សមាជិករដ្ឋសភា និងព្រឹទ្ធសភា នាំយកអំណោយសម្តេចប្រធានរដ្ឋសភា ចែកជូនវីរៈកងទ័ព និងពលរដ្ឋភៀសសឹក នៅខេត្តព្រះវិហារ
ព្រះវិហារ៖ នៅថ្ងៃទី៤ ខែមករា ឆ្នាំ២០២៦ ឯកឧត្តម មាស សុភា ឧត្តមប្រឹក្សាផ្ទាល់ព្រះមហាក្សត្រ និងជាតំណាងរាស្ត្រមណ្ឌលខេត្តព្រះវិហារ ឯកឧត្តម យស ផានីត្តា ប្រធានគណៈកម្មការទី២ នៃព្រឹទ្ធសភា និងលោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា និងជាប្រធានក្រុមជាតិកម្ពុជា នៃអ្នកនយោបាយសភាស្ត្រី តំណាងដ៏ខ្ពង់ខ្ពស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានអញ្ជើញចុះជួបសំណេះសំណាល សួរសុខទុក្ខ និងនាំយកអំណោយដ៏ថ្លៃថ្លា សម្តេចប្រធានរដ្ឋសភា ចែកជូនវីរៈកងទ័ពចំនួន ៣ទិស និងជនភៀសសឹកចំនួន ៥០០គ្រួសារ នៅភូមិឯកភាព សង្កាត់ប៉ាលហាល ក្រុងព្រះវិហារ ខេត្តព្រះវិហារ។
ពិធីសំណេះសំណាល និងចែកអំណោយនេះ ក៏មានការចូលរួមពី ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ ឯកឧត្តម លោកជំទាវ សមាជិក សមាជិកាគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី (គណៈកម្មការទី៨) នៃរដ្ឋសភា លោកជំទាវសមាជិកាក្រុមសភាជាតិកម្ពុជានៃអ្នកនយោបាយសភាស្ត្រី និងមន្ត្រីអគ្គលេខាធិការដ្ឋានរដ្ឋសភា។
ឯកឧត្តម មាស សុភា បាននាំមកនូវប្រសាសន៍ផ្តាំផ្ញើសាកសួរសុខទុក្ខពី សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានឧត្តមប្រឹក្សាផ្ទាល់ព្រះមហាក្សត្រ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ឯកឧត្តមកិត្តិសេដ្ឋាបណ្ឌិត ជាម យៀម អនុប្រធានទី១រដ្ឋសភា ឯកឧត្តម វង សូត អនុប្រធានទី២រដ្ឋសភា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី នូវការនឹករលឹក គិតគូរអំពីសុខទុក្ខរបស់បងប្អូនប្រជាពលរដ្ឋភៀសសឹក មកកាន់ទីសុវត្ថិភាព ជៀសផុតពីការឈ្លានពានពីសំណាក់យោធាថៃ។
ឆ្លៀតឱកាសនោះ លោកជំទាវ ឡោក ខេង បានថ្លែងអំណរគុណដ៏ជ្រាលជ្រៅបំផុតដល់វីរៈកងទ័ពជួរមុខ ដែលបានលះបង់សាច់ស្រស់ ឈាមស្រស់ និងអាយុជីវិត ដើម្បីការពារបូរណភាពទឹកដី និងសេចក្តីសុខសាន្តរបស់ប្រជាជន ដែលជាការលះបង់ដ៏ធំធេងនេះ គឺជាគុណបំណាច់ពុំអាចកាត់ថ្លៃបាន សម្រាប់ប្រជាជនកម្ពុជា ត្រូវតែគោរពស្រឡាញ់ ដឹងគុណ និងផ្តល់តម្លៃជាវីរបុរស។
លោកជំទាវ ក៏បានថ្លែងសរសើរនូវការដឹកនាំដ៏ឈ្លាសវៃរបស់ ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ ដែលបានខិតខំយកចិត្តទុកដាក់ និងលះបង់កម្លាំងកាយចិត្ត ប្រាជ្ញា ស្មារតី ដើម្បីជួយដោះស្រាយជីវភាពជូនប្រជាជនមូលដ្ឋាន ក៏ដូចជាបងប្អូនជនភៀសសឹកបានយ៉ាងល្អ និងទាន់ពេលវេលា។
ឯកឧត្តម លោកជំទាវ សមាជិក សមាជិការដ្ឋសភា និងព្រឹទ្ធសភាក៏បានជម្រាបជូន អំពីស្ថានការណ៍ទូទៅនៃបញ្ហាព្រំដែនកម្ពុជា-ថៃ និងកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការដោះស្រាយបញ្ហាជូនប្រជាជនតាមបណ្ដោយព្រំដែនដែលរងផលប៉ះពាល់ផ្ទាល់ ជាពិសេស អំពាវនាវដល់បងប្អូនទាំងអស់ត្រូវសាមគ្គី រួមគ្នាជាធ្លុងមួយ និងជឿជាក់លើ សម្តេចតេជោ ប្រធានព្រឹទ្ធសភា សម្តេចធិបតី នាយករដ្ឋមន្ត្រី និងថ្នាក់ដឹកនាំជាតិ ក៏ដូចជាការជឿជាក់លើវីរៈកងទ័ព វីរនគរបាលជួរមុខដ៏អង់អាចក្លាហាន ក្នុងការការពារបូរណភាពទឹកដី និងដែនអធិបតេយ្យកម្ពុជា។
ក្រោយពីសំណេះសំណាល ឯកឧត្តម មាស សុភា លោកជំទាវ ឡោក ខេង ឯកឧត្តម យស ផានីត្តា ព្រមទាំងឯកឧត្តមសមាជិកគណៈកម្មការទី៨ លោកជំទាវជាសមាជិកាសភាជាតិកម្ពុជា នៃអ្នកនយោបាយស្ត្រី បាននាំយកនូវអំណោយម៉ាសការពារផ្សែងពុល ៣.០០០ម៉ាស់ គ្រឿងឧបភោគបរិភោគ ២០១៦កញ្ចប់ ចែកជូនវីរៈកងទ័ព ក្នុងនោះ សម្តេចរដ្ឋសភាធិបតី ឧបត្ថម្ភម៉ាស់ចំនួន ២.០០០ម៉ាស់ និងថវិកា ១០លានរៀល លោកជំទាវ ឡោក ខេង និងឯកឧត្តម យស ផានីត្តា ម៉ាស់ចំនួន ១.០០០ម៉ាស់ ឯកឧត្តម មាស សុភា និងឯកឧត្តម យស ផានីត្តា គ្រឿងឧបភោគបរិភោគចំនួន ២០១៦កញ្ចប់ និងថវិកាចំនួន ៦លានរៀល សម្រាប់វីរៈកងទ័ពបីទិស ដោយមួយទិសទទួលបានថវិកា ២លានរៀល។
លោកជំទាវ ឡោក ខេង បានចែកអំណោយជូនជនភៀសសឹកចំនួន ៥០០គ្រួសារ ដោយក្នុងមួយគ្រួសារទទួលបាន៖ កន្ទេល១ ភួយ១ កន្សែង១ ខោអាវ១កំប្លេ សាប៊ូ២ដុំ សំឡីអនាម័យ២ដុំ ច្រាសនិងថ្នាំដុសធ្មេញ២គូរ សាច់ក្រក១គីឡូក្រាម ស្កសរ១គីឡូក្រាម អំបិល១គីឡូក្រាម ឆៃប៉ូវ១គីឡូក្រាម សៀង១២ដប ទឹកស៊ីអ៊ីវ៦ដប ទឹកក្រូច៦ដប អង្ករ១០គីឡូក្រាម និងថវិកា៥ម៉ឺនរៀល។ ក្នុងនោះថវិកាសមាជិកាសភាជាតិកម្ពុជានៃអ្នកនយោបាយស្ត្រីចំនួន ៧,៥០០,០០០រៀល និងថវិការបស់គណៈកម្មការទី៨នៃរដ្ឋសភាចំនួន ៧,៥០០,០០០រៀល។
គណៈប្រតិភូ ក៏បានចែកជូនកុមារាកុមារី ក្នុងម្នាក់ទទួលបានតុកត្តា១ សៀវភៅអាន២ក្បាល នំស្រួយសូកូឡា២ ដំណាប់ចេក១ថង់ ចាហួយទឹកដោះគោស្រស់២ ច្រាសនិងថ្នាំដុសធ្មេញ២គូរ ខោអាវ១កំប្លេ និងថវិកាចំនួន២ពាន់រៀល។
លោកជំទាវ ក៏បានផ្តាំផ្ញើដល់បងប្អូនភៀសសឹកទាំងអស់ ត្រូវមានអនាម័យ ថែទាំសុខភាពឱ្យបានល្អ និងរស់នៅឱ្យបានស្អាត ចៀសវាងពីជំងឺឆ្លង និងជំងឺដង្កាត់នានា៕
