ថ្នាក់ដឹកនាំអគ្គលេខាធិការដ្ឋានរដ្ឋសភា គោរពជូនពរសម្តេចរដ្ឋសភាធិបតី ប្រធានរដ្ឋសភា ក្នុងឱកាសអបអរសាទរទិវាអន្តរជាតិនារី ៨ មីនា លើកទី១១៥
ភ្នំពេញ៖ នៅក្នុងឱកាសអបអរសាទរទិវាអន្តរជាតិនារី ៨ មីនា លើកទី១១៥ ដែលនឹងឈានចូលមកដល់ប៉ុន្មានថ្ងៃខាងមុខនេះ នៅព្រឹកថ្ងៃទី៦ ខែមីនា ឆ្នាំ២០២៦ ឯកឧត្តម ឡេង ប៉េងឡុង អគ្គលេខាធិការរដ្ឋសភា បានដឹកនាំប្រតិភូថ្នាក់ដឹកនាំអគ្គលេខាធិការដ្ឋានរដ្ឋសភា តំណាងមន្រ្តីទំាងអស់នៃអគ្គលេខាធិការដ្ឋានរដ្ឋសភា ចូលជួបសម្តែងការគួរសម និងគោរពជូនពរសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៅវិមានរដ្ឋសភា។
ឯកឧត្តមអគ្គលេខាធិការ បានមានប្រសាសន៍ថា សម្តេចប្រធានរដ្ឋសភាបាននិងកំពុងដឹកនាំស្ថាប័នរដ្ឋសភា សម្រេចបាននូវសមិទ្ធផលជាច្រើនគួរជាទីមោទនៈក្នុងការបម្រើប្រទេសជាតិនិងប្រជាពលរដ្ឋ ធ្វើឱ្យរដ្ឋសភាដែលជាស្ថាប័ននីតិប្បញ្ញត្តិមួយតំណាងឱ្យប្រជាជនកម្ពុជាទូទាំងប្រទេស កាន់តែមានកិត្យានុភាពនៅលើឆាកអន្តរជាតិ ក្នុងការចូលរួមលើកកម្ពស់យន្តការសភាដែលយកការសន្ទនានិងផលប្រយោជន៍ប្រជាពលរដ្ឋជាស្នូល។
សម្តេចប្រធានរដ្ឋសភាជាគំរូវីរភាពដ៏ប្រពៃសម្រាប់ស្រ្តីនិងក្មេងស្រីគ្រប់រូប និងជាស្រ្តីដំបូងក្នុងប្រវត្តិសាស្រ្តកម្ពុជាដែលទទួលបានការជ្រើសតំាងពីគណបក្សប្រជាជនកម្ពុជា ឱ្យទទួលភារកិច្ចដ៏សំខាន់ក្នុងការដឹកនាំស្ថាប័នរដ្ឋសភា ហើយបានចូលរួមយ៉ាងសកម្ម និងមោះមុត ក្នុងការលើកស្ទួយសមភាពយេនឌ័រ បង្កើនភាពអង់អាចដល់ស្រ្តី និងកុមារី ដោយបានលើកទឹកចិត្តដល់ពួកគាត់ឱ្យចូលរួមយ៉ាងសកម្មលើការងារសង្គម នយោបាយ សេដ្ឋកិច្ច ទំាងក្នុងនិងក្រៅប្រទេស។
សម្តេចប្រធានរដ្ឋសភា បានវាយតម្លៃខ្ពស់និងកោតសរសើរចំពោះការងាររបស់អគ្គលេខាធិការដ្ឋានរដ្ឋសភា ដែលសម្រេចបានលទ្ធផលការងារធំៗ ជាបន្តបន្ទាប់ ជាពិសេសការធ្វើកំណែទម្រង់និងអភិវឌ្ឍស្ថាប័នសម្រាប់ផ្តល់សេវាជូនតំណាងរាស្រ្ត មានលទ្ធភាពនិងមធ្យោបាយគ្រប់បែបយ៉ាង ក្នុងការបំពេញតួនាទី ភារកិច្ចបម្រើប្រទេសជាតិ និងប្រជាពលរដ្ឋឱ្យបានរហ័ស ប្រកបដោយប្រសិទ្ធភាពនិងប្រសិទ្ធផលកាន់តែប្រសើរឡើង។
សម្តេចបានគូសបញ្ជាក់ថា ការដឹកនាំរបស់សម្តេច ក៏ដូចជាការបំពេញតួនាទីរបស់តំណាងរាស្រ្តគ្រប់រូប នឹងមិនអាចសម្រេចទៅបាន ប្រសិនជាគ្មានការរួមចំណែក និងការគំាទ្រពីថ្នាក់ដឹកនាំនិងមន្រ្តីអគ្គលេខាធិការដ្ឋានរដ្ឋសភានោះ។
ទិវាអន្តរជាតិនារី ៨ មីនា លើកទី១១៥ ឆ្នាំ២០២៦ នេះ ប្រារព្ធធ្វើឡើងក្រោមមូលបទ «សន្តិភាព និងសន្តិសុខ សម្រាប់ស្រ្តី និងគ្រួសារ» ។ សម្តេចប្រធានរដ្ឋសភាបានកត់សម្គាល់ថា មូលបទទិវាសិទ្ធិនារីឆ្នាំនេះ ពិតជាមានសារៈសំខាន់ ស្របនឹងបរិបទជាក់ស្តែងដែលស្រ្តីនិងកុមារីកម្ពុជាទទូចចង់បាន ពីព្រោះស្រ្តីគឺជាអ្នករងគ្រោះខ្លំាងជាងគេ ពីសង្រ្គាមឈា្លនពានមកលើអធិបតេយ្យកម្ពុជាពីសំណាក់ប្រទេសថៃ។ ទិវាប្រកបដោយអត្ថន័យនេះ មិនត្រឹមតែជាការរំលឹកនូវស្មារតីតស៊ូដើម្បីសិទ្ធិសេរីភាព និងសមភាពប៉ុណ្ណោះទេ ប៉ុន្តែគឺជាការសម្តែងនូវការដឹងគុណយ៉ាងជ្រាលជ្រៅបំផុតចំពោះ “មាតានៃពិភពលោក”។ ស្ត្រី គឺជាកម្លាំងចលករដ៏សំខាន់ និងមិនអាចខ្វះបាន ដែលបានលះបង់កម្លាំងកាយចិត្ត ក្នុងការជ្រោមជ្រែងសេដ្ឋកិច្ចគ្រួសារ និងសង្គមជាតិ ឱ្យមានភាពស្រស់បំព្រង។
សម្តេចបានគូសបញ្ជាក់ថា ក្រោយថ្ងៃរំដោះ ៧មករា ឆ្នាំ១៩៧៩ សិទ្ធិស្រ្តីត្រូវបានលើកកម្ពស់ ជាបន្តបន្ទាប់រហូតដល់បច្ចុប្បន្ន។ សម្តេចអគ្គមហាសេនាបតីតេជោ ហ៊ុន សែន ចាត់ទុកស្រ្តីជាឆ្អឹងខ្នងសេដ្ឋកិច្ច និងថា ជួយស្រ្តីដូចជួយខ្លួនឯង។ ចំណែក សម្តេចមហាបវរធិបតី ហ៊ុន ម៉ាណែត បានលើកឡើងថា “ពិភពលោកនឹងកាន់តែមានសុវត្ថិភាព, ស្រស់បំព្រង, និងកក់ក្តៅជាងមុន ប្រសិនបើមានស្ត្រីក្លាយជាអ្នកដឹកនាំកាន់តែច្រើន”៕
