេត្ត១រូប រួមមាន ៖ ១.ឯកឧត្តម អ៊ុន បុត្ត អភិបាលរងខេត្ត ២.ឯកឧត្តម ងួន រាសី អភិបាលរងខេត្ត ៣.ឯកឧត្តម ជា វ៉ាន់ចាន់ អភិបាលរងខេត្ត ៤.ឯកឧត្តម លី វេត អភិបាលរងខេត្ត ៥.ឯកឧត្តម ម៉ាក់ ប៊ុនហុង នាយករដ្ឋបាលសាលាខេត្ត។

ថ្លែងនាឱប្រកាសនោះ ឯកឧត្តម ងួន រតន: បានលើកឡើងអំពីសកម្មភាព និងសមិទ្ធផលនានាក្នុងខេត្តទាំងអស់កើតឡើងពីការខិតខំប្រឹងប្រែង រួមគ្នារវាងថ្នាក់ដឹកនាំខេត្ត និងមន្ទីរអង្គភាពជំនាញជុំវិញខេត្តផងដែរ ។

ឯកឧត្តមបន្តទៀតថា កិច្ចការអភិវឌ្ឍន៍ទាំងអស់គឺមានគោលបំណងបម្រើរផលប្រយោជន៍ទូទៅ បង្កើតការងារ និងបង្កើន ប្រាក់ចំណូល ជូនប្រជាពលរដ្ឋ ស្របតាមយុទ្ធសាស្រ្តកាត់បន្ថយភាពក្រីក្ររបស់រាជរដ្ឋាភិបាលជូនប្រជាពលរដ្ឋ។

ឯកឧត្តម អ៊ុ ម៉ារ៉ា បានឱ្យដឹងដែរថា ក្នុងនាមជាថ្នាក់ដឹកនាំខេត្ត ត្រូវតែប្រឹងប្រែងអភិវឌ្ឍន៍ខេត្តឱ្យល្អ និងត្រូវគិតគូរពីបញ្ហាមួយចំនួនដូចជា ទប់ស្កាត់ និងបង្ការការរីករាលដាលនៃជំងឺកូវីដ១៩ បន្តទៀតត្រូវពិនិត្យ និងដោះស្រាយរាល់ជំលោះ តម្រូវការរបស់ប្រជាពលរដ្ឋឱ្យបានត្រឹមត្រូវ ច្បាស់លាស់ និងទាន់ពេលវេលា ជាពិសេសខិតខំទប់ស្កាត់ និងបង្រ្កាបឱ្យបានបញ្ហាគ្រឿងញៀន។

ឯកឧត្តមក៏បានសំដែងនូវការកោតសរសើរចំពោះកិច្ចខិតខំប្រឹងប្រែង របស់គណអភិបាលខេត្ត មន្រ្តីរាជការជុំវិញខេត្ត បានសហការគ្នាក្នុងការអភិវឌ្ឍឱ្យខេត្ត មានការរីកចម្រើនគួរឱ្យកត់សម្គាល់ និងបានសំណូមពរដល់ក្រុមប្រឹក្សាខេត្ត គណៈអភិបាលខេត្ត កងកម្លាំងទាំងបី អាជ្ញាធរគ្រប់ជាន់ថ្នាក់ ផ្តល់នូវការគាំទ្រ និងមានកិច្ច សហការល្អជាមួយគ្នា ដើម្បីដឹកនាំ និងកសាងខេត្តឱ្យទទួលបានជោគជ័យបន្តទៀតផងដែរ។

ឯកឧត្តមរដ្ឋលេខាធិការបានបន្ថែមថា ពិធីប្រកាសនាពេលនេះ គឺជាការឆ្លុះបញ្ចាំង និងបញ្ជាក់យ៉ាងច្បាស់ អំពីការយកចិត្តរបស់ថ្នាក់ដឹកនាំគ្រប់លំដាប់ថ្នាក់ ចំពោះមន្ត្រីរាជការក្រោមឱវាទ ជាពិសេសចំពោះយើងខ្ញុំផ្ទាល់ ដើម្បីឱ្យពួកយើងមានឱកាសចូលរួមដឹកនាំ និងគ្រប់គ្រងឲ្យបានកាន់តែប្រសើឡើង នូវគុណភាពនៃការសម្រេចចិត្ត គុណផលការងារ និងគំនិតច្នៃប្រឌិតថ្មីៗ ក្នុងការអភិវឌ្ឍន៍ខេត្តកំពង់ធំឱ្យកាន់តែរីកចំរើនបន្ថែមទៀត។

ក្នុងនោះដែរឯកឧត្តមអភិបាលរងខេត្ត និងនាយករដ្ឋសាលាខេត្តបានប្តេជ្ញាចិត្តដូច្នេះថា យើងខ្ញុំ(អភិបាលរងខេត្ត នាយករដ្ឋបាលសាលាខេត្ត) ចូលរួមក្នុង ការងារអភិវឌ្ឍន៍ប្រទេសជាតិ និងបម្រើប្រទេសជាតិ។ អនុវត្តយ៉ាងខ្ជាប់ខ្ជួន តាមបទបញ្ជារបស់រាជរដ្ឋាភិបាល ក្រសួងមហាផ្ទៃ និង ថ្នាក់ដឹកនាំគ្រប់លំដាប់ថ្នាក់ ខិតខំបំពេញការងារតាមតួនាទី និងភារកិច្ច ។ ខិតខំពង្រឹងកិច្ចសហប្រតិបត្តិការ និងអនុវត្តភារកិច្ចដើម្បីសម្រេចបាននូវសមិទ្ធ ផលធំៗថែមទៀត ។ ចូលរួមចំណែកលើកកម្ពស់សេវាសង្គម កសាង និងពង្រីកហេដ្ឋារចនាសម្ព័ន្ធ សាធារណៈ ។ រួមចំណែកធានានិរន្តរភាពកិច្ចការរដ្ឋបាលខេត្ត និងការផ្តល់សេវាសាធារណៈ ឲ្យកាន់តែប្រសើរឡើង។ បង្កើនសាមគ្គីភាពផ្ទៃក្នុង និងបង្កើនទំនាក់ទំនងល្អជាមួយ មន្ទីរ-អង្គភាព ជំនាញជុំវិញខេត្ត ។ ចូលរួមយ៉ាងសកម្មជំរុញការអភិវឌ្ឍក្នុងខេត្តកំពង់ធំ ឲ្យកាន់តែរីកចម្រើនថែមទៀត៕