ក្រុមគ្រូពេទ្យស្ម័គ្រចិត្តសម្តេចពិជ័យសេនា ទៀ បាញ់ ប្រជុំបូកសរុបការងារឆ្នាំ២០២១-២០២២ និងលើកទិសដៅបន្តឆ្នាំ ២០២៣

ភ្នំពេញ៖ ក្រុមគ្រូពេទ្យស្ម័គ្រចិត្តសម្តេចពិជ័យសេនា ទៀ បាញ់ នៅព្រឹកថ្ងៃទី ១ ខែកក្កដា ឆ្នាំ២០២២ បានប្រជុំបូកសរុបការងារឆ្នាំ២០២១-២០២២ និងលើកទិសដៅបន្តឆ្នាំ ២០២៣ ដែលកិច្ចប្រជុំនេះបានប្រព្រឹត្តទៅក្រោមអធិបតីភាព ឧត្តមសេនីយ៍ឯក ស ថាវី អនុរដ្ឋលេខាធិការ ក្រសួងការពារជាតិ និងជាប្រធានក្រុមគ្រូពេទ្យស្ម័គ្រចិត្តសម្តេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ត្រីក្រសួងការពារជាតិ ។

ក្នុងរបាយការណ៍វឌ្ឍភាពការងារចាក់វ៉ាក់សាំង របស់ក្រុមគ្រូពេទ្យស្ម័គ្រចិត្តសម្តេចពិជ័យសេនា ទៀ បាញ់ បានបញ្ជាក់ឱ្យដឹងថា ក្រុមគ្រូពេទ្យស្ម័គ្រចិត្តសម្តេចពិជ័យសេនា ទៀ បាញ់ មានសមាសភាព និង សមាជិក សមាជិការ ដែលមានចំណេះដឹងខ្ពស់ សិស្ស និស្សិតមកពីសាកលវិទ្យាល័យល្បីៗទាំងក្នុងប្រទេស និងអន្តរជាតិ ដែលមកធ្វើការងារស្ម័គ្រចិត្តដើម្បីជួយដល់ សង្គមក្នុងការប្រយុទ្ធប្រឆាំងនឹងជំងឺកូវីដ-១៩ ស្របតាមគោលការណ៍របស់រាជរដ្ឋាភិបាលក្នុងការទប់ស្កាត់ ការរីករាល ដាលជំងឺកូវីដ-១៩ និងកិច្ចចាក់វ៉ាក់សាំងកូវីដ-១៩ ជូនមន្ត្រីរាជការ កងកម្លាំងប្រដាប់អាវុធ បុគ្គលិកវិស័យ ឯកជន និង ប្រជាពលរដ្ឋទូទាំងប្រទេស ។

ក្រុមគ្រូពេទ្យស្ម័គ្រចិត្តសម្តេចពិជ័យសេនា មានគោលការណ៍រួមក្នុងការ ជួយដល់សង្គមជាតិ ប្រយុទ្ធប្រឆាំងនិងជំងឺកូវីដ-១៩។ ទទឹមនេះ បានធ្វើសកម្មភាពការងាររួម ការស្ម័គ្រចិត្តរួម និងផលប្រយោជន៍រួម ដើម្បីទទួលបាន លទ្ធផលល្អប្រសើរ ក្នុងការប្រយុទ្ធប្រឆាំងជំងឺកូវីដ-១៩។

លទ្ធផលការងារជាក់ស្តែងដែលទទួលបាន កន្លងមក ក្រុមគ្រូពេទ្យស្ម័គ្រចិត្តសម្តេចពិជ័យសេនា បានចាក់វ៉ាក់សាំងកូវីដ-១៩ ជូនមន្ត្រីរាជការ បុគ្គលិកវិស័យឯកជន និង ប្រជាពលរដ្ឋនៅរាជធានីភ្នំពេញ បានសរុបចំនួន ១៩៦ ៧៣៦ ដូសទី១ គ្រប់ទីតាំងទាំងអស់ គិតដល់ថ្ងៃទី១៥ ខែមិថុនា ឆ្នាំ ២០២២ ដោយលែកចាប់ពីដូសទី១ដល់ ដូសទី៥ ការចាក់វ៉ាក់សាំងកូវីដ-១៩ សរុបរួមបានចំនួន ៤១៤ ១៣៤ ដូស ដែលមានមណ្ឌល ចាក់វ៉ាក់សាំងកូវីដ-១៩ ចំនួន៣ តំបន់ បានបញ្ចប់បេសកកម្មរបស់ខ្លួនដោយជោគជ័យមកទល់ពេលនេះ។

សូមបញ្ជាក់ថា ក្រុមការងារគ្រូពេទ្យស្ម័គ្រចិត្តសម្តេចពិជ័យសេនា មាន ៥២ក្រុម និង១៥ក្រុម ត្រៀមរួចរាល់ ដើម្បីចូលរួមយុទ្ធនាការចុះចាក់វ៉ាក់សាំងជូនប្រជាពលរដ្ឋនូវទូទាំងប្រទេស ក៏ដូចជាតាមការកំណត់របស់គណៈកម្មការ ចំពោះកិច្ចចាក់វ៉ាក់សាំងកូវីដ-១៩ ក្របខ័ណ្ឌទូទាំងប្រទេស។ ក្រៅពីការចាក់វ៉ាក់សាំងការពារជំងឺកូវីដ-១៩ក្រុមការងារគ្រូពេទ្យស្ម័គ្រចិត្ត សម្តេចពិជ័យសេនាទៀ បាញ់ កាលពីថ្ងៃទី២៣-២៤ ខែមីនា ឆ្នាំ២០២២ កន្លងមក បានចុះប្រឹក្សាពិនិត្យ និង ព្យាបាលជំងឺជូនប្រជាពលរដ្ឋពីរឃុំ គឺនៅមណ្ឌលសុខពាក់ស្នែង ឃុំពាក់ស្នែង ស្រុកអង្គធំ និងមណ្ឌលសុខ ប្រាសាទបាគង ឃុំរលួស ស្រុកប្រាសាទបាគង ខេត្តសៀមរាប សរុបបានចំនួន ៥២៨ នាក់ ក្នុងនោះ កុមារ១០០នាក់។

ថ្លែងបូកសរុបកិច្ចប្រជុំ ឧត្តមសេនីយ៍ឯក ស ថាវី បានសំដែងការកោតសរសើរ និងវាយតំលៃខ្ពស់ ចំពោះ ក្រុមការងារគ្រូពេទ្យស្ម័គ្រចិត្តសម្តេចពិជ័យសេនា ទៀ បាញ់ទាំងអស់ ដែលបានរួមកំលាំងគ្នា ខិតខំបំពេញការងារអស់រយៈពេល ២ ឆ្នាំកន្លងមក ក្នុងការចូលចាក់វ៉ាក់សាំងការពារជំងឺកូវីដ-១៩ និង ចូលរួមចំណែកជាមួយរាជរដ្ឋាភិបាល ក្នុងការថែទាំសុខភាពជូនប្រជាពលរដ្ឋ ដោយបានចុះជួយព្យាបាលជំងឺជូនប្រជាពលរដ្ឋ នៅស្រុកអង្គរធំ និង ស្រុកប្រាសាទបាគង ខេត្តសៀមរាប ។

ឧត្តមសេនីយ៍ឯក ស ថាវី ប្រធានក្រុមគ្រូពេទ្យស្ម័គ្រចិត្តសម្ដេចពិជ័យសេនា ទៀ បាញ់ បានសង្កត់ធ្ងន់ថា : ទោះបីជាជំងឺកូវីដ- ១៩ មានភាពធូរស្បើយ ក៏ដោយ ប៉ុន្តែគ្រូពេទ្យស្ម័គ្រចិត្តរបស់សម្ដេចពិជ័យសេនា ទៀ បាញ់ នៅតែបន្តបេសកកម្ម របស់ខ្លួន ចុះជួយប្រជាពលរដ្ឋនៅតាមបណ្ដារាជធានី ខេត្ត ក្រុងជាបន្តបន្ទាប់ទៅមុខទៀត៕