ក្រុមប្រឹក្សាខេត្តពោធិ៍សាត់ បិទបញ្ចប់វេទិកាផ្សព្វផ្សាយ និងពិគ្រោះយោបល់ លើកទី២ អាណត្តិទី៤ ឆ្នាំ២០២៥ ជាមួយប្រជាពលរដ្ឋ តាមបណ្តាស្រុកក្រុងទាំង៧ ទូទាំងខេត្តពោធិ៍សាត់
ពោធិ៍សាត់៖ ក្រុមប្រឹក្សាខេត្តពោធិ៍សាត់ នាថ្ងៃទី២៦ ខែវិច្ឆិកា ឆ្នាំ២០២៥ បានបិទបញ្ចប់វេទិកាផ្សព្វផ្សាយ និងពិគ្រោះយោបល់ លើកទី២ អាណត្តិទី៤ ឆ្នាំ២០២៥របស់ខ្លួន ត្រឹមក្រុងពោធិ៍សាត់ បន្ទាប់ពីបានដំណើរតាមបណ្តាស្រុក ទូទាំងខេត្តពោធិ៍សាត់ គិតចាប់ពីថ្ងៃទី១៧ ខែវិច្ឆិកា ឆ្នាំ២០២៥កន្លងទៅ ដោយបានការចូលរួមពី ឯកឧត្តម លោកជំទាវ សមាជិក សមាជិកា ក្រុមប្រឹក្សាខេត្ត, អភិបាល-អភិបាលរងខេត្ត, ថ្នាក់ដឹកនាំមន្ទីរអង្គភាពនានាជុំវិញខេត្ត, អាជ្ញាធរស្រុក ក្រុង និងប្រជាពលរដ្ឋយ៉ាងច្រើនកុះករ។
ថ្លែងក្នុងវេទិកានោះ ឯកឧត្តម ម៉ក់ រ៉ា ប្រធានក្រុមប្រឹក្សាខេត្ត បានកោតសរសើរ និងថ្លែងអំណរគុណ ចំពោះវត្តមានចូលរួម របស់ប្រជាពលរដ្ឋ និងភាគីពាក់ព័ន្ធទាំងអស់ ដែលបានចូលរួមក្នុងវេទិកានេះ ដែលបានបង្ហាញឱ្យឃើញពីការប្តេជ្ញាចិត្តចូលរួមសហការគ្នាយ៉ាងខ្លាំងក្លា នៅក្នុងដំណើរការ នៃការគាំទ្រ និងជំរុញការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ស្របតាមក្របខ័ណ្ឌយុទ្ធសាស្ត្រ ស្តីពីកំណែទម្រង់វិមជ្ឈការ និងវិសហមជ្ឈការ សំដៅធ្វើឱ្យមូលដ្ឋានកាន់តែទទួលបាននូវការអភិវឌ្ឍថ្មីៗថែមទៀត។
ឯកឧត្តម បានជម្រាបជូនថា វេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខេត្តពោធិ៍សាត់ ឆ្នាំទី២ អាណត្តិទី៤ នាឱកាសនេះ គឺធ្វើឡើងក្នុងគោលបំណង ដើម្បីផ្តល់ឱកាសដល់ប្រជាពលរដ្ឋ និងអ្នកពាក់ព័ន្ធទាំងអស់ បានស្វែងយល់អំពីស្ថានភាពទូទៅ នៃការអភិវឌ្ឍខេត្ត ស្រុក-ក្រុង ឃុំ-សង្កាត់ និងបញ្ហាប្រឈមនានា ដែលកើតមានឡើង ព្រមទាំងបានផ្តល់ឱកាស ជូនបងប្អូនប្រជាពលរដ្ឋ អ្នកពាក់ព័ន្ធ បានបញ្ចេញមតិរបស់ខ្លួន អំពីក្តីកង្វល់ ក៏ដូចជាសំណូមពរ និងតម្រូវការជាក់ស្តែង ក្នុងមូលដ្ឋានផងដែរ។
ក្នុងវេទិកាតាមបណ្តាស្រុកក្រុងទាំង៧ ឯកឧត្តម ខូយ រីដា អភិបាលខេត្តពោធិ៍សាត់ រួមទាំងអភិបាលរងខេត្ត បានឡើងធ្វើការស្រាយបំភ្លឺ ទៅលើសំណូមពរ និងបញ្ហាប្រឈមនានារបស់ប្រជាពលរដ្ឋ ដោយបានគូសបញ្ចាក់ថា រាល់មតិយោបល់ បញ្ហាប្រឈម និងសំណូមពរដែលបានលើកឡើងក្នុងវេទិកានាថ្ងៃនេះ បើក្នុងករណីដោះស្រាយបានភ្លាមៗ គណៈអភិបាលខេត្ត ក៏ដូចជាក្រុមប្រឹក្សា គណៈអភិបាលស្រុក មន្ទីរពាក់ព័ន្ធ នឹងធ្វើការដោះស្រាយជូនភ្លាមៗ ហើយចំពោះករណីមិនអាចដោះស្រាយបានភ្លាមៗនោះ យើងនឹងលើកយកទៅពិភាក្សារកដំណោះស្រាយជូននៅពេលក្រោយបន្តទៀត ដោយមិនទុកបញ្ហា និងសំណូមពរចោល ឬគេចវេសពីបញ្ហាដែលបានលើកឡើងក្នុងវេទិកានេះឡើយ។
សូមជម្រាបជូនថា គណៈអភិបាលខេត្ត ដែលបានចូលរួមវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខេត្តពោធិ៍សាត់ ឆ្នាំទី២ អាណត្តិទី៤ ឆ្នាំ២០២៥៖ ស្រុកវាលវែង ធ្វើឡើងនាថ្ងៃទី១៧ ខែវិច្ឆិកា ក្រោមអធិបតីភាពលោក ហៀម ឃួន អភិបាលរងខេត្ត, ស្រុកភ្នំក្រវាញ ធ្វើឡើងនាថ្ងៃទី១៨ ខែវិច្ឆិកា ក្រោមអធិបតីភាពលោក ញឹក បានខេង អភិបាលរងខេត្ត, ស្រុកតាលោសែនជ័យ ធ្វើឡើងនាថ្ងៃទី១៩ ខែវិច្ឆិកា ក្រោមអធិបតីភាពលោក អ៊ុយ សុធាវី អភិបាលរងខេត្ត, ស្រុកបាកាន ធ្វើឡើងនាថ្ងៃទី២០ ខែវិច្ឆិកា ក្រោមអធិបតីភាពលោក អ៊ុយ សុធាវី អភិបាលរងខេត្ត, ស្រុកកណ្តៀង ធ្វើឡើងនាថ្ងៃទី២៤ ខែវិច្ឆិកា ក្រោមអធិបតីភាពលោក លឹម សុខតូ អភិបាលរងខេត្ត, ស្រុកក្រគរ ធ្វើឡើងនាថ្ងៃទី២៥ ខែវិច្ឆិកា ក្រោមអធិបតីភាពឯកឧត្តម ខូយ រីដា អភិបាលខេត្ត, និងក្រុងពោធិ៍សាត់ ធ្វើឡើងនាថ្ងៃទី២៦ ខែវិច្ឆិកា ក្រោមអធិបតីភាពលោក ពៅ ពិសិដ្ឋ អភិបាលរងខេត្ត៕
